ಕೈಗಾರಿಕಾ ಮದ್ಯದ ಉತ್ಪಾದನೆ, ನಿಯಂತ್ರಣ ರಾಜ್ಯಗಳ ಅಧಿಕಾರ: ಸುಪ್ರೀಂ ಕೋರ್ಟ್​

ಕೈಗಾರಿಕಾ ಮದ್ಯದ ಉತ್ಪಾದನೆ ರಾಜ್ಯಗಳ ಅಧಿಕಾರ ಎಂದು ಸುಪ್ರೀಂ ಕೋರ್ಟ್​ ಹೇಳಿದೆ.

ನವದೆಹಲಿ: ಕೈಗಾರಿಕಾ ಮದ್ಯದ ಉತ್ಪಾದನೆ ಮತ್ತು ಪೂರೈಕೆಯ ಮೇಲೆ ರಾಜ್ಯಗಳಿಗೆ ನಿಯಂತ್ರಣ ಅಧಿಕಾರವಿದೆ ಎಂದು ಸುಪ್ರೀಂ ಕೋರ್ಟ್ ಬುಧವಾರ ಹೇಳಿದೆ. ಸಂವಿಧಾನದ ಏಳನೇ ಅನುಸೂಚಿಯಲ್ಲಿ ರಾಜ್ಯ ಪಟ್ಟಿಯ ನಮೂದು 8 ರಲ್ಲಿ "ಮಾದಕ ಮದ್ಯ" ಎಂಬ ಪದವು ಕೈಗಾರಿಕಾ ಮದ್ಯವನ್ನು ತನ್ನ ವ್ಯಾಪ್ತಿಯಲ್ಲಿ ಸೇರಿಸುತ್ತದೆ ಎಂದು ಸುಪ್ರೀಂ ಕೋರ್ಟ್ 8:1 ಬಹುಮತದ ತೀರ್ಪಿನಲ್ಲಿ ಅಭಿಪ್ರಾಯಪಟ್ಟಿದೆ.

ಮುಖ್ಯ ನ್ಯಾಯಮೂರ್ತಿ ಡಿ.ವೈ.ಚಂದ್ರಚೂಡ್, ನ್ಯಾಯಮೂರ್ತಿಗಳಾದ ಹೃಷಿಕೇಶ್ ರಾಯ್, ಅಭಯ್ ಎಸ್.ಓಕಾ, ಜೆ.ಬಿ. ಪರ್ಡಿವಾಲಾ, ಮನೋಜ್ ಮಿಶ್ರಾ, ಉಜ್ಜಲ್ ಭುಯಾನ್, ಸತೀಶ್ ಚಂದ್ರ ಶರ್ಮಾ ಮತ್ತು ಅಗಸ್ಟಿನ್ ಜಾರ್ಜ್ ಮಾಸಿಹ್, ನ್ಯಾಯಮೂರ್ತಿ ಬಿ.ವಿ.ನಾಗರತ್ನ ಅವರನ್ನೊಳಗೊಂಡ ನ್ಯಾಯಪೀಠ ಈ ತೀರ್ಪು ನೀಡಿದೆ.

ಈ ಮೂಲಕ ಸಿಂಥೆಟಿಕ್ಸ್ ಅಂಡ್ ಕೆಮಿಕಲ್ಸ್ ಲಿಮಿಟೆಡ್ ವಿರುದ್ಧ ಉತ್ತರ ಪ್ರದೇಶ ಸರ್ಕಾರ ಪ್ರಕರಣದಲ್ಲಿ ಕೈಗಾರಿಕಾ ಆಲ್ಕೋಹಾಲ್ ಉತ್ಪಾದನೆಯ ಮೇಲೆ ಕೇಂದ್ರವು ನಿಯಂತ್ರಕ ಅಧಿಕಾರವನ್ನು ಹೊಂದಿದೆ ಎಂದು 1990ರಲ್ಲಿ ಏಳು ನ್ಯಾಯಾಧೀಶರ ಪೀಠ ನೀಡಿದ್ದ ತೀರ್ಪನ್ನು ಸುಪ್ರೀಂ ಕೋರ್ಟ್ ಬಹುಮತದ ತೀರ್ಪು ರದ್ದುಗೊಳಿಸಿದೆ.

