'ಗದರ್-2' ಸಕ್ಸಸ್ ಪಾರ್ಟಿ​: ಶಾರುಖ್​, ಅಮೀರ್​ ಸೇರಿ ತಾರೆಯರ ಸಮಾಗಮ- ವಿಡಿಯೋ ನೋಡಿ

ವಿಶ್ವಾದ್ಯಂತ ಚಿತ್ರಮಂದಿರಗಳಲ್ಲಿ ಧೂಳೆಬ್ಬಿಸಿರುವ, ಬಾಕ್ಸ್ ಆಫೀಸ್​ನಲ್ಲಿ ಅಭೂತಪೂರ್ವ ಯಶಸ್ಸು ಸಾಧಿಸಿರುವ ಬಾಲಿವುಡ್​ ಸಿನಿಮಾ 'ಗದರ್​ 2'. ಸಿನಿಮಾ ಗೆದ್ದ ಖುಷಿಯಲ್ಲಿ ಚಿತ್ರತಂಡ ಶನಿವಾರ ಸಂಜೆ ಮುಂಬೈನಲ್ಲಿ ಸಕ್ಸಸ್​ ಸೆಲಬ್ರೇಶನ್ ಹಮ್ಮಿಕೊಂಡಿತ್ತು. ಈವೆಂಟ್​ನಲ್ಲಿ ಬಾಲಿವುಡ್​ನ ಗಣ್ಯಾತಿಗಣ್ಯರು ಭಾಗಿಯಾಗಿದ್ದರು. 

'ಜವಾನ್'​ ಮೂಲಕ ಸುದ್ದಿಯಲ್ಲಿರುವ ಬಾಲಿವು​ಡ್​ ನಟ​ ಶಾರುಖ್​ ಖಾನ್ ಅವರು ಪತ್ನಿ ಗೌರಿ ಕೈ ಹಿಡಿದು ಕಾಣಿಸಿಕೊಂಡರೆ, ಅಮೀರ್ ಖಾನ್​​ ಬ್ಲ್ಯಾಕ್​ ಟೀ ಶರ್ಟ್ ಮತ್ತು​ ವೈಟ್​ ಡೆನಿಮ್​ನಲ್ಲಿ ಕೂಲ್​ ಆಗಿ ದರ್ಶನ ಕೊಟ್ಟರು. ಹಿರಿಯ ನಟ ಅನುಪಮ್​ ಖೇರ್​, ನಿರ್ಮಾಪಕ ಸಾಜಿದ್​ ಖಾನ್​​ ಸೇರಿದಂತೆ ಚಿತ್ರರಂಗದ ಯುವನಟರು ಕಾರ್ಯಕ್ರಮದಲ್ಲಿ ಕಂಡುಬಂದರು. 

ಇದನ್ನೂ ಓದಿ: ಹೊಂಬಾಳೆ ಫಿಲ್ಮ್ಸ್​ ನಿರ್ಮಾಣದ 'ಸಲಾರ್'​ ರಿಲೀಸ್​ ಮುಂದೂಡಿಕೆ...ತರಣ್​ ಆದರ್ಶ್​ ಟ್ವೀಟ್​ನಲ್ಲೇನಿದೆ?

ಅನಿಲ್​ ಶರ್ಮಾ ನಿರ್ದೇಶನದ 'ಗದರ್​ 2' ಸಿನಿಮಾ 2001ರ 'ಗದರ್: ಏಕ್​ ಪ್ರೇಮ್​ ಕಥಾ' ಸಿನಿಮಾದ ಮುಂದುವರಿದ ಭಾಗ. ಆಗಸ್ಟ್ 11ರಂದು ತೆರೆಕಂಡ ಸಿನಿಮಾ ಪ್ರೇಕ್ಷಕರ ಮನಮುಟ್ಟುವಲ್ಲಿ ಯಶಸ್ಸು ಕಂಡಿದೆ. ಉತ್ತಮ ಪ್ರದರ್ಶನ ಮುಂದುವರಿಸಿದ್ದು, ಶೀಘ್ರದಲ್ಲೇ ಭಾರತೀಯ ಬಾಕ್ಸ್ ಆಫೀಸ್​ನಲ್ಲಿ 500 ಕೋಟಿ ರೂ. ಕ್ಲಬ್ ಸೇರುವ ನಿರೀಕ್ಷೆ ಇದೆ.