ಚಂಡೀಗಢ: ಲೋಕಸಭೆ ಚುನಾವಣೆಯಲ್ಲಿ ಬಿಜೆಪಿ ವಿರುದ್ಧ ಸೆಟೆದು I.N.D.I.A ಮೈತ್ರಿಕೂಟ ರಚಿಸಿಕೊಂಡು ಅದರ ಭಾಗವಾಗಿ ಒಟ್ಟಾಗಿ ಸ್ಪರ್ಧಿಸಿದ್ದ ಆಮ್ ಆದ್ಮಿ ಮತ್ತು ಕಾಂಗ್ರೆಸ್ ಪಕ್ಷಗಳು ಹರಿಯಾಣ ವಿಧಾನಸಭೆ ಚುನಾವಣೆಯಲ್ಲಿ ಪ್ರತ್ಯೇಕವಾಗಿ ಸ್ಪರ್ಧೆಗೆ ಇಳಿಯುತ್ತಿವೆ. ಕೆಲವು ದಿನಗಳಿಂದ ಉಭಯ ಪಕ್ಷಗಳ ನಡುವೆ ನಡೆಯುತ್ತಿದ್ದ ಹೊಂದಾಣಿಕೆ ಮಾತುಕತೆ ಸೋಮವಾರ ಅಧಿಕೃತವಾಗಿ ಮುರಿದು ಬಿದ್ದಿದೆ.
ಸೀಟು ಹಂಚಿಕೆ ವಿಚಾರವಾಗಿ ಎರಡೂ ಪಕ್ಷಗಳು ಪಟ್ಟು ಬಿಡದ ಹಿನ್ನೆಲೆಯಲ್ಲಿ ಮೈತ್ರಿ ಸಾಧ್ಯವಾಗಿಲ್ಲ. ಭಾನುವಾರದವರೆಗೂ ಮೈತ್ರಿ ಮಾತುಕತೆ ನಡೆದರೂ ಯಾವುದೇ ಫಲಪ್ರದವಾಗಿರಲಿಲ್ಲ. ಸೋಮವಾರ ಆಮ್ ಆದ್ಮಿ ಪಕ್ಷವು ತನ್ನ ಅಭ್ಯರ್ಥಿಗಳ ಮೊದಲ ಪಟ್ಟಿಯನ್ನು ಬಿಡುಗಡೆ ಮಾಡುವ ಮೂಲಕ ಚುನಾವಣಾ ಪೂರ್ವ ಮೈತ್ರಿ ಕೈಬಿಟ್ಟಿದೆ.
ಎಲ್ಲ ಸ್ಥಾನಗಳಲ್ಲಿ ಸ್ಪರ್ಧೆ: ಪಟ್ಟಿ ಬಿಡುಗಡೆಯ ಬಳಿಕ ಮೈತ್ರಿ ವಿಫಲವಾದ ಬಗ್ಗೆ ಮಾಹಿತಿ ನೀಡಿದ ಪಕ್ಷದ ಹರಿಯಾಣ ರಾಜ್ಯಾಧ್ಯಕ್ಷ ಸುಶೀಲ್ ಗುಪ್ತಾ, ನಮ್ಮ ಪಕ್ಷವು ಎಲ್ಲ 90 ಸ್ಥಾನಗಳಲ್ಲಿ ಸ್ಪರ್ಧಿಸಲಿದೆ. ಕಾಂಗ್ರೆಸ್ ಜೊತೆಗೆ ಮೈತ್ರಿ ಮಾಡಿಕೊಂಡಿಲ್ಲ. ಸ್ವತಂತ್ರ ಸ್ಪರ್ಧೆಗಾಗಿ ಮೊದಲಿನಿಂದಲೂ ತಯಾರಿ ನಡೆಸಿದ್ದೆವು. ನಾಮಪತ್ರ ಸಲ್ಲಿಸಲು ಇನ್ನು ನಾಲ್ಕೇ ದಿನ ಬಾಕಿ ಉಳಿದ(ಸೆಪ್ಟೆಂಬರ್ 12) ಕಾರಣ ಸೋಮವಾರ ಅಭ್ಯರ್ಥಿಗಳನ್ನು ಘೋಷಿಸಲಾಗಿದೆ ಎಂದರು.
