ಕೋಲ್ಕತ್ತಾ (ಪಶ್ಚಿಮ ಬಂಗಾಳ): ಕೆಲ ವರ್ಷಗಳಿಂದ ದೇಶದ ಆರ್ಥಿಕತೆಯ ವೇಗ ಸ್ಥಿರ ಮತ್ತು ಬಲವಾಗಿದ್ದರೂ, ರೆಪೋ ದರ, ಬಡ್ಡಿ ದರ ಕಡಿತಗೊಳ್ಳುವ ಸಾಧ್ಯತೆ ಇಲ್ಲ. ಜೂನ್ 5 ರಿಂದ ಜೂನ್ 7ರ ನಡುವೆ ಭಾರತೀಯ ರಿಸರ್ವ್ ಬ್ಯಾಂಕ್ನ (ಆರ್ಬಿಐ) ಹಣಕಾಸು ನೀತಿ ಸಮಿತಿ (ಎಂಪಿಸಿ) ಸಭೆಯಲ್ಲಿ ಈ ಬಗ್ಗೆ ಚರ್ಚೆ ನಡೆಯಲಿದೆ. ಬ್ಯಾಂಕ್ಗಳ ಬಡ್ಡಿ ದರ ಸೇರಿದಂತೆ ಯಾವುದೇ ಹಣಕಾಸಿನ ನಿರ್ಧಾರಗಳನ್ನು ವಿಶ್ವ ಕೇಂದ್ರೀಯ ಬ್ಯಾಂಕ್ನ ಸೂಚನೆ ಮತ್ತು ಅದು ಕೈಗೊಳ್ಳುವ ಕ್ರಮಗಳನ್ನು ಆಧರಿಸಿ ನಿರ್ಧಾರ ಮಾಡಲಿದೆ ಎಂದು ತಿಳಿದುಬಂದಿದೆ.
ಕಳೆದ ಕೆಲವು ತಿಂಗಳುಗಳಲ್ಲಿ ಹಣದುಬ್ಬರದಲ್ಲಿ ಉತ್ತಮ ಬೆಳವಣಿಗೆ ಕಂಡುಬಂದಿದೆ. ಆಹಾರ ವಸ್ತುಗಳ ಬೆಲೆಯಲ್ಲಿ ಏರಿಕೆ ಕಂಡರೂ, ಗ್ರಾಹಕ ದರ ಸೂಚ್ಯಂಕ (ಸಿಪಿಐ) ಹಣದುಬ್ಬರವು ಶೇಕಡಾ 4.83 ರಲ್ಲಿ ಸ್ಥಿರವಾಗಿದೆ. ಇದೇ ವೇಳೆ CPI ಬ್ಯಾಸ್ಕೆಟ್ನ ಎಕ್ಸ್ ವೆಜಿಟೆಬಲ್ ದರವು 3.22 ಪ್ರತಿಶತಕ್ಕೆ ಇಳಿದಿದೆ. ಫೆಬ್ರವರಿಯಲ್ಲಿ ಇದು ಶೇಕಡಾ 3.77 ರಷ್ಟಿತ್ತು. ಕೋರ್ ಸಿಪಿಐ ದರ ಕೂಡ ಸ್ವಲ್ಪಮಟ್ಟಿಗೆ ಇಳಿಕೆ ಕಂಡಿದ್ದು, 3.2 ಪ್ರತಿಶತದಷ್ಟಿದೆ. ಫೆಬ್ರವರಿಯಲ್ಲಿ ಇದು ಶೇಕಡಾ 3.34 ರಷ್ಟಿತ್ತು.
ಪ್ರಸ್ತುತ ಬೆಳವಣಿಗೆಗಳ ಆಧಾರದಲ್ಲಿ ಕೋರ್ ಸಿಪಿಐ ದರ 2025 ರ ಹಣಕಾಸು ವರ್ಷದ ಮೊದಲಾರ್ಧದ ವೇಳೆಗೆ ಸುಮಾರು ಶೇಕಡಾ 3.4ಕ್ಕೆ ಇಳಿಯುವ ನಿರೀಕ್ಷೆಯಿದೆ. ಆರ್ಬಿಐನ ನಿರ್ಧಾರಗಳು ದರ ಸೂಚ್ಯಂಕದ ಮೇಲೆ ನಿಂತಿವೆಯಾದರೂ, ಇಳಿಯುತ್ತಿರುವ ಹಣದುಬ್ಬರದಿಂದ ನಿಟ್ಟುಸಿರು ಬಿಡುವಂತಾಗಿದೆ ಎಂದು ಕ್ವಾಂಟಮ್ ಎಎಂಸಿಯ ಹಿರಿಯ ವ್ಯವಸ್ಥಾಪಕ ಪಂಕಜ್ ಪಾಠಕ್ ಹೇಳಿದ್ದಾರೆ.
