ಮಲಗುವಾಗ ಒಳ ಉಡುಪು ಧರಿಸದೇ ಮಲಗುವುದಕ್ಕೆ ಭಾಗಶಃ ಭಾರತೀಯರು ಒಪ್ಪುವುದಿಲ್ಲ. ಕಾರಣ, ಇದೊಂದು ಪಾಶ್ಚಿಮಾತ್ಯ ಶೈಲಿ ಎಂಬ ಭಾವನೆ. ಹೀಗಾಗಿ ಹೆಚ್ಚಿನ ಜನ ಒಳುಡುಪುಗಳನ್ನು ಧರಿಸಿಯೇ ನಿದ್ರಿಸುತ್ತಾರೆ. ಇದಕ್ಕೆ ಒಂದೆರಡು ಕಾರಣಗಳಲ್ಲ. ಕಾರಣ ಹಲವಿರಬಹುದು. ಆದ್ರೆ ಒಳ ಉಡುಪು ಧರಿಸದೇ ಆರಾಮವಾಗಿ ಮಲಗುವುದರಿಂದ ದೇಹಕ್ಕೆ ತುಂಬಾ ಅನುಕೂಲವಿದೆ ಎಂಬುದನ್ನು ಒಪ್ಪಲೇಬೇಕು.
ಸಾಮಾನ್ಯವಾಗಿ, ಒಳ ಉಡುಪು ಧರಿಸದೇ ಮಲಗುವುದು ಎಂಬ ಕಲ್ಪನೆಯನ್ನೇ ಒಪ್ಪಿಕೊಳ್ಳಲು ಹಲವು ಭಾರತೀಯರು ಸಿದ್ಧರಿಲ್ಲ. ಬೆತ್ತಲೆಯಾಗಿ ಮಲಗುವುದು ಸಂಪೂರ್ಣ ಖಾಸಗಿ ವಿಚಾರವೆಂದು ಪರಿಗಣಿಸುವ ನಾವು, ಬಟ್ಟೆ ಇಲ್ಲದೇ ಮಲಗುವ ಬಗ್ಗೆ ಯೋಚನೆ ಮಾಡುವುದೇ ಕಡಿಮೆ. ಎಲ್ಲಿಯವರೆಗೆ ಎಂದರೆ, ಒಬ್ಬರೇ ಇದ್ದರೂ ಕೂಡಾ ಒಳ ಉಡುಪು ಧರಿಸಿ ಮಲಗುವವರೇ ಹೆಚ್ಚು. ಇದಕ್ಕೆ ಕಾರಣ ನಾವು ಬೆಳೆದು ಬಂದ ರೀತಿ. ಸಾಮಾನ್ಯವಾಗಿ ದೊಡ್ಡ ದೊಡ್ಡ ಅವಿಭಕ್ತ ಕುಟುಂಬಗಳಲ್ಲಿ ಸಹೋದರರೊಂದಿಗೆ ಹುಟ್ಟಿ ಬೆಳೆದವರು ನಮ್ಮಲ್ಲಿ ಹೆಚ್ಚು. ಹೀಗಾಗಿ ಮುಜುಗರ ಅಥವಾ ಸಮಾಜಮುಖಿ ಯೋಚನೆಯಿಂದಾಗಿ, ಒಳ ಉಡುಪು ಧರಿಸದೇ ಮಲಗುವ ಬಗ್ಗೆ ಹಲವರು ಯೋಚನೆಯೇ ಮಾಡುವುದಿಲ್ಲ.
