ತಿರುವನಂತಪುರಂ: ವಯನಾಡ್ ಲೋಕಸಭಾ ಕ್ಷೇತ್ರ ಮತ್ತು ಚೆಲಕ್ಕರ ವಿಧಾನಸಭಾ ಕ್ಷೇತ್ರಗಳ ಉಪಚುನಾವಣೆಗಾಗಿ ಮತದಾನ ನಡೆಯುತ್ತಿರುವ ಮಧ್ಯೆ ಕೇರಳದಲ್ಲಿ ಹಿರಿಯ ಸಿಪಿಐ(ಎಂ) ನಾಯಕ ಇ.ಪಿ.ಜಯರಾಜನ್ ಅವರ ಇನ್ನೂ ಪ್ರಕಟವಾಗದ ಆತ್ಮಚರಿತ್ರೆಯು ಹೊಸ ವಿವಾದ ಸೃಷ್ಟಿಸಿದೆ. ಇಂದು ಬೆಳಗ್ಗೆ ಕೆಲ ಟಿವಿ ಚಾನೆಲ್ಗಳು ಇ.ಪಿ. ಜಯರಾಜನ್ ಅವರ ಆತ್ಮಚರಿತ್ರೆಯ ಭಾಗವೆಂದು ಹೇಳಲಾದ ಕೆಲ ಮಾಹಿತಿಗಳನ್ನು ಪ್ರಸಾರ ಮಾಡಿವೆ. ಎಲ್ಡಿಎಫ್ ಸರ್ಕಾರ ಮತ್ತು ಮಾರ್ಕ್ಸ್ವಾದಿ ಪಕ್ಷದ ಬಗ್ಗೆ ಆತ್ಮಚರಿತ್ರೆಯಲ್ಲಿ ಟೀಕೆ ಮಾಡಲಾಗಿದೆ ಎಂದು ಈ ಮಾಹಿತಿಗಳು ಬಿಂಬಿಸಿವೆ.
ಉಪಚುನಾವಣೆಯ ಮತದಾನದ ಮಧ್ಯದಲ್ಲೇ ವಿವಾದ ಸೃಷ್ಟಿಯಾದ ಬೆನ್ನಲ್ಲೇ ಈ ಕುರಿತು ಪ್ರತಿಕ್ರಿಯಿಸಿದ ಜಯರಾಜನ್, ತಮ್ಮ ಆತ್ಮಚರಿತ್ರೆಯಲ್ಲಿ ಅಂಥ ಯಾವುದೇ ಮಾತುಗಳಿಲ್ಲ ಮತ್ತು ಟಿವಿಯಲ್ಲಿ ತೋರಿಸಿರುವುದನ್ನು ತಾವು ಬರೆದಿಲ್ಲ ಎಂದು ಸಮಜಾಯಿಷಿ ನೀಡಿದ್ದಾರೆ.
ಕಣ್ಣೂರಿನ ಪ್ರಬಲ ರಾಜಕೀಯ ವ್ಯಕ್ತಿಯಾಗಿರುವ ಜಯರಾಜನ್ ತಮ್ಮ ಆತ್ಮಚರಿತ್ರೆಯಲ್ಲಿ ತಮ್ಮನ್ನು ಎಲ್ಡಿಎಫ್ ಸಂಚಾಲಕ ಸ್ಥಾನದಿಂದ ತೆಗೆದುಹಾಕಿದ ಪಕ್ಷದ ನಿರ್ಧಾರದ ಬಗ್ಗೆ ಮತ್ತು ಪಾಲಕ್ಕಾಡ್ನಲ್ಲಿ ಎಲ್ಡಿಎಫ್ ಸ್ವತಂತ್ರ ಅಭ್ಯರ್ಥಿಯಾಗಿ ಮಾಜಿ ಕೆಪಿಸಿಸಿ ಡಿಜಿಟಲ್ ಮಾಧ್ಯಮ ಸಂಚಾಲಕ ಪಿ ಸರಿನ್ ಅವರಿಗೆ ಟಿಕೆಟ್ ನೀಡಿದ್ದಕ್ಕಾಗಿ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ ಎಂದು ಸ್ಥಳೀಯ ಮಾಧ್ಯಮಗಳು ಪ್ರಸಾರ ಮಾಡಿದ ಅಪ್ರಕಟಿತ ಪುಸ್ತಕದ ಭಾಗಗಳು ತೋರಿಸಿವೆ.
