ಡೊನಾಲ್ಡ್​ ಟ್ರಂಪ್​​ಗಾಗಿ ದೇವಸ್ಥಾನ ಕಟ್ಟಿಸಿರುವ ಭಾರತದ ಅಭಿಮಾನಿ: ಅದು ಎಲ್ಲಿದೆ ಗೊತ್ತಾ?

ಸಪ್ತಸಾಗರದಾಚೆ ಇರುವ ಅಮೆರಿಕಕ್ಕೆ ಡೊನಾಲ್ಡ್​ ಟ್ರಂಪ್​ ಹೊಸ ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದಾರೆ. ಇತ್ತ ಭಾರತದಲ್ಲಿ ಅಭಿಮಾನಿಯೊಬ್ಬ ಟ್ರಂಪ್​​ಗಾಗಿ ದೇವಸ್ಥಾನವನ್ನೇ ಕಟ್ಟಿಸಿದ್ದಾನೆ. ಅದು ಎಲ್ಲಿದೆ ಎಂಬ ಮಾಹಿತಿ ಇಲ್ಲಿದೆ.

ಹೈದರಾಬಾದ್​: ಪ್ರಬಲ ಪೈಪೋಟಿ ನೀಡಿದ್ದ ಕಮಲಾ ಹ್ಯಾರಿಸ್​ ಅವರನ್ನು ಸೋಲಿಸಿ ಅಮೆರಿಕದ ಅಧ್ಯಕ್ಷರಾಗಿ ಡೊನಾಲ್ಡ್​ ಟ್ರಂಪ್ ಎರಡನೇ ಬಾರಿಗೆ ಆಯ್ಕೆಯಾಗಿದ್ದಾರೆ. ಜನವರಿ 20 ರಂದು ಅಧ್ಯಕ್ಷರಾಗಿ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ. ಇದರ ನಡುವೆ, ತೆಲಂಗಾಣದಲ್ಲಿ ಟ್ರಂಪ್​ಗಾಗಿಯೇ ಅಭಿಮಾನಿಯೊಬ್ಬರು ದೇವಸ್ಥಾನ ಕಟ್ಟಿಸಿದ್ದಾರೆ ಎಂಬುದು ಮುನ್ನೆಲೆಗೆ ಬಂದಿದೆ.

ವಾರಂಗಲ್ ಜಿಲ್ಲೆಯಲ್ಲಿ ಡೊನಾಲ್ಡ್ ಟ್ರಂಪ್​​ರ ದೇವಸ್ಥಾನವಿದೆ. ಜನಗಾಮ ಜಿಲ್ಲೆಯ ಬಚ್ಚನ್ನಪೇಟೆ ಮಂಡಲದ ಕೊನ್ನೆ ಗ್ರಾಮದ ಬುಸ್ಸಾ ರಾಮುಲು ಮತ್ತು ಸಾವಿತ್ರಿ ದಂಪತಿಯ ಪುತ್ರ ಕೃಷ್ಣ ಅವರು ಈ ದೇವಸ್ಥಾನದ ರೂವಾರಿ. ಕೃಷ್ಣ ಟ್ರಂಪ್​​ರ ಕಟ್ಟಾ ಅಭಿಮಾನಿ. ಹೀಗಾಗಿ, ಅವರ ವಿಗ್ರಹವನ್ನು ಕೆತ್ತಿಸಿ, ಗುಡಿಯನ್ನೇ ನಿರ್ಮಿಸಿದ್ದಾರೆ.

ಅಭಿಮಾನಿಯ ಭೇಟಿಗೆ ಒಪ್ಪಿದ್ದ ಟ್ರಂಪ್​: ವೀರಾಭಿಮಾನಿ ಕೃಷ್ಣ ಅವರು ಡೊನಾಲ್ಡ್​ ಟ್ರಂಪ್​ರನ್ನು ಮುಖತಃ ಭೇಟಿ ಮಾಡುವ ಇಚ್ಚೆ ಹೊಂದಿದ್ದರು. 2019 ರಲ್ಲಿ ಈ ಲಕ್​ ಕುದುರಿತ್ತು. ಎಕ್ಸ್​ (ಟ್ವಿಟರ್‌) ಖಾತೆಯಲ್ಲಿ ಪೋಸ್ಟ್ ಹಂಚಿಕೊಂಡು, "ನಾನು ನಿಮ್ಮ ಅಭಿಮಾನಿ. ನಿಮ್ಮನ್ನು ಭೇಟಿಯಾಗಲು ಬಯಸುತ್ತೇನೆ" ಎಂದು ಕೃಷ್ಣ ಬರೆದುಕೊಂಡು ಟ್ರಂಪ್​ಗೆ ಟ್ಯಾಗ್​ ಮಾಡಿದ್ದರು. ಇದಕ್ಕೆ ಮಾಜಿ ಅಧ್ಯಕ್ಷ ಪ್ರತಿಕ್ರಿಯಿಸಿ, ‘ಓಕೆ’ ಎಂದು ರೀಟ್ವೀಟ್ ಮಾಡಿದ್ದರು. ಇದು ಕೃಷ್ಣ ಅವರ ಸಂತೋಷಕ್ಕೆ ಪಾರವೇ ಇಲ್ಲದಾಗಿತ್ತು.

