ವಿಜಯಪುರ: ಕೊರೊನಾ ಸೋಂಕಿತ ವ್ಯಕ್ತಿಯೊಬ್ಬ ಜಿಲ್ಲೆಯ ಸಿಂದಗಿ, ಇಂಡಿ ಪಟ್ಟಣಗಳಲ್ಲಿ ಓಡಾಟ ನಡೆಸಿದ್ದು, ಸಾರ್ವಜನಿಕರಲ್ಲಿ ಆತಂಕ ಮೂಡಿಸಿದೆ.
38 ವರ್ಷದ ಕೊರೊನಾ ಸೋಂಕಿತ ವ್ಯಕ್ತಿ ಮೇ 16ರಂದು ಮುಂಬೈನಿಂದ ಬಂದು ಪತ್ನಿಯೊಂದಿಗೆ ಕಲಬುರಗಿಯಲ್ಲಿ 10 ದಿನಗಳ ಕಾಲ ಇನ್ಸ್ಟಿಟ್ಯೂಷನಲ್ ಕ್ವಾರಂಟೈನ್ ಮುಗಿಸಿದ್ದ. ಈ ವೇಳೆ ಕ್ವಾರಂಟೈನ್ ಸಡಿಲಿಕೆ ಮಾಡಿದ್ದ ಕಾರಣ ಇಬ್ಬರನ್ನು ರಿಪೋರ್ಟ್ ಬರುವ ಮುಂಚಿತವಾಗಿಯೇ ಮನೆಗೆ ಕಳುಹಿಸಲಾಗಿತ್ತು. ಮನೆಗೆ ಬಂದ ಮೇಲೆ ಹೋಮ್ ಕ್ವಾರಂಟೈನ್ನಲ್ಲಿ ಇರದೇ ಈತ ಅಲೆದಾಡಿದ್ದಾನೆ. ಮಂಗಳವಾರ ರಿಪೋರ್ಟ್ ಬಂದಿದ್ದು, ಇಬ್ಬರಲ್ಲಿ ಪತಿಗೆ ಮಾತ್ರ ಕೊರೊನಾ ಇರುವುದು ದೃಢಪಟ್ಟಿದೆ.
ಕೂಡಲೇ ಕಲಬುರಗಿ ಅಧಿಕಾರಿಗಳು ವಿಜಯಪುರ ಜಿಲ್ಲಾಡಳಿತಕ್ಕೆ ಮಾಹಿತಿ ನೀಡಿದ್ದಾರೆ. ಈ ವೇಳೆ ಸೋಂಕಿತ ವ್ಯಕ್ತಿ ಇಂಡಿಯಿಂದ ಬೈಕ್ನಲ್ಲಿ ಸಹೋದರನ ಜೊತೆಗೆ ಲಚ್ಯಾಣ ಗ್ರಾಮಕ್ಕೆ ತೆರಳಿ, ಅನಾರೋಗ್ಯದ ಕಾರಣ ಇಂಡಿ ತಾಲೂಕು ಆಸ್ಪತ್ರೆಯಲ್ಲಿ ಇಂದು ಪ್ರತ್ಯಕ್ಷನಾಗಿದ್ದಾನೆ. ಈತನ ಮಾಹಿತಿ ಪಡೆದ ವೈದ್ಯರು ಕೂಡಲೇ ಜಿಲ್ಲಾ ಕೋವಿಡ್ ಆಸ್ಪತ್ರೆಗೆ ರವಾನಿಸಿದ್ದಾರೆ. ಈ ಘಟನೆಯಿಂದ ಸಿಂದಗಿ, ಇಂಡಿ ಪಟ್ಟಣ ಹಾಗೂ ಲಚ್ಯಾಣ ಗ್ರಾಮಸ್ಥರಲ್ಲಿ ಆತಂಕ ಮನೆ ಮಾಡಿದೆ.
