ಬಹುನಿರೀಕ್ಷಿತ ಸಚಿವ ಸಂಪುಟ ವಿಸ್ತರಣೆ: 'ಕಮಲ'ದಲ್ಲಿ ಅಸಮಾಧಾನದ ಬೇಗುದಿ

ಬೆಂಗಳೂರು: ಬರೋಬ್ಬರಿ 14 ತಿಂಗಳ ನಂತರ ಹಗ್ಗಜಗ್ಗಾಟದ ನಡುವೆ ರಾಜ್ಯದ ಬಹು ನಿರೀಕ್ಷಿತ ಸಚಿವ ಸಂಪುಟ ವಿಸ್ತರಣೆ ನಡೆದಿದೆ. ಏಳು ಶಾಸಕರು ಪ್ರಮಾಣ ವಚನ ಸ್ವೀಕರಿಸುವ ಮೂಲಕ ಮುಖ್ಯಮಂತ್ರಿ ಬಿ.ಎಸ್​.ಯಡಿಯೂರಪ್ಪನವರ ಸಂಪುಟ ಸೇರಿ ಮಂತ್ರಿಪಟ್ಟ ಅಲಂಕರಿಸಿದರು. ಆದರೆ, ಇಷ್ಟು ದಿನ ಮಂತ್ರಿ ಪಟ್ಟ ದೊರೆಯುತ್ತದೆಂಬ ಮಹಾದಾಸೆಯಲ್ಲಿದ್ದ 12ಕ್ಕೂ ಅಧಿಕ ಶಾಸಕರ ಅಸಮಾಧಾನದ ಸ್ಫೋಟ ಭುಗಿಲೆದ್ದಿದೆ. ಯೋಗೇಶ್ವರ್​ಗೆ ಮಂತ್ರಿ ಸ್ಥಾನ ಕೊಟ್ಟಿದ್ಯಾಕೆ ಎಂದು ಹೆಚ್​.ವಿಶ್ವನಾಥ್​ ಗುಡುಗಿದರೆ, ಹಿರಿಯರಿಗೆ ಬೆಲೆನೇ ಇಲ್ವಾ ಎಂದು ತಿಪ್ಪಾರೆಡ್ಡಿ ಕಿಡಿಕಾರಿದ್ದಾರೆ. ಹಾಗೆಯೇ ಎಂ.ಪಿ.ರೇಣುಕಾಚಾರ್ಯ, ಮಹೇಶ್​ ಕುಮಟಳ್ಳಿ ಸೇರಿದಂತೆ ಹಲವರು ಕೆಂಡಾಮಂಡಲರಾಗಿದ್ದಾರೆ.