ಬಳಿಕ ಅಭಿಮಾನದ ಪರಾಕಾಷ್ಟೆಯಿಂದಾಗಿ ಕೃಷ್ಣ ಅವರು, 2020ರ ಫೆಬ್ರವರಿಯಲ್ಲಿ ಟ್ರಂಪ್​​ಗಾಗಿ ದೇವಾಲಯವನ್ನು ನಿರ್ಮಿಸಿದ್ದಾರೆ. ಅದರಲ್ಲಿ ಟ್ರಂಪ್ ಅವರ ಪ್ರತಿಮೆಯನ್ನು ಸ್ಥಾಪಿಸಲಾಗಿದೆ. ನೀಲಿ ಸೂಟ್ ಧರಿಸಿ, ಥಂಬ್ಸ್​​ ಅಪ್​ ತೋರಿಸಿದ ನಿಂತ ಭಂಗಿಯಲ್ಲಿ ವಿಗ್ರಹವಿದೆ. 2020 ರಲ್ಲಿ ಟ್ರಂಪ್ ಎರಡನೇ ಬಾರಿ ಚುನಾವಣೆಯಲ್ಲಿ ಸೋತ ನಂತರ, ಕೃಷ್ಣ ತೀವ್ರ ಖಿನ್ನತೆಗೆ ಒಳಗಾಗಿದ್ದರು. ಬಳಿಕ ಅವರು, ಅಕ್ಟೋಬರ್ 11, 2020 ರಂದು ಹೃದಯಾಘಾತದಿಂದ ನಿಧನರಾದರು.

ಇತ್ತೀಚೆಗೆ ಮುಗಿದ ಚುನಾವಣೆಯಲ್ಲಿ ಡೊನಾಲ್ಡ್​​ ಟ್ರಂಪ್ ಗೆಲುವು ಸಾಧಿಸಿದ್ದಾರೆ. ಆದರೆ, ಅವರ ಅಭಿಮಾನಿ ಕೃಷ್ಣ ಈ ಸಂಭ್ರಮ ಹಂಚಿಕೊಳ್ಳಲು ಇಲ್ಲ. ಅವರ ಸ್ನೇಹಿತರು ಟ್ರಂಪ್ ಪ್ರತಿಮೆಯನ್ನು ಸ್ವಚ್ಚ ಮಾಡಿ ಪುಷ್ಪಾರ್ಚನೆ ಮಾಡಿದ್ದಾರೆ. ಈ ವೇಳೆ ಕೃಷ್ಣ ಅವರು ಇದ್ದಿದ್ದರೆ ತುಂಬಾ ಖುಷಿ ಪಡುತ್ತಿದ್ದರು ಎನ್ನುತ್ತಾರೆ ಗ್ರಾಮಸ್ಥರು.

ಅಮೆರಿಕದಲ್ಲಿ ವರಂಗಲ್​ ಜಿಲ್ಲೆಯವರು: ವಿಶೇಷವೆಂದರೆ, ವಾರಂಗಲ್​ ಜಿಲ್ಲೆಯ 25 ಸಾವಿರಕ್ಕೂ ಅಧಿಕ ಮಂದಿ ಅಮೆರಿಕದಲ್ಲಿ ನೆಲೆಸಿದ್ದಾರೆ ಎಂದು ಅಂದಾಜಿಸಲಾಗಿದೆ. ಹೆಚ್ಚಾಗಿ ಅಟ್ಲಾಂಟಾ, ಕ್ಯಾಲಿಫೋರ್ನಿಯಾ, ನ್ಯೂಜೆರ್ಸಿ, ಟೆಕ್ಸಾಸ್ ಮತ್ತು ಡಲ್ಲಾಸ್‌ನಲ್ಲಿ ವಾಸಿಸುತ್ತಿದ್ದಾರೆ. ಚುನಾವಣಾ ಫಲಿತಾಂಶದ ಬಗ್ಗೆ ಅಲ್ಲಿನ ತೆಲುಗು ಮೂಲದ ಜನರನ್ನು ಈಟಿವಿ ಭಾರತ್​​ ಮಾಹಿತಿ ಸಂಗ್ರಹಿಸಿದ್ದು, ಟ್ರಂಪ್​​ ಪರ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಭಾರತೀಯ ವಿದ್ಯಾರ್ಥಿಗಳು ಮತ್ತು ಉದ್ಯೋಗಿಗಳಿಗೆ ಟ್ರಂಪ್​ ಭರವಸೆ ನೀಡಿದ್ದಾರೆ. ಭಾರತೀಯ ಮೂಲದವರ ಭವಿಷ್ಯ ಉತ್ತಮವಾಗಿರಲಿದೆ ಎಂಬ ವಿಶ್ವಾಸದಲ್ಲಿದ್ದಾರೆ.

ಇದನ್ನೂ ಓದಿ: ಅಮೆರಿಕ ಚುನಾವಣೆಯಲ್ಲಿ ಮಾಜಿ ಅಧ್ಯಕ್ಷ​​ ಗೆಲ್ಲಲು ಕಾರಣಗಳಿವು: ಡೊನಾಲ್ಡ್​ 'ಟ್ರಂಪ್​ ಕಾರ್ಡ್​' ಏನು?