ನವದೆಹಲಿ: ಪ್ರಾಣಾಂತಕ ಮಂಕಿಪಾಕ್ಸ್ ಕಾಯಿಲೆಯ ಮತ್ತೊಂದು ಪ್ರಕರಣ ಭಾರತದಲ್ಲಿ ವರದಿಯಾಗಿದೆ. ಆರೋಗ್ಯ ತುರ್ತು ಪರಿಸ್ಥಿತಿಗೆ ಕಾರಣವಾದ 'ಕ್ಲಾಡ್ 1 ಬಿ' ಮಾದರಿಯ ವೈರಸ್ ಇದಾಗಿದೆ ಎಂದು ಗುರುತಿಸಲಾಗಿದೆ. ಕಳೆದ ವಾರ ಕೇರಳದ ವ್ಯಕ್ತಿಯಲ್ಲಿ ಈ ವೈರಸ್ ಪತ್ತೆಯಾಗಿದೆ ಎಂದು ಕೇಂದ್ರ ಸರ್ಕಾರದ ಮೂಲಗಳು ತಿಳಿಸಿವೆ.
ಕೇರಳದ ಮಲಪ್ಪುರಂ ಮೂಲದ 38 ವರ್ಷದ ವ್ಯಕ್ತಿಯು ಇತ್ತೀಚೆಗೆ ಯುಎಇಯಿಂದ ಭಾರತಕ್ಕೆ ಆಗಮಿಸಿದ್ದ. ಈ ವೇಳೆ ತಪಾಸಣೆ ನಡೆಸಿದಾಗ ಎಂಪಾಕ್ಸ್ ರೋಗಲಕ್ಷಣಗಳನ್ನು ಹೊಂದಿದ್ದ. ವೈದ್ಯಕೀಯ ಪರೀಕ್ಷೆಯಲ್ಲಿ ಡೇಂಜರಸ್ ಕ್ಲಾಡ್ 1 ಮಾದರಿಯ ವೈರಸ್ ಎಂದು ದೃಢಪಟ್ಟಿದೆ. ಸದ್ಯ ಸೋಂಕಿತನ ಆರೋಗ್ಯ ಸ್ಥಿತಿ ಸ್ಥಿರವಾಗಿದೆ ಎಂದು ತಿಳಿದುಬಂದಿದೆ. ವಿಶ್ವ ಆರೋಗ್ಯ ಸಂಸ್ಥೆಯು 2022 ರಲ್ಲಿ ಸಾರ್ವಜನಿಕ ಆರೋಗ್ಯ ತುರ್ತು ಪರಿಸ್ಥಿತಿ ಘೋಷಿಸಿದಾಗಿನಿಂದ, ಭಾರತದಲ್ಲಿ 30 ಪ್ರಕರಣಗಳು ವರದಿಯಾಗಿವೆ.
ಚೇತರಿಸಿಕೊಂಡ 'ಕ್ಲಾಡ್ 2' ಸೋಂಕಿತ: ಕೆಲ ದಿನಗಳ ಹಿಂದೆ ವಿದೇಶದಿಂದ ಬಂದ ವ್ಯಕ್ತಿಯಲ್ಲಿ ಮಂಕಿಪಾಕ್ಸ್ ವೈರಸ್ ಕಂಡುಬಂದಿತ್ತು. ಆದರೆ, ಇದು ಅಪಾಯಕಾರಿ ಅಲ್ಲದ ಕ್ಲಾಡ್-2 ಮಾದರಿಯಾಗಿತ್ತು. ಸೋಂಕಿತ ವ್ಯಕ್ತಿ ಎರಡು ವಾರಗಳ ಕಾಲ ದೆಹಲಿಯ ಎಲ್‌ಎನ್‌ಜೆಪಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ. ಇದೀಗ ಚೇತರಿಸಿಕೊಂಡಿದ್ದು, ಆತನನ್ನು ಸೆಪ್ಟೆಂಬರ್ 21 ರಂದು ಡಿಸ್ಚಾರ್ಜ್ ಮಾಡಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ರೋಗಲಕ್ಷಣಗಳಿದ್ದರೆ ತಿಳಿಸಿ: ದೇಶದಲ್ಲಿ ಮೊದಲ ಗಂಭೀರ ಪ್ರಕರಣ ವರದಿಯಾಗಿರುವ ಹಿನ್ನೆಲೆಯಲ್ಲಿ, ವಿದೇಶದಿಂದ ಬಂದ ವ್ಯಕ್ತಿಗಳಲ್ಲಿ ಮಂಕಿಪಾಕ್ಸ್ ರೋಗಲಕ್ಷಣಗಳು ಕಂಡುಬಂದಲ್ಲಿ ಮಾಹಿತಿ ನೀಡಬೇಕು ಎಂದು ಕೇರಳ ಆರೋಗ್ಯ ಇಲಾಖೆ ಸೂಚಿಸಿದೆ. ಆದಷ್ಟು ಬೇಗ ಚಿಕಿತ್ಸೆ ಪಡೆಯುವಂತೆಯೂ ಮನವಿ ಮಾಡಿದೆ. ಸೋಂಕಿತರಿಗೆ ರಾಜ್ಯದ ವಿವಿಧ ಜಿಲ್ಲೆಗಳಲ್ಲಿ ಚಿಕಿತ್ಸೆ ಮತ್ತು ಪ್ರತ್ಯೇಕ ವ್ಯವಸ್ಥೆಗಳನ್ನು ಮಾಡಲಾಗಿದೆ ಎಂದು ತಿಳಿಸಿದೆ.
1958 ರಲ್ಲಿ ಡೆನ್ಮಾರ್ಕ್‌ನಲ್ಲಿ ಸಂಶೋಧನೆಗಾಗಿ ತಂದ ಕೋತಿಗಳಲ್ಲಿ ಮೊದಲ ಬಾರಿಗೆ ಈ ವೈರಸ್ ಪತ್ತೆಯಾಗಿತ್ತು. ನಂತರ ಇದನ್ನು 1970 ರಲ್ಲಿ ಮಾನವರಲ್ಲಿ ಗುರುತಿಸಲಾಯಿತು. 2005 ರಲ್ಲಿ ಕಾಂಗೋದಲ್ಲಿ ಸಾವಿರಾರು ಪ್ರಕರಣಗಳು ದಾಖಲಾಗಿವೆ. 2017 ರ ನಂತರ ನೈಜೀರಿಯಾ ಸೇರಿದಂತೆ ಹಲವು ದೇಶಗಳಿಗೆ ಹರಡಿತು. 2022 ರಿಂದ ಇದು ಮತ್ತಷ್ಟು ವ್ಯಾಪಿಸಿಕೊಂಡು, ಸುಮಾರು 120 ದೇಶಗಳಿಗೆ ಹರಡಿದೆ. ಸಾವಿರಾರು ಪ್ರಕರಣಗಳನ್ನು ಗುಣಮುಖ ಮಾಡಲಾಗಿದ್ದರೂ, ಹಲವರು ಸಾವಿಗೀಡಾಗಿದ್ದಾರೆ.
ಇದನ್ನೂ ಓದಿ: ವಿದೇಶದಿಂದ ಬಂದ ವ್ಯಕ್ತಿಯಲ್ಲಿ ಶಂಕಿತ ಎಂಪಾಕ್ಸ್ ಲಕ್ಷಣ: ಕಟ್ಟೆಚ್ಚರ ವಹಿಸಲು ರಾಜ್ಯಗಳಿಗೆ ಕೇಂದ್ರದ ಸೂಚನೆ - Mpox Outbreak