ರೆಪೋ ದರದಲ್ಲಿ ಬದಲಿಲ್ಲ: ಆದಾಗ್ಯೂ, ಹಣದುಬ್ಬರವು ದಿಢೀರ್ ಏರಿಕೆಯಾಗುವ ಸಾಧ್ಯತೆಗಳಿರುತ್ತವೆ. ಹವಾಮಾನ ವೈಪರೀತ್ಯಗಳು, ಜಾಗತಿಕ ಸರಕುಗಳ ಬೆಲೆಯಲ್ಲಿನ ಏರಿಳಿಕೆಗಳು ಇದಕ್ಕೆ ಕಾರಣವಾಗುತ್ತವೆ. ಆರ್ಬಿಐ ಈ ಎಲ್ಲ ಅಂಶಗಳನ್ನು ಗಮನದಲ್ಲಿಟ್ಟುಕೊಂಡು ದರ ಕಡಿತದ ಬಗ್ಗೆ ನಿರ್ಧಾರ ಕೈಗೊಳ್ಳುತ್ತದೆ ಎಂದು ತಜ್ಞರು ಹೇಳಿದ್ದಾರೆ.
ಆರ್ಬಿಐ ತನ್ನ ನೀತಿ ನಿರ್ಧಾರಗಳ ಮೇಲೆ ಹೆಚ್ಚಿನ ಬದಲಾವಣೆ ಮಾಡುವ ಸಾಧ್ಯತೆ ಇಲ್ಲ. ಈಗಿರುವ ರೆಪೊ ದರವಾದ ಶೇಕಡಾ 6.5 ರಲ್ಲಿ ಯಾವುದೇ ಬದಲಾವಣೆ ಮಾಡುವುದಿಲ್ಲ ಎಂದು ಆರ್ಥಿಕ ತಜ್ಞರು ಭಾವಿಸಿದ್ದಾರೆ.
ದೇಶದ ಸ್ಥೂಲ ಆರ್ಥಿಕತೆಯು ಸ್ಥಿರವಾಗಿದೆ. ಅದರ ಬೆಳವಣಿಗೆಯ ವೇಗವೂ ಯಥಾಸ್ಥಿತಿಯಲ್ಲಿದೆ. ದೇಶೀಯವಾಗಿ ಉತ್ತಮ ಸ್ಥಿತಿಯಲ್ಲಿದ್ದರೂ, ಏಕಪಕ್ಷೀಯವಾಗಿ ಆರ್ಬಿಯ ದರ ಕಡಿತಕ್ಕೆ ಮುಂದಾಗುವುದಿಲ್ಲ. ವಿಶ್ವ ಕೇಂದ್ರೀಯ ಬ್ಯಾಂಕನ್ ನಿರ್ಧಾರಗಳು ಮತ್ತು ಜಾಗತಿಕವಾಗಿ ಸಂಭವಿಸುವ ಬದಲಾವಣೆಗಳ ಆಧಾರದ ಮೇಲೆ ನಿರ್ಧಾರಗಳನ್ನು ಕೈಗೊಳ್ಳುತ್ತದೆ ಎಂದು ವಿಶ್‌ಲಿಸ್ಟ್ ಕ್ಯಾಪಿಟಲ್‌ನ ನಿರ್ದೇಶಕ ನಿಲಂಜನ್ ಡೇ ಹೇಳುತ್ತಾರೆ.
ಇದನ್ನೂ ಓದಿ: ಒಇಸಿಡಿ ಜಾಗತಿಕ ತೆರಿಗೆ ಒಪ್ಪಂದದ ಪಿಲ್ಲರ್ 1ಕ್ಕೆ ಭಾರತದ ವಿರೋಧವೇಕೆ?: ವಿಶ್ಲೇಷಣೆ - India Opposes Global Tax Treaty
