ನಂದ್ಯಾಲ(ಆಂಧ್ರಪ್ರದೇಶ): ಶ್ರೀಶೈಲದ ಭ್ರಮರಾಂಬಿಕಾ ದೇವಿಯನ್ನು ಕನ್ನಡಿಗರು ತಮ್ಮ ಮನೆಯ ಹೆಣ್ಣು ಮಗಳಂತೆ ಪರಿಗಣಿಸುತ್ತಾರೆ. ಯುಗಾದಿ ಹಬ್ಬದಂದು ದೇವಿಗೆ ಅರಿಶಿನ-ಕುಂಕುಮ, ಸೀರೆಗಳು ಸೇರಿದಂತೆ ಇತರೆ ಪೂಜಾ ಸಾಮಗ್ರಿಗಳನ್ನು ಅರ್ಪಿಸುವುದು ಇಲ್ಲಿನ ವಾಡಿಕೆ. ಇಲ್ಲಿಗೆ ಪ್ರತಿ ವರ್ಷ ಹೆಚ್ಚಿನ ಸಂಖ್ಯೆಯಲ್ಲಿ ಭಕ್ತರು ಆಗಮಿಸುತ್ತಾರೆ.
ಕೆಲ ಭಕ್ತರು ನೂರಾರು ಕಿ.ಮೀ ಪಾದಯಾತ್ರೆಯ ಮೂಲಕ ಶಕ್ತಿ ಪೀಠವನ್ನು ತಲುಪುತ್ತಾರೆ. ಇನ್ನೂ ಕೆಲವರು ವಾಹನಗಳಲ್ಲಿ ನಂದ್ಯಾಲ ಜಿಲ್ಲೆಯ ಆತ್ಮಕೂರು ತಾಲೂಕಿನ ವೆಂಕಟಾಪುರಕ್ಕೆ ಬಂದು ಅಲ್ಲಿಂದ ನಲ್ಲಮಲ್ಲ ಅರಣ್ಯ ಪ್ರದೇಶದ ಮೂಲಕ ನಡೆದುಕೊಂಡು ಹೋಗುತ್ತಾರೆ. ಹೀಗೆ ಸಾಗುತ್ತಿರುವ ಕನ್ನಡಿಗ ಭಕ್ತರ ಸಮೂಹದಿಂದ ಕಾಡಿನ ಸುತ್ತಮುತ್ತ ತುಂಬಿದೆ. ಅವರ ಶಿವನಾಮದ ಪಠಣದಿಂದ ಗರ್ಭಗುಡಿ ಪ್ರತಿಧ್ವನಿಸುತ್ತದೆ. ಈ ವೇಳೆ ಪೆದ್ದೋರ್ನಾಳ-ಶ್ರೀಶೈಲ ರಸ್ತೆಯೂ ಭಕ್ತರ ಸಾಲುಗಳಿಂದ ತುಂಬಿ ತುಳುಕುತ್ತಿರುತ್ತದೆ.
ಇನ್ನು, ಇಂದಿನಿಂದ ಐದು ದಿನಗಳ ಕಾಲ ಯುಗಾದಿ ಮಹೋತ್ಸವ ನಡೆಯಲಿದ್ದು, ಶ್ರೀಶೈಲ ಮಹಾಕ್ಷೇತ್ರ ಭಕ್ತರಿಂದ ತುಂಬಿ ತುಳುಕುತ್ತಿರುತ್ತದೆ ಎಂದು ಎಂದು ದೇವಸ್ಥಾನದ ಆಡಳಿತ ಮಂಡಳಿ ತಿಳಿಸಿದೆ. ಯುಗಾದಿ ಮಹೋತ್ಸವವನ್ನು ಆಚರಿಸಲು ಭಕ್ತರು ನಲ್ಲಮಲ್ಲ ಅರಣ್ಯ ಪ್ರದೇಶದಲ್ಲಿನ ಬೆಟ್ಟಗಳಿಂದ ಪಾದಯಾತ್ರೆ ಮೂಲಕ ಶ್ರೀಶೈಲವನ್ನು ತಲುಪುತ್ತಿದ್ದಾರೆ. ಶ್ರೀಶೈಲ ಕ್ಷೇತ್ರ ಸಾವಿರಾರು ಭಕ್ತರಿಂದ ಗಿಜಿಗುಡುತ್ತಿದೆ.
