ಯಾದಗಿರಿ/ಸುರಪುರ: ಲಾಕ್ಡೌನ್ ನಿಯಮ ಪಾಲನೆಗೆ ನಿರ್ಮಿಸಲಾದ ಚೆಕ್ ಪೋಸ್ಟ್ ಬಳಿ ಅನಗತ್ಯವಾಗಿ ಮಾಸ್ಕ್ ಇಲ್ಲದೆ ಓಡಾಡುತ್ತಿದ್ದ ಯುವಕರ ಬಟ್ಟೆ ಬಿಚ್ಚಿಸಿ ಮುಖಕ್ಕೆ ಕಟ್ಟಿ ಕಳುಹಿಸಿದ ಘಟನೆ ನಡೆದಿದೆ. ಲಾಕ್ಡೌನ್ನಿಂದಾಗಿ ಜನರ ಓಡಾಟ ನಿಷೇಧಿಸಲಾಗಿದ್ದು, ತಾಲೂಕಾಡಳಿತ ಜನರಿಗೆ ಎಷ್ಟು ತಿಳಿಹೇಳಿದರೂ ಲಾಕ್ಡೌನ್ ನಿಯಮ ಗಾಳಿಗೆ ತೂರಿ ಜನರು ಓಡಾಡುತ್ತಲೇ ಇದ್ದಾರೆ.
ಇನ್ನು ವಾಹನ ಓಡಾಟಕ್ಕೆ ಸಂಬಂಧಿಸಿದಂತೆ ಬಂಡೋಳಿ ಗ್ರಾಮದ ಮುಖ್ಯ ಹೆದ್ದಾರಿಯಲ್ಲಿ ನಿರ್ಮಿಸಲಾದ ಚೆಕ್ ಪೋಸ್ಟ್ ಮುಖ್ಯವಾಗಿದೆ. ಈ ಚೆಕ್ ಪೋಸ್ಟ್ನಿಂದ ವಿಜಯಪುರ ಮತ್ತು ರಾಯಚೂರು ಜಿಲ್ಲೆಗಳಿಗೆ ಹೋಗಿ ಬರಲು ಇದೇ ಮುಖ್ಯ ರಸ್ತೆಯಾಗಿದೆ. ಈ ಚೆಕ್ ಪೋಸ್ಟ್ಗೆ ಇಂದು ತಹಶೀಲ್ದಾರ್ ನಿಂಗಣ್ಣ ಬಿರಾದಾರ್ ಭೇಟಿ ನೀಡಿದಾಗ ಅನೇಕರು ಮಾಸ್ಕ್ ಧರಿಸದೆ ಓಡಾಡುವುದು ಕಂಡು ಬಂತು.
ತಕ್ಷಣ ಮಾಸ್ಕ್ ಇಲ್ಲದವರನ್ನು ತಡೆದು ಅವರ ಅಂಗಿ ಬಿಚ್ಚಿಸಿ ಮುಖಕ್ಕೆ ಕಟ್ಟಿಸುವ ಮೂಲಕ ಮಾಸ್ಕ್‌ನ ಅವಶ್ಯಕತೆ ಮತ್ತು ಧರಿಸಬೇಕಾದ ಗಂಭೀರತೆಯ ಬಗ್ಗೆ ತಿಳಿಸುವ ಜೊತೆಗೆ ಈ ಚೆಕ್ ಪೋಸ್ಟ್ ಮೂಲಕ ಓಡಾಡುವ ಎಲ್ಲಾ ವಾಹನ ಸವಾರರನ್ನು ತಡೆದು ಮಾಸ್ಕ್ ಧರಿಸುವಂತೆ, ಆಗಾಗ ಕೈ ತೊಳೆಯುವಂತೆ ತಿಳಿಸಿದ್ದಾರೆ.
ತಹಶೀಲ್ದಾರ್ ಸ್ವತಃ ಚೆಕ್ ಪೋಸ್ಟ್‌ನಲ್ಲಿ ನಿಂತು ಜನರಲ್ಲಿ ಜಾಗೃತಿ ಮೂಡಿಸಿದ್ದು ಎಲ್ಲರ ಮೆಚ್ಚುಗೆಗೆ ಕಾರಣವಾಗಿದೆ.