ಬಟ್ಟೆ ಹಾಕಿಕೊಂಡು ಮಲಗುವುದು ಅಥವಾ ಇಲ್ಲದೇ ಮಲಗುವುದನ್ನು ಆಯ್ಕೆ ಮಾಡಿಕೊಳ್ಳುವುದು ವೈಯಕ್ತಿಕ ವಿಚಾರ. ಆದರೂ ಬಟ್ಟೆ ಹಾಕಿಕೊಳ್ಳದೇ ಮಲಗುವುದು ಆರೋಗ್ಯದ ದೃಷ್ಟಿಯಿಂದ ಒಳ್ಳೆಯದು ಎಂಬುದು ತಿಳಿದುಕೊಳ್ಳಬೇಕಾದ ಅಂಶ. ಬಟ್ಟೆ ಹಾಕದೇ ನಿದ್ರಿಸುವುದು ಉತ್ತಮ ಎಂದು ಹಲವು ತಜ್ಞರು ಪ್ರತಿಪಾದಿಸಿದ್ದು, ಈ ಬಗ್ಗೆ ತಜ್ಞರ ಅಭಿಪ್ರಾಯಗಳನ್ನಾಧರಿಸಿ ಕೆಲವೊಂದು ಆರೋಗ್ಯಕರ ಟಿಪ್ಸ್ ಇಲ್ಲಿದೆ ನೋಡಿ.
ಮಲಗುವ ಸಮಯದಲ್ಲಿ ನಿಮ್ಮ ಎಲ್ಲ ಬಟ್ಟೆಗಳು ತೆಗೆದು ನಿದ್ರಿಸುವುದರಿಂದ ನಿಮ್ಮ ಆರೋಗ್ಯಕ್ಕೆ ಬಹು ಆಯಾಮದ ಪ್ರಯೋಜನಗಳಿವೆ. ಮಹಿಳೆಯರಿಗೆ ಯೋನಿ ಅಥವಾ ಜನನಾಂಗದ ಸಮಸ್ಯೆಗಳಿದ್ದರೆ ಒಳ ಉಡುಪು ಧರಿಸದೇ ಮಲಗುವುದು ಬಹಳ ಉತ್ತಮ.
ಗಾಳಿಯ ಮುಕ್ತ ಹರಿವಿಗೆ ಅವಕಾಶ...
ಒಳ ಉಡುಪು ಧರಿಸಿ ಮಲಗಿದಾಗ ಆ ಬಟ್ಟೆ ಜನನಾಂಗಗಳಿಗೆ ಒತ್ತಿದರೆ, ಅದು ತುಂಬಾ ಅಹಿತಕರವಾಗಿರುತ್ತದೆ. ಅಷ್ಟೇ ಅಲ್ಲ, ಒಳ ಉಡುಪು ಅಥವಾ ಪ್ಯಾಂಟಿಯ ಸಿಂಥೆಟಿಕ್ ಫ್ಯಾಬ್ರಿಕ್, ಯೋನಿಯ ಸರಾಗ ಉಸಿರಾಟಕ್ಕೆ ಅಡ್ಡಿಪಡಿಸುತ್ತದೆ. ಅಲ್ಲದೇ ಬಟ್ಟೆ ಇದ್ದರೆ, ಅದು ಯೋನಿಯ ತೇವಾಂಶವನ್ನು ಹೋಗಲಾಡಿಸಲು ಅವಕಾಶ ನೀಡುವುದಿಲ್ಲ. ಒಂದು ರೀತಿಯ ದ್ರವವನ್ನು ಸ್ರವಿಸುವ ಮೂಲಕ ಯೋನಿಯು ತನ್ನನ್ನು ತಾನೇ ಸ್ವಚ್ಛಗೊಳಿಸುತ್ತದೆ ಮತ್ತು ಅದು ಹಾಕಿರುವ ಒಳ ಉಡುಪುಗಳನ್ನು ಇಡೀ ದಿನ ಒದ್ದೆಯಾಗಿರುವಂತೆ ಮಾಡುತ್ತದೆ. ಹೀಗಾಗಿ ಸೋಂಕುಗಳಿಗೆ ಕಾರಣವಾಗುವ ತೇವಾಂಶವು ಆ ಭಾಗದಲ್ಲಿ ಇರದಂತೆ ಸ್ವಲ್ಪ ಉಸಿರಾಟದ ಸಮಯವನ್ನು ಅನುಮತಿಸುವುದು ಬಹಳ ಮುಖ್ಯ. ಹೀಗಾಗಿ ಒಳ ಉಡುಪು ಧರಿಸದೇ ಮಲಗುವ ಸಮಯದಲ್ಲಾದರೂ ಯೋನಿಯ ಉಸಿರಾಟಕ್ಕೆ ಅವಕಾಶ ಮಾಡಿಕೊಡುವುದು ಉತ್ತಮ ಎಂದು ನ್ಯೂಯಾರ್ಕ್ ಮೂಲದ OB/GYN ಎಂಡಿ ಆಗಿರುವ ಕಮೀಲಾ ಫಿಲಿಪ್ಸ್ ಹೇಳುತ್ತಾರೆ.