ಶ್ರೀ ಭ್ರಮರಾಂಬ ಮಲ್ಲಿಕಾರ್ಜುನ ಸ್ವಾಮಿಯ ದರ್ಶನ ಮತ್ತು ಪ್ರಾರ್ಥನೆ ಸಲ್ಲಿಸಲು ಹೆಚ್ಚಿನ ಸಂಖ್ಯೆಯಲ್ಲಿ ಭಕ್ತರು ಶ್ರೀಶೈಲಕ್ಕೆ ಆಗಮಿಸುತ್ತಿದ್ದಾರೆ. ಮಲ್ಲಿಕಾರ್ಜುನ ದೇವರ ದರ್ಶನ ಪಡೆದು ಭಕ್ತರು ಪುಳಕಿತರಾದರು. ಹೆಚ್ಚಿನ ಸಂಖ್ಯೆಯಲ್ಲಿ ಬರುವ ಭಕ್ತರಿಗೆ ಸಕಲ ವ್ಯವಸ್ಥೆ ಕಲ್ಪಿಸಲಾಗಿದೆ ಎಂದು ದೇವಸ್ಥಾನದ ಅಧಿಕಾರಿಗಳು ತಿಳಿಸಿದ್ದಾರೆ.
ಇನ್ನೊಂದೆಡೆ ಶ್ರೀಶೈಲ ಕ್ಷೇತ್ರದಲ್ಲಿ ಯುಗಾದಿ ಮಹೋತ್ಸವದ ಸಡಗರ ಮನೆ ಮಾಡಿದೆ. ಸಾಂಸ್ಕೃತಿಕ ಕಾರ್ಯಕ್ರಮಗಳು ಭಕ್ತರನ್ನು ವಿಶೇಷವಾಗಿ ಆಕರ್ಷಿಸುತ್ತವೆ. ಗುರುವಾರ ಶ್ರೀಶೈಲ ಜಗದ್ಗುರು ಸೇವಾ ಸಮಿತಿ ಟ್ರಸ್ಟ್‌ನ ಸಾಂಸ್ಕೃತಿಕ ಕಾರ್ಯಕ್ರಮಗಳು, ಹೈದರಾಬಾದ್‌ನ ಶ್ರೀ ವೇದಾಂತ ಸತ್ಯ ನರಸಿಂಹ ಶಾಸ್ತ್ರಿ ಕೂಚಿಪುಡಿ ಕಲಾ ಅಕಾಡೆಮಿ, ಬಿಆರ್‌ವಿಎಸ್ ಪವನ್ ಕುಮಾರ್ ಚರಣ್ ಬಳಗ ಹಾಗೂ ಕರ್ನಾಟಕ ಭಾಗ್ಯಲಕ್ಷ್ಮಿ ಪಾಟೀಲ್ ತಂಡದವರು ಭಕ್ತಿಗೀತೆ, ನೃತ್ಯ ಸಂಗೀತದಿಂದ ಭಕ್ತರ ಮನಸೂರೆಗೊಳಿಸಿದರು.
ಓದಿ: ಚಿಕ್ಕಮಗಳೂರು: ಕಸ ಆಯ್ದು, ಭಿಕ್ಷೆ ಬೇಡಿ ಬದುಕುತ್ತಿದ್ದ ಆಂಧ್ರದ ವೃದ್ಧೆ ಮರಳಿ ಗೂಡಿಗೆ - Old Woman back to home
