ಹರಿದ್ವಾರ: ಇಲ್ಲಿನ ಮೋತಿಚುರ್ ರೈಲ್ವೆ ನಿಲ್ದಾಣ ಸಮೀಪದ ರೈಲ್ವೆ ಹಳಿ ಮೇಲೆ ಡಿಟೋನೇಟರ್ ಇಟ್ಟ ವ್ಯಕ್ತಿಯನ್ನು ಹರಿದ್ವಾರ ರೈಲ್ವೆ ಪೊಲೀಸರು ಬಂಧಿಸಿದ್ದಾರೆ. ಬಂಧಿತ ವ್ಯಕ್ತಿಯನ್ನು ಅಶೋಕ್ ಎಂದು ಗುರುತಿಸಲಾಗಿದೆ. ಈತ ಉತ್ತರ ಪ್ರದೇಶದ ರಾಮ್ಪುರ ಜಿಲ್ಲೆಯ ನಿವಾಸಿ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
ಹಳಿಗಳ ಮೇಲೆ ಡಿಟೋನೇಟರ್ ಕಂಡುಬಂದಿದ್ದು, ಕೂಡಲೇ ಮೊರದಾಬಾದ್ ರೈಲ್ವೆ ವಿಭಾಗ ಕಂಟ್ರೋಲ್ ರೂಂಗೆ ಮಾಹಿತಿ ರವಾನೆಯಾಗಿತ್ತು. ತಕ್ಷಣವೇ ಕಾರ್ಯಪ್ರವೃತ್ತರಾದ ಹರಿದ್ವಾರದ ಅಧಿಕಾರಿಗಳು ಸ್ಥಳಕ್ಕೆ ಆಗಮಿಸಿದ್ದಾರೆ. ಈ ವೇಳೆ ಅಲ್ಲಿದ್ದ ಸಿಸಿಟಿವಿ ಕ್ಯಾಮೆರಾ ಪರಿಶೀಲಿಸಿದಾಗ ವ್ಯಕ್ತಿಯೊಬ್ಬ ರೈಲ್ವೆ ಹಳಿಗಳ ಮೇಲೆ ಅನುಮಾನಾಸ್ಪದವಾಗಿ ಓಡಾಡುತ್ತಿರುವುದು ಗೊತ್ತಾಗಿದೆ.
ವ್ಯಕ್ತಿಯನ್ನು ವಶಕ್ಕೆ ಪಡೆದು ಪೊಲೀಸರು ತನಿಖೆಗೆ ಒಳಪಡಿಸಿದಾಗ, ಸಿಗ್ನಲ್ ಫಾಗ್ ಡಿಟೋನೇಟರ್ ಪತ್ತೆಯಾಗಿದೆ. ರೈಲಿನ ಶಬ್ಧ ಆಲಿಸುವ ಕುತೂಹಲದಿಂದ ಈ ಕೃತ್ಯ ಎಸಗಿದ್ದಾಗಿ ಆರೋಪಿ ತಿಳಿಸಿದ್ದಾನೆ.
ಡಿಟೋನೇಟರ್ ಅನ್ನು ಸಾಮಾನ್ಯವಾಗಿ ರೈಲನ್ನು ಎಚ್ಚರಿಸಲು ಮತ್ತು ವೇಗದ ನಿಯಂತ್ರಣಕ್ಕೆ ಬಳಕೆ ಮಾಡುತ್ತಾರೆ. ಸಿಗ್ನಲ್ ಫಾಗ್ ಡಿಟೊನೇಟರ್ ಅನ್ನು ರೈಲು ಅತಿ ಹೆಚ್ಚು ಶಬ್ಧ ಮಾಡುವಾಗ ಅದನ್ನು ನಿಲ್ಲಿಸಲು ಬಳಸಲಾಗುತ್ತದೆ. ಇದು ಯಾವುದೇ ಹಾನಿ ಉಂಟುಮಾಡುವುದಿಲ್ಲ.
ಇದನ್ನೂ ಓದಿ: ಟೆಸ್ಲಾ ಕಾರು ಪಲ್ಟಿಯಾಗಿ ಸ್ಫೋಟ; ಕೆನಡಾದಲ್ಲಿ ನಾಸಿಕ್ ಯುವಕ ಸೇರಿ ಮೂವರು ಭಾರತೀಯರ ಸಾವು
