ಮಹಾವಿಕಾಸ್​ ಅಘಾಡಿಗೆ ಮತ್ತೊಂದು ಶಾಕ್​​: ಕೂಟದಿಂದ ಹೊರಬರಲು ಮಿತ್ರಪಕ್ಷ ನಿರ್ಧಾರ

ಮಹಾರಾಷ್ಟ್ರ ವಿಧಾನಸಭೆ ಚುನಾವಣೆಯಲ್ಲಿ ಸೋಲು ಕಂಡಿರುವ ಎಂವಿಎ ಕೂಟಕ್ಕೆ ಮತ್ತೊಂದು ಹಿನ್ನಡೆ ಉಂಟಾಗಿದೆ. ಮಿತ್ರಪಕ್ಷವೊಂದು ಮೈತ್ರಿ ಮುರಿದುಕೊಳ್ಳುವ ನಿರ್ಧಾರ ಮಾಡಿದೆ.

ಮುಂಬೈ (ಮಹಾರಾಷ್ಟ್ರ): ಇತ್ತೀಚೆಗೆ ಮುಗಿದ ಮಹಾರಾಷ್ಟ್ರ ವಿಧಾನಸಭೆ ಚುನಾವಣೆಯಲ್ಲಿ ಬಿಜೆಪಿ ನೇತೃತ್ವದ 'ಮಹಾಯುತಿ' ಮೈತ್ರಿಕೂಟದ ಮುಂದೆ ಭಾರೀ ಮುಖಭಂಗ ಅನುಭವಿಸಿ ಸೋಲೊಪ್ಪಿಕೊಂಡಿರುವ ಪ್ರತಿಪಕ್ಷಗಳ ಮೈತ್ರಿಕೂಟ 'ಮಹಾವಿಕಾಸ್​ ಅಘಾಡಿ'ಗೆ ಮತ್ತೊಂದು ಶಾಕ್​ ಎದುರಾಗಿದೆ.

ಎಂವಿಎ ಕೂಟದಲ್ಲಿ ಗುರುತಿಸಿಕೊಂಡಿದ್ದ ಸಮಾಜವಾದಿ ಪಕ್ಷವು ಮೈತ್ರಿಯಿಂದ ಹೊರಬರುವುದಾಗಿ ಹೇಳಿದೆ. ಇದಕ್ಕೆ ಉದ್ಧವ್​ ಠಾಕ್ರೆ ನೇತೃತ್ವದ ಶಿವಸೇನೆ ಕಾರಣ ಎಂದು ಬೊಟ್ಟು ಮಾಡಿದೆ. ಸೋಲಿನ ನಡುವೆ ಎಸ್​​ಪಿಯ ಈ ನಿರ್ಧಾರ ಕಾಂಗ್ರೆಸ್​, ಎನ್​ಸಿಪಿ (ಎಸ್​ಪಿ), ಶಿವಸೇನೆ(ಯುಬಿಟಿ) ಬಣಕ್ಕೆ ಹಿನ್ನಡೆ ಉಂಟು ಮಾಡಿದೆ.

#WATCH | On Shiv Sena - UBT reportedly expressing support to those who demolished Babri Mosque in Ayodhya - in their mouthpiece 'Saamana', Maharashtra SP President Abu Azmi says, " they (shiv sena - ubt) were saying that they have become secular now - as they were in alliance… pic.twitter.com/V9pcZINNgR

— ANI (@ANI) December 7, 2024

ಶಿವಸೇನೆ ಮೇಲೆ ಎಸ್​ಪಿ ಕಿಡಿ: ಎಂವಿಎ ಕೂಟದಿಂದ ತಾನು ಹೊರಬರಲು ಶಿವಸೇನೆಯತ್ತ ಎಸ್​​ಪಿ ಬೆರಳು ತೋರಿಸಿದೆ. ಇದಕ್ಕೆ ಕಾರಣ, ಆ ಪಕ್ಷದ ನೇತಾರರು ನೀಡಿದ ಜಾಹೀರಾತು. ಠಾಕ್ರೆ ಬಣದ ಶಿವಸೇನೆಯು ಬಾಬಾರಿ ಮಸೀದಿ ಧ್ವಂಸದ ಬಗ್ಗೆ ಜಾಹೀರಾತು ನೀಡಿದೆ. ಇದನ್ನು ಪಕ್ಷದ ಮುಖಂಡರೊಬ್ಬರು ತಮ್ಮ ಎಕ್ಸ್​ ಖಾತೆಯಲ್ಲಿ ಹಂಚಿಕೊಂಡು ಬೆಂಬಲ ನೀಡಿದ್ದಾರೆ.