ಈಥೈಲ್ ಆಲ್ಕೋಹಾಲ್ (ಇದು ಶೇಕಡಾ 95 ರಷ್ಟು ಎಥೆನಾಲ್ ಹೊಂದಿದೆ) ಆಲ್ಕೋಹಾಲ್ ನ ಕೈಗಾರಿಕಾ ರೂಪವಾಗಿದೆ ಮತ್ತು ಮನುಷ್ಯರ ಸೇವನೆಗೆ ಅನರ್ಹವಾಗಿದೆ. ಬಹುಮತದ ತೀರ್ಪನ್ನು ಬರೆದ ಸಿಜೆಐ, ಏಳು ನ್ಯಾಯಾಧೀಶರ ಪರವಾಗಿ ಬರೆಯುತ್ತ, ಕಲಂ 8 "ಕಚ್ಚಾ ವಸ್ತುಗಳಿಂದ ಮಾದಕ ಮದ್ಯದ ಉತ್ಪಾದನೆಯವರೆಗೆ" ಎಲ್ಲವನ್ನೂ ನಿಯಂತ್ರಿಸುತ್ತದೆ ಎಂದು ಹೇಳಿದರು.

"ಪಟ್ಟಿ 1 ರ ನಮೂದು 52 ರ ಅಡಿಯಲ್ಲಿ ಘೋಷಣೆಯನ್ನು ಹೊರಡಿಸುವ ಮೂಲಕ ಸಂಸತ್ತು ಇಡೀ ಉದ್ಯಮವನ್ನು ಆಕ್ರಮಿಸಲು ಸಾಧ್ಯವಿಲ್ಲ. ಪಟ್ಟಿ 2 ರ ನಮೂದು 24 ರ ಅಡಿಯಲ್ಲಿ ರಾಜ್ಯ ಶಾಸಕಾಂಗದ ಅಧಿಕಾರವನ್ನು ಪಟ್ಟಿ 1 ರ ನಮೂದು 52 ರ ಅಡಿಯಲ್ಲಿ ಸಂಸತ್ತಿನ ಕಾನೂನಿನ ವ್ಯಾಪ್ತಿಗೆ ಬರುವ ಕ್ಷೇತ್ರದ ವ್ಯಾಪ್ತಿಗೆ ಮಾತ್ರ ಸೀಮಿತಗೊಳಿಸಲಾಗಿದೆ" ಎಂದು ನ್ಯಾಯಪೀಠ 364 ಪುಟಗಳ ತೀರ್ಪಿನಲ್ಲಿ ತಿಳಿಸಿದೆ.

ಮಾದಕ ಮದ್ಯದ ಉದ್ಯಮದ ಮೇಲೆ ನಿಯಂತ್ರಣ ಸಾಧಿಸುವ ಕಾನೂನನ್ನು ಜಾರಿಗೆ ತರಲು ಸಂಸತ್ತಿಗೆ ಶಾಸನಾತ್ಮಕ ಅಧಿಕಾರವಿಲ್ಲ ಎಂದು ಅದು ಹೇಳಿದೆ. ನಮೂದು 8 ರಲ್ಲಿ "ಮಾದಕ ಮದ್ಯ" ಎಂಬ ಪದಗುಚ್ಛವು ಸಾರ್ವಜನಿಕ ಆರೋಗ್ಯಕ್ಕೆ ಹಾನಿ ಮಾಡುವ ಎಲ್ಲಾ ಆಲ್ಕೊಹಾಲ್ ಯುಕ್ತ ದ್ರವಗಳನ್ನು ಒಳಗೊಂಡಿದೆ ಎಂದು ಬಹುಮತದ ತೀರ್ಪು ಹೇಳಿದೆ.

ಇದನ್ನೂ ಓದಿ : ಇಂಡಿಯಾ ಹೋಗಿ ಭಾರತ ಬಂತು!: ಹೊಸ ಲೋಗೋದೊಂದಿಗೆ ಏಳು ಸೂಪರ್ ಯೋಜನೆಗಳನ್ನ ಪರಿಚಯಿಸಿದ BSNL​!