ಬುರ್ಹಾನ್ಪುರ್: ಗ್ರಾಹಕರನ್ನು ಸೆಳೆಯಲು ಅಂಗಡಿ ಮಾಲೀಕರು ಹೊಸ ಹೊಸ ಕಸರತ್ತು ಮಾಡುತ್ತಿರುತ್ತಾರೆ. ಇದೇ ರೀತಿ ವಿಭಿನ್ನ ಆಲೋಚನೆಯ ಮೂಲಕ ವ್ಯಾಪಾರ ಹೆಚ್ಚಿಸಲು ಬ್ಯಾನರ್ ಹಾಕಿ ಗ್ರಾಹಕರನ್ನು ಸೆಳೆಯಲು ಮುಂದಾಗಿದ್ದ ಮದ್ಯದಂಗಡಿ ಮಾಲೀಕನ ಉಪಾಯವೊಂದು ಕೈಕೊಟ್ಟಿದೆ. ಇದರ ಪರಿಣಾಮ, ನಿಯಮ ಉಲ್ಲಂಘಿಸಿದ ಕಾರಣಕ್ಕೆ 10 ಸಾವಿರ ದಂಡ ತೆರುವಂತಾಗಿದೆ.
ಅಧಿಕಾರಿಗಳು ನೀಡಿದ ಮಾಹಿತಿ ಪ್ರಕಾರ, ಬುರ್ಹಾನ್ಪುರ್ ಜಿಲ್ಲೆಯ ನಾಚನಖೇಡನಲ್ಲಿನ ಮದ್ಯದಂಗಡಿ ಮಾಲೀಕ ಬೆಳಗಿನ ಹೊತ್ತು ಇಂಗ್ಲಿಷ್ ಕಲಿಯಬೇಕೇ ಇಲ್ಲಿಗೆ ಭೇಟಿ ನೀಡಿ ಎಂದು ಲಿಕ್ಕರ್ ಶಾಪ್ ರಸ್ತೆ ಮಾರ್ಗವನ್ನು ಸೂಚಿಸುವ ಬ್ಯಾನರ್ ಅನ್ನು ದೊಡ್ಡದಾಗಿ ಹಾಕಿದ್ದ.
ಮದ್ಯ ಸೇರಿದ ಬಳಿಕ ಜನರ ಬಾಯಿಂದ ಇಂಗ್ಲಿಷ್ ಪದಗಳು ಹೊರಬರುವ ಹಿನ್ನೆಲೆಯಲ್ಲಿ ಮಾಲೀಕ ಈ ರೀತಿಯ ಪ್ರಯೋಗ ನಡೆಸಿದ್ದಾನೆ. ಈ ಪೋಸ್ಟರ್ ಆತನ ಮದ್ಯ ಮಾರಾಟ ಹೆಚ್ಚಿಸಿದೆಯೋ ಇಲ್ಲವೋ ಎಂಬುದರ ಬಗ್ಗೆ ಸ್ಪಷ್ಟ ಮಾಹಿತಿ ಇಲ್ಲ. ಆದರೆ, ಸಾಮಾಜಿಕ ಜಾಲತಾಣದಲ್ಲಿ ಬ್ಯಾನರ್ ಮಾತ್ರ ಸಿಕ್ಕಾಪಟ್ಟೆ ವೈರಲ್ ಆಗಿದೆ.
ಈ ಪೋಸ್ಟರ್ಗೆ ಸಕಾರಾತ್ಮಕ ಮತ್ತು ನಕಾರಾತ್ಮಕ ಟೀಕೆಗಳು ವ್ಯಕ್ತವಾಗುವ ಜೊತೆಗೆ ಈ ಪ್ರಕರಣ ಜಿಲ್ಲಾಡಳಿತ ಮಟ್ಟದಲ್ಲಿ ಅಧಿಕಾರಿಗಳ ಗಮನ ಸೆಳೆದಿದೆ. ಇದನ್ನು ಗಮನಿಸಿದ ಬುರ್ಹಾನ್‌ಪುರ ಜಿಲ್ಲಾಧಿಕಾರಿ ಭವ್ಯಾ ಮಿತ್ತಲ್, ಮದ್ಯ ಮಾರಾಟಗಾರರ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಅಬಕಾರಿ ಇಲಾಖೆಗೆ ಸೂಚಿಸಿದ್ದಾರೆ. ಈ ಬೆನ್ನಲ್ಲೇ ಅಬಕಾರಿ ಇಲಾಖೆ ಅಧಿಕಾರಿಗಳು ಅಂಗಡಿ ಪರವಾನಗಿ ಸಂಬಂಧ ನೋಟಿಸ್ ಜಾರಿ ಮಾಡಿದ್ದಾರೆ.
ಈ ನೋಟಿಸ್ಗೆ ಉತ್ತರಿಸಿರುವ ಲಿಕ್ಕರ್ ಶಾಪ್ ಮಾಲೀಕ, ನಾನು ಯಾವುದೇ ಗಂಭೀರ ತಪ್ಪೆಸಗಿಲ್ಲ. ಅಂಗಡಿಯಿಂದ 40- 50 ಅಡಿ ದೂರದಲ್ಲಿರುವ ಇನ್ನೊಬ್ಬ ವ್ಯಕ್ತಿಯ ಖಾಸಗಿ ಜಮೀನಿನಲ್ಲಿ ಪೋಸ್ಟರ್ ಹಾಕಿದ್ದೇನೆ. ನನಗೆ ಗೊತ್ತಿಲ್ಲದಂತೆ ಯಾರೋ ಬೇರೆ ವ್ಯಕ್ತಿ ದುರುದ್ದೇಶದಿಂದ ಪಿತೂರಿ ನಡೆಸಿ ಈ ರೀತಿ ಬ್ಯಾನರ್ ಹಾಕಿದ್ದಾರೆ ಎಂದು ಸಮಜಾಯಿಷಿ ನೀಡಿದ್ದಾನೆ.
ಆದರೆ, ತಮ್ಮ ಉತ್ತರ ತೃಪ್ತಿಕರವಾಗಿಲ್ಲ. ಮದ್ಯದ ಪರವಾನಗಿಯ ಷರತ್ತುಗಳನ್ನು ಉಲ್ಲಂಘಿಸಿದ್ದೀರಿ ಎಂದು ಅಧಿಕಾರಿಗಳು 10,000 ರೂ. ದಂಡ ವಿಧಿಸಿದ್ದಾರೆ.
ಇದನ್ನೂ ಓದಿ: ಮದುವೆ ಹೆಸರಿನಲ್ಲಿ ದೇಶದ ವಿವಿಧ ರಾಜ್ಯಗಳ 20ಕ್ಕೂ ವಿಚ್ಛೇದಿತರು, ವಿಧವೆಯರನ್ನು ವಂಚಿಸಿದ ಚಾಲಾಕಿ ಅರೆಸ್ಟ್
