ಮುಂಬೈ(ಮಹಾರಾಷ್ಟ್ರ): ಅದಾನಿ ಸಮೂಹದ ಷೇರುಗಳು ಮತ್ತೊಮ್ಮೆ ಮಾರಾಟದ ಒತ್ತಡ ಎದುರಿಸುತ್ತಿವೆ. ಲಂಚದ ಆರೋಪದ ಮೇಲೆ US ಸರ್ಕಾರವು ಗುಂಪು ತನಿಖೆ ನಡೆಸುತ್ತಿದೆ ಎಂಬ ಸುದ್ದಿಯ ಹಿನ್ನೆಲೆ ಅವರ ಷೇರುಗಳ ಮೌಲ್ಯವು ಕುಸಿತ ಕಾಣುತ್ತಿದೆ. ಸಮೂಹದ ಎಲ್ಲ ಕಂಪನಿಗಳ ಷೇರುಗಳು ಆರಂಭದಲ್ಲಿ ಭಾರೀ ನಷ್ಟವನ್ನು ಎದುರಿಸಿದರೂ ಮಧ್ಯಾಹ್ನ ಒಂದು ಗಂಟೆಯ ಹೊತ್ತಿಗೆ ಚೇತರಿಸಿಕೊಂಡು ಕೊಂಚ ನಷ್ಟದೊಂದಿಗೆ ಮುಂದುವರಿದವು.
ಪ್ರಮುಖ ಕಂಪನಿಯಾದ ಅದಾನಿ ಎಂಟರ್‌ಪ್ರೈಸಸ್ ಷೇರುಗಳು ಬೆಳಗ್ಗೆ 4 ಪ್ರತಿಶತದಷ್ಟು ಕಳೆದುಕೊಂಡಿದ್ದರೆ, ಅದು ಈಗ 1 ಪ್ರತಿಶತಕ್ಕೆ ಚೇತರಿಸಿಕೊಂಡಿತ್ತು. ಅದಾನಿ ಪೋರ್ಟ್ಸ್ ಅಂಡ್ ಎಕನಾಮಿಕ್ ಝೋನ್ ಲಿಮಿಟೆಡ್ ಒಂದು ಹಂತದಲ್ಲಿ ಶೇ.3ರಷ್ಟು ಕುಸಿದಿದ್ದು, ಕೊನೆಗೆ ಶೇ.1.5ರಷ್ಟು ನಷ್ಟದೊಂದಿಗೆ ವಹಿವಾಟು ನಡೆಸಿತು. ಅದಾನಿ ವಿಲ್ಮಾರ್, ಅದಾನಿ ಪವರ್, ಅದಾನಿ ಟೋಟಲ್ ಗ್ಯಾಸ್, ಅದಾನಿ ಎನರ್ಜಿ ಸಲ್ಯೂಷನ್ಸ್ ಹೀಗೆ ಎಲ್ಲಾ ಷೇರುಗಳು ಕುಸಿತ ಕಂಡಿವೆ. ಮತ್ತು ಈ ಗುಂಪಿಗೆ ಸೇರಿದ ಡಾಲರ್ ಬಾಂಡ್‌ಗಳು ಸಹ ಮೌಲ್ಯದಲ್ಲಿ ಕಡಿಮೆಯಾಗಿವೆ.
ಭಾರತದಲ್ಲಿ ಇಂಧನ ಯೋಜನೆಗಳನ್ನು ಸ್ಥಾಪಿಸಲು ಅದಾನಿ ಗ್ರೂಪ್ ಅಥವಾ ಗೌತಮ್ ಅದಾನಿ ಸೇರಿದಂತೆ ಕೆಲ ವ್ಯಕ್ತಿಗಳು ಯಾರಾದ್ರೂ ಲಂಚ ನೀಡಿರಬಹುದೇ ಅಥವಾ ಇಲ್ಲವೇ ಎಂಬುದನ್ನು ಕಂಡುಕೊಳ್ಳಲು ಅಮೆರಿಕ ತನಿಖೆ ನಡೆಸಿದೆ ಎಂದು ಬ್ಲೂಮ್ ಬರ್ಗ್ ತನ್ನ ಲೇಖನದಲ್ಲಿ ತಿಳಿಸಿದೆ.
ತನಿಖೆ ನಡೆಸಲಾಗುತ್ತಿದೆ ಎಂದು ದೇಶದ ಅಟಾರ್ನಿ ಜನರಲ್ ಕಚೇರಿ ಮತ್ತು ನ್ಯಾಯಾಂಗ ಇಲಾಖೆಯ ಘಟಕ ತಿಳಿಸಿದೆ. ದೇಶೀಯ ಇಂಧನ ಕಂಪನಿ ಅಜುರೆ ಪವರ್ ಗ್ಲೋಬಲ್ ವಿರುದ್ಧವೂ ತನಿಖೆ ಪ್ರಾರಂಭವಾಗಿದೆ. ಅದಾನಿ ಸಮೂಹ ಅಮೆರಿಕದಲ್ಲಿ ವಹಿವಾಟು ನಡೆಸದಿದ್ದರೂ ಆ ಗುಂಪಿನಲ್ಲಿರುವ ಅಮೆರಿಕನ್ನರ ಹೂಡಿಕೆ ಹಿನ್ನೆಲೆಯಲ್ಲಿ ಅಲ್ಲಿನ ಕಂಪನಿಗಳು ತನಿಖೆ ನಡೆಸಬಹುದು. ಆದರೆ, ಈ ಬಗ್ಗೆ ತಮ್ಮ ಬಳಿ ಯಾವುದೇ ಅಧಿಕೃತ ಮಾಹಿತಿ ಇಲ್ಲ ಎಂದು ಅದಾನಿ ಗ್ರೂಪ್ ಹೇಳಿಕೆಯಲ್ಲಿ ತಿಳಿಸಿದೆ.
ಓದಿ: ಚುನಾವಣಾ ಬಾಂಡ್‌ ಕುರಿತ ಎಲ್ಲ ಮಾಹಿತಿಯನ್ನು ಗುರುವಾರದೊಳಗೆ ಬಹಿರಂಗಪಡಿಸಿ: SBIಗೆ ಸುಪ್ರೀಂ ಕೋರ್ಟ್ ತಾಕೀತು