ಇದನ್ನು ಸಮಾಜವಾದಿ ಪಕ್ಷದ ರಾಜ್ಯಾಧ್ಯಕ್ಷ ಅಬು ಅಜ್ಮಿ ಅವರು ಟೀಕಿಸಿದ್ದಾರೆ. 'ಬಾಬರಿ ಮಸೀದಿ ಧ್ವಂಸದ ಬಗ್ಗೆ ಶಿವಸೇನೆಯು ಇನ್ನು ತನ್ನ ಹಳೆಯ ನಿರ್ಧಾರಕ್ಕೆ ಬದ್ಧವಾಗಿದೆ. ಮಹಾವಿಕಾಸ್​ ಅಘಾಡಿಯು ಇದಕ್ಕೆ ವಿರುದ್ಧವಾಗಿದೆ. ಹಳೆಯ ಘಟನೆಗಳನ್ನು ಮತ್ತೆ ಮುನ್ನೆಲೆಗೆ ತಂದು ಸಮುದಾಯಕ್ಕೆ ನೋವು ತಂದಿದೆ' ಎಂದು ಅವರು ಅಸಮಾಧಾನ ಹೊರಹಾಕಿದ್ದಾರೆ.

ಎಂವಿಎ ಕೂಟದ ಭಾಗವಾಗಿರುವ ಶಿವಸೇನೆಯು ಇಲ್ಲಿನ ಸಿದ್ಧಾಂತಗಳನ್ನು ಪಾಲಿಸಬೇಕು. ಇದನ್ನು ಮೀರಿದ್ದರಿಂದ ಪಕ್ಷವು ಕೂಟದಿಂದ ಹಿಂದೆ ಸರಿಯಲು ನಿರ್ಧರಿಸಿದೆ. ಈ ಬಗ್ಗೆ ಪಕ್ಷದ ರಾಷ್ಟ್ರೀಯ ಅಧ್ಯಕ್ಷ ಅಖಿಲೇಶ್​ ಯಾದವ್​ ಅವರಿಗೆ ಮಾಹಿತಿ ನೀಡಲಾಗುವುದು ಎಂದು ಅಬು ಅಜ್ಮಿ ಹೇಳಿದ್ದಾರೆ.

ಶಿವಸೇನೆ ತಿರುಗೇಟು: ಇದಕ್ಕೆ ತಿರುಗೇಟು ನೀಡಿರುವ ಠಾಕ್ರೆ ಬಣದ ಶಿವಸೇನೆ, ಬಾಬರಿ ಮಸೀದಿ ಧ್ವಂಸ ಕುರಿತು ತಮ್ಮ ಪಕ್ಷದ ನಿಲುವು 1992 ರಿಂದಲೂ ಒಂದೇ ತೆರನಾಗಿದೆ. 31 ವರ್ಷಗಳ ಬಳಿಕವೂ ಪಕ್ಷ ತನ್ನ ನಿರ್ಧಾರಕ್ಕೆ ಬದ್ಧವಾಗಿದೆ. ಇದನ್ನು ಸಮಾಜವಾದಿ ಪಕ್ಷ ಅರಿತುಕೊಂಡಿಲ್ಲ. ಎಸ್​ಪಿ ನಾಯಕರು ಆಡಳಿತಾರೂಢ ಮಹಾಯುತಿ ಕಡೆಗೆ ವಾಲುತ್ತಿದ್ದಾರೆ. ಹೀಗಾಗಿ ಶಿವಸೇನೆ ವಿರುದ್ಧ ಟೀಕಿಸುತ್ತಿದ್ದಾರೆ ಎಂದಿದೆ.

288 ಸದಸ್ಯ ಬಲದ ಮಹಾರಾಷ್ಟ್ರ ವಿಧಾನಸಭೆಯಲ್ಲಿ ಸಮಾಜವಾದಿ ಪಕ್ಷವು ಇಬ್ಬರು ಶಾಸಕರನ್ನು ಹೊಂದಿದೆ. ಚುನಾವಣೆಯಲ್ಲಿ 8 ಸ್ಥಾನಗಳಲ್ಲಿ ಅದು ಸ್ಪರ್ಧೆ ಮಾಡಿ ಆರು ಕಡೆ ಸೋಲು ಅನುಭವಿಸಿದೆ. ಎಂವಿಎ ಕೂಟದಲ್ಲಿದ್ದರೂ ಅದು ಚುನಾವಣಾ ಮೈತ್ರಿ ಮಾಡಿಕೊಳ್ಳದೆ ಸೌಹಾರ್ದಯುತ ಹೋರಾಟ ನಡೆಸಿತ್ತು.

ಇದನ್ನೂ ಓದಿ: ಇವಿಎಂ ದುರ್ಬಳಕೆ ಆರೋಪ: ಶಾಸಕತ್ವ ಪ್ರಮಾಣವಚನ ಬಹಿಷ್ಕರಿಸಿದ ವಿಪಕ್ಷ ಸದಸ್ಯರು