ವಿಜಯಪುರ: ನಿಡಗುಂದಿ ತಾಲೂಕಿನ ಆಲಮಟ್ಟಿ ಜಲಾಶಯದಲ್ಲಿ ಆರಂಭವಾಗಿರುವ ವಿದ್ಯುತ್ ಉತ್ಪಾದನೆ ಮತ್ತಷ್ಟು ವೇಗ ಪಡೆದುಕೊಂಡಿದೆ. ಜಲಾಶಯದ ಒಳಹರಿವು ಹೆಚ್ಚಾದಂತೆ ಹೊರಹರಿವನ್ನೂ ಹೆಚ್ಚಿಸಲಾಗಿದ್ದು, ಸದ್ಯ ಇಲ್ಲಿನ 6 ಜಲವಿದ್ಯುತ್ ಘಟಕದಿಂದ ಪ್ರತಿದಿನ 290 ಮೆಗಾವ್ಯಾಟ್ ವಿದ್ಯುತ್ ಉತ್ಪಾದನೆಯಾಗುತ್ತಿದೆ.
ಲಾಲ್ ಬಹದ್ದೂರ ಶಾಸ್ತ್ರಿ ಜಲಾಶಯದ ಪ್ರಮುಖ ಘಟಕವಾಗಿರುವ ಜಲವಿದ್ಯುತ್ ಕೇಂದ್ರದ, ಐದು ಉತ್ಪಾದನೆ ಘಟಕದಲ್ಲಿ ಪ್ರತಿ ಘಟಕಗಳು 55 ಮೆಗಾವ್ಯಾಟ್ ವಿದ್ಯುತ್ ಉತ್ಪಾದನೆ ಸಾಮರ್ಥ್ಯ ಹೊಂದಿವೆ. ಇನ್ನೊಂದು ಘಟಕ 15 ಮೆಗಾವ್ಯಾಟ್ ಉತ್ಪಾದನೆ ಮಾಡುವ ಶಕ್ತಿ ಹೊಂದಿವೆ. ಈಗ ಎಲ್ಲಾ 6 ಘಟಕಗಳು ಆರಂಭಿಸಲಾಗಿದ್ದು, ಸದ್ಯ ಪ್ರತಿದಿನ 290 ಮೆಗಾ ವ್ಯಾಟ್ ವಿದ್ಯುತ್ ಉತ್ಪಾದನೆ ಕಾರ್ಯ ನಡೆಯುತ್ತಿದೆ.
ಜಲಾಶಯದ ಒಟ್ಟು ಗರಿಷ್ಠ 519.60 ಮೀಟರ್ ಸಾಮರ್ಥ್ಯದ ಜಲಾಶಯದಲ್ಲಿ 517.28 ಮೀಟರ್ ನೀರು ಭರ್ತಿಯಿದೆ. ಮಂಗಳವಾರ ಜಲಾಶಯಕ್ಕೆ 52.033 ಕ್ಯೂಸೆಕ್ ನೀರು ಹರಿದು ಬಂದಿದೆ. ಅದರಂತೆ 46.130 ಕ್ಯೂಸೆಕ್ ನೀರು ಹೊರ ಬಿಡಲಾಗುತ್ತಿದೆ. ಇದರ ಆಧಾರದ ಮೇಲೆ ಎಲ್ಲಾ 6 ವಿದ್ಯುತ್ ಘಟಕಗಳು ವಿದ್ಯುತ್ ಉತ್ಪಾದಿಸುತ್ತಿವೆ.
ಪ್ರತಿದಿನ ಈ ವಿದ್ಯುತ್ ಉತ್ಪಾದನೆ ಮೂಲಕ 45.00 ಕ್ಯೂಸೆಕ್ ನೀರು ಹರಿದರೆ ಸಾಕು, 90 ಮಿಲಿಯನ್ ವಿದ್ಯುತ್ ಉತ್ಪಾದನೆಯಾಗಲಿದೆ ಎಂದು ಕೃಷ್ಣಾ ಭಾಗ್ಯ ಜಲ ನಿಗಮ ಮಂಡಳಿ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
