ಬಸವನ ಬಾಗೇವಾಡಿಯಲ್ಲಿ ಪತಿ ಕೊಲೆಗೆ ಕುಮ್ಮಕ್ಕು ನೀಡಿದ ಪತ್ನಿ ಸೇರಿ ಮೂವರು ಅಂದರ್​

ವಿಜಯಪುರ ಜಿಲ್ಲೆಯ ಬಸವನ ಬಾಗೇವಾಡಿ ತಾಲೂಕಿನ ಮುತ್ತಗಿ ಗ್ರಾಮದಲ್ಲಿ ನಡೆದಿದ್ದ ವ್ಯಕ್ತಿಯ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಹತ್ಯೆಗೀಡಾದ ವ್ಯಕ್ತಿಯ ಪತ್ನಿ ಸೇರಿದಂತೆ ಮೂವರು ಆರೋಪಿಗಳನ್ನು ಪೊಲೀಸರು ಬಂಧಿಸಿದ್ದಾರೆ.

ವಿಜಯಪುರ: ಜಿಲ್ಲೆಯ ಬಸವನ ಬಾಗೇವಾಡಿ ತಾಲೂಕಿನ ಮುತ್ತಗಿ ಗ್ರಾಮದಲ್ಲಿ ಮೇ. ‌12 ರಂದು ನಡೆದಿದ್ದ ವ್ಯಕ್ತಿ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮೂವರು ಆರೋಪಿಗಳನ್ನು ಪೊಲೀಸರು ಹೆಡೆಮುರಿ ಕಟ್ಟಿದ್ದಾರೆ.

ಚಂದ್ರಕಲಾ ರಾಯಗೊಂಡ (27), ಆಕೆಯೊಂದಿಗೆ ಸಂಬಂಧ ಹೊಂದಿದ್ದ ಕುಮಾರ ಪಾಟೀಲ್​ (23) ಮತ್ತು ಕೊಲೆಗೆ ಸಹಕರಿಸಿದ್ದ ಮಂಜು ಕೋಟೆ(17) ಯನ್ನು ಬಂಧಿಸಲಾಗಿದೆ. ಚಂದ್ರಕಲಾಳ ಪತಿ ಶಶಿಕಿರಣ ಶ್ರೀಶೈಲ ರಾಯಗೊಂಡ (36) ಕೊಲೆಗೀಡಾಗಿರುವ ವ್ಯಕ್ತಿ.

ಕುಮಾರ ಪಾಟೀಲ್​ನೊಂದಿಗೆ ಚಂದ್ರಕಲಾ ವಿವಾಹೇತರ ಸಂಬಂಧ ಹೊಂದಿರುವ ವಿಷಯ ಆಕೆ ಪತಿ ಶಶಿಕಿರಣನಿಗೆ ತಿಳಿದಿತ್ತು. ಹೀಗಾಗಿ ಪತಿಯನ್ನು ಹೇಗಾದರೂ ಕೊಲ್ಲುವಂತೆ ಪ್ರಿಯಕರನಿಗೆ ಚಂದ್ರಕಲಾ ಕುಮ್ಮಕ್ಕು ನೀಡಿದ್ದಳು ಎನ್ನಲಾಗ್ತಿದೆ. ಅದರಂತೆ ಕುಮಾರ ಪಾಟೀಲ್​ ಮತ್ತೊಬ್ಬ ಹುಡುಗನ ಸಹಾಯ ಪಡೆದು ಆಕೆಯ ಪತಿಯ ಕತ್ತು ಹಿಸುಕಿ ಕೊಲೆಗೈದಿದ್ದ ಎಂದು ಆರೋಪಿಸಲಾಗಿದೆ.

ಸದ್ಯ ಆರೋಪಿಗಳನ್ನು ಬಂಧಿಸುವಲ್ಲಿ ಬಸವನ ಬಾಗೇವಾಡಿ ಡಿವೈಎಸ್​ಪಿ, ಸಿಪಿಐ ನೇತೃತ್ವದಲ್ಲಿ ಕೂಡಗಿ ಎನ್​ಟಿಪಿಸಿ ಪೊಲೀಸರು ಯಶಸ್ವಿಯಾಗಿದ್ದಾರೆ.