ಸಿಎಎ: ಪೌರತ್ವಕ್ಕಾಗಿ ಅರ್ಜಿ ಸಲ್ಲಿಸಲು ಹೊಸ ಪೋರ್ಟಲ್​ ಆರಂಭ, ಯಾವೆಲ್ಲ ದಾಖಲೆಗಳು ಬೇಕು?

ಸಿಎಎ ಅಡಿ ಜನರು ಪೌರತ್ವ ಪಡೆಯಲು ಕೇಂದ್ರ ಸರ್ಕಾರ ಹೊಸ ಪೋರ್ಟಲ್​ ಆರಂಭಿಸಿದೆ.

ನವದೆಹಲಿ: ಪೌರತ್ವ ತಿದ್ದುಪಡಿ ಕಾಯ್ದೆ (ಸಿಎಎ) ನಿಯಮಗಳನ್ನು ಜಾರಿ ಮಾಡಿ ಅಧಿಸೂಚನೆ ಹೊರಡಿಸಿರುವ ಕೇಂದ್ರ ಸರ್ಕಾರ ಅದನ್ನು ಜನರಿಗೆ ಮನದಟ್ಟು ಮಾಡಲು ಮತ್ತು ಸಿಎಎ-2019 ಅಡಿಯಲ್ಲಿ ಪೌರತ್ವಕ್ಕಾಗಿ ಅರ್ಜಿ ಸಲ್ಲಿಸಲು ಹೊಸ ಪೋರ್ಟಲ್​ ಅನ್ನು ಮಂಗಳವಾರ ಬಿಡುಗಡೆ ಮಾಡಿದೆ.

ಹಿಂದುಗಳು, ಜೈನರು, ಬೌದ್ಧರು, ಪಾರ್ಶಿಗಳು, ಕ್ರಿಶ್ಚಿಯನ್ನರು ಸೇರಿದಂತೆ ನೆರೆರಾಷ್ಟ್ರಗಳಿಂದ ಬಂದು ಭಾರತದಲ್ಲಿ ನೆಲೆಸಿರುವ ಮುಸ್ಲಿಮೇತರ ವಲಸಿಗರು ಪೌರತ್ವ ಕೋರಿ ಅರ್ಜಿ ಸಲ್ಲಿಸಬಹುದಾಗಿದೆ. ನಾಗರಿಕತ್ವ ಬಯಸುವ ಜನರು ಸರ್ಕಾರ ಬಿಡುಗಡೆ ಮಾಡಿರುವ indiancitizenshiponline.nic.in ಎಂಬ ಹೊಸ ಪೋರ್ಟಲ್​ನಲ್ಲಿ ಅರ್ಜಿ ಸಲ್ಲಿಸಬೇಕು ಎಂದು ಸರ್ಕಾರ ಸೂಚಿಸಿದ್ದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.

ಇದರ ಜೊತೆಗೆ ಸಿಎಎ ನಿಯಮಗಳನ್ನು ಸಲೀಸಲಾಗಿ ಅರ್ಥ ಮಾಡಿಕೊಳ್ಳಲು ಮತ್ತು ಅರ್ಜಿ ಸಲ್ಲಿಕೆಯು ತ್ವರಿತವಾಗಲು 'CAA-2019' ಎಂಬ ಮೊಬೈಲ್​ ಅಪ್ಲಿಕೇಶನ್​ ಸಹ ಬಿಡುಗಡೆ ಮಾಡಲಿದೆ ಎಂದು ಕೇಂದ್ರ ಗೃಹ ಇಲಾಖೆ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಯಾರು ಪೌರತ್ವಕ್ಕೆ ಅರ್ಹರು?: ಪೌರತ್ವ ತಿದ್ದುಪಡಿ ಕಾಯಿದೆ-2019ರ ಪ್ರಕಾರ, ಅಫ್ಘಾನಿಸ್ತಾನ, ಪಾಕಿಸ್ತಾನ ಮತ್ತು ಬಾಂಗ್ಲಾದೇಶದಲ್ಲಿ ಧಾರ್ಮಿಕ ತುಳಿತಕ್ಕೊಳಗಾಗಿ ಭಾರತಕ್ಕೆ ಬಂದು ನೆಲೆಸಿರುವ 6 ಅಲ್ಪಸಂಖ್ಯಾತ ಸಮುದಾಯಗಳಾದ ಹಿಂದೂಗಳು, ಸಿಖ್ಖರು, ಬೌದ್ಧರು, ಜೈನರು, ಪಾರ್ಸಿಗಳು ಮತ್ತು ಕ್ರಿಶ್ಚಿಯನ್ನರು ಈ ಕಾನೂನಿನಡಿ ಪೌರತ್ವ ಪಡೆಯಲು ಅರ್ಹರಾಗಿದ್ದಾರೆ.