'ಕಟ್ಟನ್ ಛಾಯಾಯುಂ ಪರಿಪ್ಪುವದಯಂ: ದಿ ಲೈಫ್ ಆಫ್ ಎ ಕಮ್ಯುನಿಸ್ಟ್' ಎಂಬ ಶೀರ್ಷಿಕೆಯ ಈ ಪುಸ್ತಕವನ್ನು ಪ್ರಸಿದ್ಧ ಪ್ರಕಾಶನ ಸಂಸ್ಥೆಯೊಂದು ಪ್ರಕಟಿಸಲಿದೆ ಎಂದು ವರದಿಯಾಗಿದೆ. ಪುಸ್ತಕವನ್ನು ಬುಧವಾರ ಪ್ರಕಟಿಸಲಾಗುವುದು ಎಂದು ಪ್ರಕಾಶನ ಸಂಸ್ಥೆಯು ಈ ಹಿಂದೆ ಘೋಷಿಸಿತ್ತು. ಆದರೆ ಕೆಲ ತಾಂತ್ರಿಕ ಸಮಸ್ಯೆಗಳಿಂದಾಗಿ ಬಿಡುಗಡೆಯನ್ನು ಮುಂದೂಡಲಾಗಿದೆ ಎಂದು ಅದು ಸ್ಪಷ್ಟಪಡಿಸಿದೆ.
ಟಿವಿಯಲ್ಲಿ ತೋರಿಸಲಾದ ಇನ್ನೂ ಪ್ರಕಟಗೊಳ್ಳದ ಆತ್ಮಚರಿತ್ರೆಯ ಭಾಗಗಳು ಎಂದು ಹೇಳಲಾದ ವಿಷಯಗಳನ್ನು ತಿರಸ್ಕರಿಸಿದ ಜಯರಾಜನ್, ತಾವಿನ್ನೂ ಆತ್ಮಚರಿತ್ರೆಯನ್ನು ಬರೆಯುತ್ತಿರುವುದಾಗಿ ಮತ್ತು ಅದು ಇನ್ನೂ ಪೂರ್ಣಗೊಂಡಿಲ್ಲ ಎಂದು ಹೇಳಿದ್ದಾರೆ.
"ಈ ಆಯ್ದ ಭಾಗಗಳು ಆಧಾರರಹಿತ ಅಸಂಬದ್ಧ ವಿಷಯಗಳಾಗಿವೆ. ನಾನು ನನ್ನ ಪುಸ್ತಕದಲ್ಲಿ ಈ ರೀತಿಯದ್ದನ್ನು ಬರೆದಿಲ್ಲ ಮತ್ತು ಆ ರೀತಿಯ ಏನನ್ನೂ ಬರೆಯುವ ಉದ್ದೇಶವನ್ನು ಹೊಂದಿಲ್ಲ" ಎಂದು ಜಯರಾಜನ್ ಮಾಧ್ಯಮಗಳಿಗೆ ತಿಳಿಸಿದರು. ಚುನಾವಣಾ ದಿನದಂದು ಪುಸ್ತಕದ ಈ ಭಾಗಗಳನ್ನು ಬಿಡುಗಡೆ ಮಾಡಿರುವುದು "ಉದ್ದೇಶಪೂರ್ವಕ ನಡೆ" ಎಂದ ಅವರು, ಪ್ರಕಾಶಕರಿಗೆ ಈ ಮಾಹಿತಿಗಳು ಎಲ್ಲಿಂದ ಸಿಕ್ಕವು ಎಂಬುದನ್ನು ತನಿಖೆ ಮಾಡಬೇಕು ಎಂದು ಹೇಳಿದರು.
ಇದನ್ನೂ ಓದಿ : ಶೋಕಾಸ್ ನೋಟಿಸ್ ನೀಡದೆ ಆರೋಪಿಗಳ ಮನೆ ನೆಲಸಮಗೊಳಿಸುವಂತಿಲ್ಲ: 'ಬುಲ್ಡೋಜರ್ ನ್ಯಾಯ'ಕ್ಕೆ ಸುಪ್ರೀಂ ಕೋರ್ಟ್‌ ಕಡಿವಾಣ
