ಗುಜರಾತ್​ನಲ್ಲಿ ಧಾರಾಕಾರ ಮಳೆ: ಹೆಲಿಕಾಪ್ಟರ್​ ಮೂಲಕ ಪ್ರವಾಹದಲ್ಲಿ ಸಿಲುಕಿದ್ದ ಇಬ್ಬರು ರೈತರ ರಕ್ಷಣೆ

ಜುನಾಗಢ(ಗುಜರಾತ್​) : ಗುಜರಾತ್​ನಲ್ಲಿ ಧಾರಾಕಾರ ಮಳೆಯಾಗುತ್ತಿದ್ದು, ಜನಜೀವನ ಅಸ್ತವ್ಯಸ್ತಗೊಂಡಿದೆ. ರಾಜ್ಯದ ಹಲವೆಡೆ ಮಾನ್ಸೂನ್​ ಅಬ್ಬರ ಮುಂದುವರೆದಿದ್ದು, ಕೆಲವು ಗ್ರಾಮಗಳು ಜಲಾವೃತಗೊಂಡಿವೆ. ಕಳೆದ 24 ಗಂಟೆಯಿಂದ ಗುಜರಾತ್​ನಲ್ಲಿ ಭಾರಿ ಮಳೆಯಾಗುತ್ತಿದೆ. ಮುಂದಿನ 58 ಗಂಟೆಗಳಲ್ಲಿ ಭಾರಿ ಮಳೆಯಾಗಲಿದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.

ಭಾರಿ ಮಳೆಯಿಂದಾಗಿ ಇಲ್ಲಿನ ಸುತ್ರೇಜ್ ಗ್ರಾಮಕ್ಕೆ ಮಳೆ ನೀರು ನುಗ್ಗಿ ಜಮೀನುಗಳು ಜಲಾವೃತಗೊಂಡಿವೆ. ಈ ವೇಳೆ ಜಮೀನಿನಲ್ಲಿದ್ದ  ಇಬ್ಬರು ರೈತರು ಪ್ರಾಣ ಉಳಿಸಿಕೊಳ್ಳಲು ಲೈಟ್​ ಕಂಬ ಏರಿ ಕುಳಿತಿದ್ದಾರೆ. ಕಳೆದ ಎಂಟು ಗಂಟೆಗಳಿಂದ ನೀರಿನ ಪ್ರವಾಹದಲ್ಲಿ ಸಿಲುಕಿದ್ದ ಇಬ್ಬರು ರೈತರನ್ನು ಹೆಲಿಕಾಪ್ಟರ್ ಮೂಲಕ ರಕ್ಷಣೆ ಮಾಡಲಾಗಿದೆ.

ರೈತರು ತಮ್ಮ ಹೊಲದಲ್ಲಿ ಕೆಲಸ ಮಾಡುತ್ತಿದ್ದಾಗ ಜಮೀನಿಗೆ ಏಕಾಏಕಿ ಮಳೆ ನೀರು ನುಗ್ಗಿದೆ. ಈ ವೇಳೆ, ರೈತರು ಪ್ರಾಣಾಪಾಯದಿಂದ ಪಾರಾಗಲು ಜಮೀನಿನಲ್ಲಿದ್ದ ಲೈಟ್​ ಕಂಬ ಏರಿ ಕುಳಿತಿದ್ದಾರೆ. ಬಳಿಕ ಈ ಬಗ್ಗೆ ಮೊಬೈಲ್​ ಮೂಲಕ ಕುಟುಂಬಸ್ಥರಿಗೆ ಮಾಹಿತಿ ಮುಟ್ಟಿಸಿದ್ದಾರೆ. ಕುಟುಂಬಸ್ಥರ ತಾಲೂಕು ಆಡಳಿತಕ್ಕೆ ಮಾಹಿತಿ ನೀಡಿದ್ದಾರೆ. ಬಳಿಕ ಎನ್​ಡಿಆರ್​ಎಫ್​​ ತಂಡ ರೈತರನ್ನು ರಕ್ಷಿಸಲು ಪ್ರಯತ್ನ ಪಟ್ಟರೂ ಆಗದಿದ್ದಾಗ  ಹೆಲಿಕಾಪ್ಟರ್​ ಮೂಲಕ ಇಬ್ಬರನ್ನೂ ರಕ್ಷಿಸಲಾಗಿದೆ.

ಇದನ್ನೂ ಓದಿ : ಬಿಹಾರ- ಗುಜರಾತ್​ನಲ್ಲಿ ಭಾರಿ ಮಳೆ: ನದಿಯಲ್ಲಿ ಮುಳುಗಿದ 2 ಟ್ರಕ್, ಮಧ್ಯದಲ್ಲಿ ಸಿಲುಕಿದ 28 ಲಾರಿಗಳು​