ಕೇಂದ್ರ ಗೃಹ ಸಚಿವಾಲಯ ಸೋಮವಾರ ರಾತ್ರಿ ಆರಂಭಿಸಿರುವ ಪೋರ್ಟಲ್​ನಲ್ಲಿ ಸೂಚಿಸಿದಂತೆ, ಈ ಧಾರ್ಮಿಕ ನಿರಾಶ್ರಿತರಿಗೆ ನಿಯಮಗಳನುಸಾರ ಭಾರತೀಯ ಪೌರತ್ವವನ್ನು ನೀಡಲಾಗುತ್ತದೆ. ಡಿಸೆಂಬರ್ 31, 2014 ರ ಮೊದಲು ಅವರು ಭಾರತದಲ್ಲಿ ಆಶ್ರಯ ಪಡೆದಿರಬೇಕು ಎಂದು ಷರತ್ತು ವಿಧಿಸಲಾಗಿದೆ. ಯಾವ ದೇಶದಿಂದ ವಲಸೆ ಬಂದ ಬಗ್ಗೆ ಮಾಹಿತಿ, ಅದರ ದಾಖಲೆ, ಜಾತಿ ಪ್ರಮಾಣಪತ್ರ, ಫೋಟೋವನ್ನು ಆನ್​ಲೈನ್​ ಮೂಲಕ ಅರ್ಜಿ ಸಮೇತ ಸಲ್ಲಿಸಬೇಕು. ಬಳಿಕ ಪೌರತ್ವ ಸಮಿತಿಯ ಮುಂದೆ ಖುದ್ದಾಗಿ ಹಾಜರಾಗಬೇಕು. ಇಲ್ಲವಾದಲ್ಲಿ ಕೋರಿಕೆ ತಿರಸ್ಕೃತವಾಗಲಿದೆ.

ಪೌರತ್ವಕ್ಕೆ ನಿಯಮಗಳಿವು:

• ಭಾರತೀಯ ಮೂಲದ ವ್ಯಕ್ತಿ
• ಭಾರತದ ಪ್ರಜೆಯನ್ನು ವಿವಾಹವಾದ ವ್ಯಕ್ತಿ
• ಭಾರತೀಯ ಪ್ರಜೆಯ ಅಪ್ರಾಪ್ತ ಮಗು
• ಪೋಷಕರು ಭಾರತೀಯ ನಾಗರಿಕತ್ವದ ವ್ಯಕ್ತಿ
• ಪೋಷಕರು ಅಥವಾ ವ್ಯಕ್ತಿಯು ಸ್ವತಂತ್ರ ಭಾರತದ ನಾಗರಿಕ
• ಭಾರತದ ಸಾಗರೋತ್ತರ ನಾಗರಿಕರಾಗಿ ನೋಂದಾಯಿಸಲ್ಪಟ್ಟ ವ್ಯಕ್ತಿ
• ನೈಸರ್ಗಿಕವಾಗಿ ಪೌರತ್ವವನ್ನು ಬಯಸುವ ವ್ಯಕ್ತಿ (5 ವರ್ಷಗಳಿಂದ ಭಾರತದ ಸಾಗರೋತ್ತರ ಪ್ರಜೆಯಾಗಿ ನೋಂದಾಯಿಸಲ್ಪಟ್ಟ ವ್ಯಕ್ತಿ ಅಥವಾ ಭಾರತದಲ್ಲಿ ಒಂದು ವರ್ಷದಿಂದ ವಾಸಿಸುತ್ತಿರುವವರು)

ದಾಖಲೆಗಳು ಏನಿರಬೇಕು?:

• ಅಫ್ಘಾನಿಸ್ತಾನ, ಬಾಂಗ್ಲಾದೇಶ ಅಥವಾ ಪಾಕಿಸ್ತಾನ ಸರ್ಕಾರದಿಂದ ನೀಡಲಾದ ಪಾಸ್‌ಪೋರ್ಟ್‌ನ ನಕಲು
• ಈ ದೇಶಗಳಲ್ಲಿ ಸರ್ಕಾರದಿಂದ ನೀಡಿದ ಜನ್ಮ ಪ್ರಮಾಣಪತ್ರ
• ಶಾಲೆ/ಕಾಲೇಜು/ಬೋರ್ಡ್ ಅಥವಾ ವಿಶ್ವವಿದ್ಯಾನಿಲಯದ ಪ್ರಮಾಣ ಪತ್ರ
• ಸರ್ಕಾರಿ ಅಧಿಕಾರಿಗಳು ನೀಡಿದ ಯಾವುದೇ ರೀತಿಯ ಗುರುತಿನ ದಾಖಲೆ
• ವಿದೇಶಿಯರ ಪ್ರಾದೇಶಿಕ ನೋಂದಣಿ ಅಧಿಕಾರಿ ಅಥವಾ ಭಾರತದಲ್ಲಿ ವಿದೇಶಿಯರ ನೋಂದಣಿ ಅಧಿಕಾರಿ ನೀಡಿದ ವಸತಿ ಪರವಾನಗಿ
• ಈ ಮೂರು ದೇಶಗಳಲ್ಲಿ ಸರ್ಕಾರಿ ಅಧಿಕಾರಿಗಳು ನೀಡಿದ ಯಾವುದಾದರೂ ಪರವಾನಗಿ ದಾಖಲೆ
• ಈ ದೇಶಗಳಲ್ಲಿ ಇರುವ ಭೂಮಿ ಅಥವಾ ಹಿಡುವಳಿ ದಾಖಲೆಗಳು
• ಅರ್ಜಿದಾರರ ಪೋಷಕರು ಅಥವಾ ಅಜ್ಜಿಯರು ಅಥವಾ ಮುತ್ತಜ್ಜಿಯರು ಸೂಚಿಸಿದ ದೇಶಗಳ ನಾಗರಿಕರು ಎಂದು ತೋರಿಸುವ ಯಾವುದೇ ದಾಖಲೆ.

ಇದನ್ನೂ ಓದಿ: ಸಿಎಎ ಜಾರಿಯಾದ ಮರುದಿನವೇ ತಡೆ ಕೋರಿ ಸುಪ್ರೀಂಕೋರ್ಟ್​ಗೆ ಅರ್ಜಿ ಸಲ್ಲಿಸಿದ ಮುಸ್ಲಿಂ ಲೀಗ್​