ಸುಖನಿದ್ರೆಗೆ ಸಹಕಾರಿ...
ಮಲಗುವಲ್ಲಿ ಮತ್ತು ಸುಖನಿದ್ರೆಗೆ ಜಾರುವಲ್ಲಿ ದೇಹದ ಉಷ್ಣತೆ ಪ್ರಮುಖ ಪಾತ್ರ ವಹಿಸುತ್ತದೆ. ನ್ಯಾಷನಲ್ ಸೆಂಟರ್ ಆಫ್ ಬಯೋಟೆಕ್ನಾಲಜಿ ಇನ್ಫಾರ್ಮೇಶನ್ (NCBI) ನ 2012 ರ ಅಧ್ಯಯನದ ಪ್ರಕಾರ, ದೇಹವು ಶಾಖಕ್ಕೆ ಒಡ್ಡಿಕೊಂಡತೆ ನಿದ್ರೆಯೂ ಹಾಳಾಗುತ್ತದೆ ಎಂದು ಬಹಿರಂಗಪಡಿಸಿದೆ. ಹೀಗಾಗಿ ಆ ಕ್ಷಣದಲ್ಲೇ ಒಳ ಉಡುಪುಗಳನ್ನು ಕಿತ್ತೆಸೆಯುವುದು ದೇಹವನ್ನು ತಂಪಾಗಿಸಲು ಸಹಾಯ ಮಾಡುತ್ತದೆ. ಒಳ ಉಡುಪು ತೆಗೆದರೆ, ಆ ಕ್ಷಣವೇ ನೀವು ಸುಖನಿದ್ರೆ ಜಾರಬಹುದು. ನಿದ್ರೆ ಮಾಡಲು ದೇಹದ ಸಮಾನ್ಯ ತಾಪಮಾನವು 60-65 ಡಿಗ್ರಿಗಳಾಗಿರಬೇಕು. ಆದರೆ, ಬೇಸಿಗೆಯಲ್ಲಿ ಇದು ಕಷ್ಟ. ಆದ್ದರಿಂದ ನಿದ್ರೆಗೂ ಮುನ್ನ ಒಳ ಉಡುಪುಗಳನ್ನು ತೆಗೆದು ಬೆತ್ತಲೆಯಾಗಿ ಮಲಗುವುದು ಸೂಕ್ತ. ಇದರಿಂದ ದೇಹದ ಆರೋಗ್ಯದ ಜೊತೆಗೆ ಸುಖನಿದ್ರೆಗೆ ಜಾರೋದು ಪಕ್ಕಾ.
ಜನನಾಂಗ ಸೋಂಕಿನ ಅಪಾಯವನ್ನು ಕಡಿಮೆ ಮಾಡುತ್ತದೆ
ಗಾಳಿಯ ಮುಕ್ತ ಹರಿವನ್ನು ತಡೆಯುವ ಬಟ್ಟೆಗಳಿಂದ ಮಾಡಿದ ಬಿಗಿಯಾದ ಒಳ ಉಡುಪನ್ನು ಧರಿಸಿದಾಗ, ಗುಪ್ತಾಂಗಗಳು ಬೆಚ್ಚಗಿರುತ್ತದೆ ಮತ್ತು ತೇವಾಂಶದಿಂದ ಕೂಡಿರುತ್ತದೆ. ಇದು ಯೋನಿಯಲ್ಲಿ ಬ್ಯಾಕ್ಟೀರಿಯಾಗಳ ಬೆಳವಣಿಗೆಗೆ ಕಾರಣವಾಗುತ್ತದೆ. ಇದೇ ಬ್ಯಾಕ್ಟೀರಿಯಾ ಯೋನಿಯ ಸೋಂಕಿಗೂ(yeast infection) ಕಾರಣವಾಗುತ್ತದೆ ಎಂದು ತಜ್ಞರು ಹೇಳುತ್ತಾರೆ. ಹೀಗಾಗಿ ಗಾಳಿಯ ಮುಕ್ತ ಹರಿವಿಗೆ ಅನುಮತಿಸುವುದು ತುಂಬಾ ಮುಖ್ಯ. ಏಕೆಂದರೆ ಇದು ಒಳ ಉಡುಪುಗಳಿಂದ ಉಂಟಾಗುವ ತೇವಾಂಶದಿಂದ ಯೋನಿಯ ಸೋಂಕು ಮತ್ತು ಯೋನಿಯ ಹೊರಪದರದಲ್ಲಾಗುವ ಕಿರಿಕಿರಿಯನ್ನು ತಡೆಯುತ್ತದೆ ಎಂದು ಲೈಂಗಿಕ ಆರೋಗ್ಯ ತಜ್ಞ ಸಿಂಡಿ ಬಾರ್‌ಶಾಪ್ ಹೇಳುತ್ತಾರೆ. ಒಂದು ವೇಳೆ ಯೋನಿಯ ಸೋಂಕು ಇದ್ದು ಬೆತ್ತಲೆಯಾಗಿ ಮಲಗಲು ಕಷ್ಟವಾದರೆ, ಸಡಿಲವಾದ ಪೈಜಾಮಾ ಅಥವಾ ಸ್ಕರ್ಟ್‌ಗಳನ್ನು ಧರಿಸಬಹುದು. ಇದು ಯೋನಿಯ ಉಸಿರಾಟಕ್ಕೆ ಅನುವು ಮಾಡಿಕೊಡುತ್ತದೆ.
ಅಲರ್ಜಿಯ ಅಪಾಯವನ್ನು ಕಡಿಮೆ ಮಾಡುತ್ತದೆ
ಸಾಂದರ್ಭಿಕವಾಗಿ ಒಳ ಉಡುಪುಗಳಿಂದ ಮುಕ್ತಿ ಹೊಂದುವುದು ಯೋನಿ ಮತ್ತು ಯೋನಿಯ ಆರೋಗ್ಯಕ್ಕೆ ಉತ್ತಮ. ಇದಕ್ಕೆ ರಾತ್ರಿ ಮಲಗುವ ಸಮಯವೊಂದೇ ಅವಕಾಶ ನೀಡುತ್ತದೆ ಎಂದು ಡಾ. ಕಮೀಲಾ ಫಿಲಿಪ್ಸ್ ಹೇಳುತ್ತಾರೆ. ಏಕೆಂದರೆ ಬಟ್ಟೆ ಅಥವಾ ಬಟ್ಟೆ ತೊಳೆಯಲು ಬಳಸುವ ಡಿಟರ್ಜೆಂಟ್ನಲ್ಲಿರುವ ರಾಸಾಯನಿಕಗಳಿಂದ ಕನಿಷ್ಠ ಪಕ್ಷ ರಾತ್ರಿಯಾದರೂ ಗುಪ್ತಾಂಗಗಳು ದೂರವಿರುತ್ತದೆ. ಇದರಿಂದಾಗಿ ಚರ್ಮದ ದದ್ದುಗಳು, ಅಲರ್ಜಿಗಳು ಮತ್ತು ಚರ್ಮದ ಇತರ ಸೋಂಕಿನ ಸ್ಥಿತಿ ದೂರವಾಗುತ್ತದೆ ಎಂದು ತಜ್ಞರು ಹೇಳುತ್ತಾರೆ.
ಒಟ್ಟಾರೆ, ಒಳ ಉಡುಪು ಧರಿಸದೇ ನಿದ್ರಿಸುವುದನ್ನು ಅಭ್ಯಾಸ ಮಾಡುವುದು ದೇಹದ ಆರೋಗ್ಯದ ದೃಷ್ಟಿಯಿಂದ ಉತ್ತಮ. ಜೊತೆಗೆ ಮಲಗುವಾಗ ದೇಹವು ಫ್ರೀಯಾಗಿದ್ದು, ಆರಾಮದಾಯಕ ಮತ್ತು ಸುಖಕರ ನಿದ್ರೆಗೂ ಇದು ಒಳ್ಳೆಯದು.