ಕಾಂಗ್ರೆಸ್ ಜೊತೆಗಿನ ಮೈತ್ರಿ ಕುದುರದ ಕಾರಣ, ಅಭ್ಯರ್ಥಿಗಳ ಮೊದಲ ಪಟ್ಟಿ ಬಿಡುಗಡೆ ಮಾಡಲಾಗಿದೆ. ಸದ್ಯದಲ್ಲೇ ಎರಡನೇ ಪಟ್ಟಿಯೂ ಬರಲಿದೆ. ಎಎಪಿ ನಾಯಕರು ಕೂಡ ಚುನಾವಣೆಯಲ್ಲಿ ಏಕಾಂಗಿಯಾಗಿ ಸ್ಪರ್ಧಿಸಲು ಇಚ್ಛಿಸಿದ್ದು, ಉಳಿದ 70 ಅಭ್ಯರ್ಥಿಗಳನ್ನು ಆದಷ್ಟು ಬೇಗ ಘೋಷಿಸಲಾಗುವುದು ಎಂದು ತಿಳಿಸಿದರು.
ಮೊದಲ ಪಟ್ಟಿಯಲ್ಲಿ ಎಎಪಿ ಹಿರಿಯ ನಾಯಕ ಅನುರಾಗ್ ಧಂಡಾ ಕಲಾಯತ್‌ನಿಂದ ಸ್ಪರ್ಧಿಸಲಿದ್ದು, ಗುರ್ಪಾಲ್ ಸಿಂಗ್ ನಾರಾಯಣಗಢದಿಂದ ಸ್ಪರ್ಧಿಸಲಿದ್ದಾರೆ. ನರೇಂದ್ರ ಶರ್ಮಾ ಅವರಿಗೆ ಪುಂಡ್ರಿಯಿಂದ ಟಿಕೆಟ್ ನೀಡಲಾಗಿದೆ. ಜೈಪಾಲ್ ಶರ್ಮಾ ಘರೌಂಡಾದಿಂದ ಕಣಕ್ಕಿಳಿದಿದ್ದಾರೆ. ಅಸ್ಸಾಂದ್‌ನಿಂದ ಅಮನ್‌ದೀಪ್ ಜುಂಡ್ಲಾಗೆ ಟಿಕೆಟ್ ನೀಡಲಾಗಿದ್ದು, ಸಮಲ್ಖಾದಿಂದ ಬಿಟ್ಟು ಪೆಹಲ್ವಾನ್‌ಗೆ ಟಿಕೆಟ್ ನೀಡಲಾಗಿದೆ.
ಸೀಟಿಗಾಗಿ ಕಾಂಗ್ರೆಸ್- ಆಪ್ ಬಿಗಿಪಟ್ಟು: ವಿಧಾನಸಭೆಯ 90 ಸ್ಥಾನಗಳ ಪೈಕಿ ಆಪ್ ಹೊಂದಾಣಿಕೆ ಮಾಡಿಕೊಂಡಲ್ಲಿ 10 ಕ್ಷೇತ್ರಗಳಲ್ಲಿ ಸ್ಪರ್ಧಿಸಲು ಬಯಸಿತ್ತು. ಆದರೆ, ಮಿತ್ರಪಕ್ಷ ಕಾಂಗ್ರೆಸ್ 5 ಸೀಟುಗಳನ್ನು ಬಿಟ್ಟುಕೊಡುವುದಾಗಿ ಹೇಳಿತ್ತು. ಈ ಬಗ್ಗೆ ಆಪ್ ನಾಯಕರು ಸಮ್ಮತಿಸದ ಕಾರಣ, ಮೈತ್ರಿ ಸಾಧ್ಯವಾಗಿಲ್ಲ. ಭಾನುವಾರವಷ್ಟೇ ಆಪ್ನ ಕೆಲ ನಾಯಕರು ಮೈತ್ರಿಗಾಗಿ 5 ಸೀಟುಗಳಲ್ಲಿ ಪಕ್ಷ ಸ್ಪರ್ಧಿಸಲು ಮುಂದಾಗಿದೆ ಎಂದು ಹೇಳಿದ್ದರು. ಅಂತಿಮವಾಗಿ ಘಟಬಂಧನ್ ಮುರಿದುಬಿದ್ದಿದೆ.
90 ಸದಸ್ಯ ಬಲದ ಹರಿಯಾಣ ವಿಧಾನಸಭೆಗೆ ಅಕ್ಟೋಬರ್ 5 ರಂದು ಚುನಾವಣೆ ನಡೆಯಲಿದೆ. ಅಕ್ಟೋಬರ್ 8 ರಂದು ಫಲಿತಾಂಶ ಪ್ರಕಟವಾಗಲಿದೆ.
