ನವದೆಹಲಿ: ಈ ಹಿಂದೆ ಚೀನಾದ ವುಹಾನ್ನಲ್ಲಿ ಭಾರಿ ವಿವಾದಕ್ಕೆ ಗುರಿಯಾಗಿದ್ದ ಸಂಶೋಧನಾ ತಂಡವೊಂದು ಇದೀಗ ಥಾಯ್ಲೆಂಡ್‌ನಲ್ಲಿ ಮಾರಣಾಂತಿಕ ಬ್ಯಾಟ್ (ಬಾವಲಿ) ವೈರಸ್ ಪತ್ತೆ ಮಾಡಿದೆ. ಇದು ಮನುಷ್ಯರಿಗೆ ಹರಡುವ ಸಾಮರ್ಥ್ಯ ಹೊಂದಿದೆ ಎಂದು ಅವರು ಎಚ್ಚರಿಸಿದ್ದಾರೆ.
ಹಿಂದೆಂದೂ ಕಂಡಿರದ ರೀತಿಯ ವೈರಸ್ ಅನ್ನು ಪತ್ತೆ ಮಾಡಲಾಗಿದೆ. ಇದೂ ಕೂಡ ಕೋವಿಡ್ನಂತೆ ಮನುಷ್ಯರಿಗೆ ಸೋಂಕು ತಗುಲಿಸುವ ಸಾಮರ್ಥ್ಯ ಹೊಂದಿದೆ ಎಂದು ನ್ಯೂಯಾರ್ಕ್‌ನ ಲಾಭರಹಿತ ಇಕೋಹೆಲ್ತ್ ಅಲಯ್ಸನ್ ಮುಖ್ಯಸ್ಥ ಡಾ.ಪೀಟರ್ ದಾಸ್ಜಾಕ್ ತಿಳಿಸಿದ್ದಾರೆ ಎಂದು ಡೈಲಿ ಮೇಲ್ ವರದಿ ಮಾಡಿದೆ. ಹೊಸ ಸಾಂಕ್ರಾಮಿಕ ರೋಗ ಆರಂಭವಾಗಲಿದೆ ಎಂಬ ಭೀತಿ ಹೊಂದಿದ್ದ ವುಹಾನ್ನ ವಿವಾದಾತ್ಮಕ ಪ್ರಯೋಗದೊಂದಿಗೆ ಈ ಇಕೋಹೆಲ್ತ್ ಕೂಡ ಸಂಬಂಧ ಹೊಂದಿದೆ.
"ನಾವು ಅನೇಕ ಬಗೆಯ ಸಾರ್ಸ್ ಸಂಬಂಧಿ ಕೋವಿಡ್ ವೈರಸ್ ಪತ್ತೆ ಮಾಡಿದ್ದೇವೆ. ಆದರೆ, ಜನರು ಸಾಮಾನ್ಯವಾಗಿ ತೆರೆದುಕೊಳ್ಳುವ ನಿರ್ದಿಷ್ಟ ಅಂಶವೊಂದನ್ನು ಬಾವಲಿಗಳಲ್ಲಿ ಕಂಡು ಹಿಡಿದಿದ್ದೇವೆ. ಹೊಸ ವೈರಸ್ಗೆ ಇನ್ನಷ್ಟೇ ಹೆಸರಿಡಬೇಕಿದೆ. ಇದು ಥಾಯ್ಲೆಂಡ್ನ ಗುಹೆಯಲ್ಲಿ ಕಂಡುಬಂದಿದೆ. ಈ ಗುಹೆಗಳಲ್ಲಿ ಲಭ್ಯವಾಗುವ ಮಲವನ್ನು ರೈತರು ತಮ್ಮ ಭೂಮಿಗೆ ಗೊಬ್ಬರವಾಗಿ ಪಡೆಯುತ್ತಾರೆ. ಹೊಸತಾಗಿ ಪತ್ತೆಯಾಗಿರುವ ವೈರಸ್ ಕೋವಿಡ್‌ಗೆ ಹತ್ತಿರವಾಗಿದೆ" ಎಂದು ಅವರು ವಿವರಿಸಿದ್ದಾರೆ.
"ಇದನ್ನು ನಾವು ಝೊನಾಟಿಕ್ ರೋಗಕಾರಕ ಎಂದು ಪರಿಗಣಿಸಿದ್ದೇವೆ. ವೈರಸ್ ಪತ್ತೆಯಾದ ಬಾವಲಿಯ ಗುಹೆಗೆ ಜನರು ಹೆಚ್ಚಾಗಿ ತೆರೆದುಕೊಳ್ಳುತ್ತಿದ್ದಾರೆ. ಕಾರಣ ಇದರ ಮಲ ತುಂಬಾ ಫಲವತ್ತಾಗಿದೆ. ಈ ಬಾವಲಿಗಳು ವೈರಸ್ ಅನ್ನು ಮಲದಲ್ಲಿ ಹಾಕಬಹುದು. ಇದರಿಂದ ಸೋಂಕು ಹರಡಬಹುದು" ಎಂದಿದ್ದಾರೆ.
ಜಾಗತಿಕವಾಗಿ ಸೋಂಕು ಹೆಚ್ಚುತ್ತಿದೆ ಎಂಬ ಕುರಿತು ಡಬ್ಲ್ಯೂಎಚ್ಒ ವರದಿ ಬಿಡುಗಡೆ ಮಾಡಿದ ಬೆನ್ನಲ್ಲೇ ಈ ಫಲಿತಾಂಶ ಬಂದಿದೆ. ಪ್ರಸ್ತುತ ಇದೀಗ 50ಕ್ಕೂ ಹೆಚ್ಚು ದೇಶದಲ್ಲಿ ಸೋಂಕಿನ ಪ್ರಮಾಣ ಹೆಚ್ಚಿದ್ದು, ಆಸ್ಪತ್ರೆ ದಾಖಲೀಕರಣ ಶೇ.42ರಷ್ಟು ಹೆಚ್ಚಾಗಿದೆ. ಕೋವಿಡ್ ಹೊಸ ತಳಿ ಅತಿ ಹೆಚ್ಚು ಪ್ರಸರಣ ಹೊಂದಿದ್ದು, ಸೋಂಕಿನ ಪ್ರಮಾಣ ಹೆಚ್ಚಿಸುವಲ್ಲಿ ಪ್ರಮುಖವಾಗಿದೆ. ಈ ಹಿನ್ನೆಲೆಯಲ್ಲಿ ಅಮೆರಿಕ ಸೇರಿದಂತೆ ಹಲವೆಡೆ ಮಾಸ್ಕ್ ಧರಿಸುವುದನ್ನು ಮತ್ತೆ ಕಡ್ಡಾಯ ಮಾಡಲಾಗಿದೆ. ಸಿಡಿಸಿ ಪ್ರಕಾರ, ಸದ್ಯ ಪ್ರಚಲಿತವಿರುವ ಲಸಿಕೆ, ಪರೀಕ್ಷೆ ಮತ್ತು ಚಿಕಿತ್ಸೆಗಳು ಜೆಎನ್.1ಗೆ ಪರಿಣಾಮಕಾರಿಯಾಗಿದೆ.(ಐಎಎನ್ಎಸ್)
ಇದನ್ನೂ ಓದಿ: ಜೆಎನ್ 1 ಕೊರೊನಾ ರೂಪಾಂತರದ ದೊಡ್ಡ ಅಲೆ ಬರಬಹುದು; ತಜ್ಞರ ಹೇಳಿಕೆ
