ವಿಜಯಪುರ: ಕೃಷ್ಣಾ ಮೇಲ್ದಂಡೆ ಯೋಜನೆಯ 3ನೇ ಹಂತದ ಅನುಷ್ಠಾನಕ್ಕೆ ಆಲಮಟ್ಟಿ ಜಲಾಶಯವನ್ನು 524 ಮೀಟರ್ಗೆ ಎತ್ತರಿಸಲು ಕಾನೂನಾತ್ಮಕ ಹೋರಾಟ ನಡೆದಿದೆ. ಇನ್ನು ಎರಡು, ಮೂರು ತಿಂಗಳಲ್ಲಿ ಈ ಹೋರಾಟ ಪೂರ್ಣಗೊಳ್ಳುವ ವಿಶ್ವಾಸವಿದೆ ಎಂದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಹೇಳಿದರು.
ಜಿಲ್ಲೆಯ ತಾಳಿಕೋಟೆ ತಾಲೂಕಿನ ಕೊಡಗಾನೂರು ಗ್ರಾಮದಲ್ಲಿ ಪೀರಾಪುರ- ಬೂದಿಹಾಳ ಏತ ನೀರಾವರಿ ಯೋಜನೆ ಹಾಗೂ ಪೈಪ್ ವಿತರಣಾ ಜಾಲ ಕಾಮಗಾರಿ ಶಂಕುಸ್ಥಾಪನೆ ನೆರವೇರಿಸಿದ ನಂತರ ಅವರು ಮಾತನಾಡಿದರು. ಆಲಮಟ್ಟಿ ಜಲಾಶಯವನ್ನು 524 ಮೀಟರ್ಗೆ ಎತ್ತರಿಸಿದರೆ ನಮ್ಮ ಪಾಲಿನ 130 ಟಿಎಂಸಿ ನೀರು ಸಿಗಲಿದೆ. ಸದ್ಯ ಕೃಷ್ಣಾ ಮೇಲ್ದಂಡೆ 3ನೇ ಹಂತದ ಯೋಜನೆ ಅನುಷ್ಠಾನಕ್ಕೆ 50 ಸಾವಿರ ಕೋಟಿ ರೂ. ಹಣದ ಅವಶ್ಯಕತೆ ಇದೆ. ನ್ಯಾಯಾಲಯದ ಆದೇಶ ಬಂದ ಮೇಲೆ ತಕ್ಷಣ ಎಷ್ಟು ಹಣಬೇಕೋ ಅಷ್ಟು ಹಣ ಬಿಡುಗಡೆ ಮಾಡುವುದಾಗಿ ತಿಳಿಸಿದರು.
'ರೈತ ಹಿತಕ್ಕೆ ಗಲ್ಲಿಗೇರಲು ಸಿದ್ದ': ಈ ಹಿಂದೆ ಇದೇ ಯೋಜನೆ ವಿಚಾರವಾಗಿ ಆಗಿನ ಸಿಎಂ ಎಸ್.ಎಂ.ಕೃಷ್ಣ ಕೋರ್ಟ್ಗೆ ಹೋಗಿ ಕ್ಷಮೆ ಕೇಳಿದ್ದರು ಎಂದು ಕೆಲ ನಾಯಕರು ತಮಗೆ ಹೆದರಿಸಿದ್ದರು. ನೀರಾವರಿ ಯೋಜನೆ ರೈತರ ವಿಷಯವಾಗಿರುವ ಕಾರಣ ಕ್ಷಮೆ ಅಲ್ಲ ಗಲ್ಲಿಗೇರಲು ಸಿದ್ದವಿರುವುದಾಗಿ ಅವರು ಹೇಳಿದರು.
'ಪಕ್ಷಗಳು ರೈತರಿಗೆ ಸೇರಿದ್ದು': ನೀರಾವರಿ ಯೋಜನೆಗೆ ರೈತರು ತಮ್ಮ ಫಲವತ್ತಾದ ಜಮೀನು ಕಳೆದುಕೊಂಡಿದ್ದಾರೆ. ಅವರ ತ್ಯಾಗದಿಂದ ಉತ್ತರ ಕರ್ನಾಟಕ ನೀರಾವರಿಗೆ ಒಳಪಟ್ಟಿದೆ. ನಾನು ನೀರಾವರಿ ಸಚಿವನಾಗಿದ್ದ ವೇಳೆ ನ್ಯಾಯಾಧೀಕರಣದಿಂದ ಕೈ ಕಟ್ಟಿ ಹಾಕಲಾಗಿತ್ತು. ಅದರೊಳಗೆ ಚಿಮ್ಮಲಗಿ, ಗುತ್ತಿ ಬಸವಣ್ಣ, ಮುಳವಾಡ ಏತ ನೀರಾವರಿಗೆ ಗುದ್ದಲಿ ಪೂಜೆ ನೆರವೇರಿಸಿದ್ದೆ. ಈ ಆಲಮಟ್ಟಿ ಜಲಾಶಯ ಎತ್ತರವಾದರೆ ಈ ಯೋಜನೆಗಳಿಗೆ ನೀರು ಹರಿಸಬಹುದು ಎಂದರು.
ಸಿಎಂಗೆ ಜೋಡೆತ್ತು, ಹಸು ದಾನ ನೀಡಿದ ರೈತರು: ಪೀರಾಪುರ-ಬೂದಿಹಾಳ ನೀರಾವರಿ ಯೋಜನೆ ಶಂಕುಸ್ಥಾಪನೆಗೆ ಆಗಮಿಸಿದ್ದ ಸಿಎಂ ಬೊಮ್ಮಾಯಿ ಅವರಿಗೆ ತಾಳಿಕೋಟೆ ತಾಲೂಕಿನ ಭಂಟನೂರ ರೈತರು ಜೋಡೆತ್ತು ಹಾಗೂ ಒಂದು ಹಸುವನ್ನು ದಾನವಾಗಿ ನೀಡಿದರು. ಈ ವೇಳೆ ಎತ್ತುಗಳಿಗೆ ಗೋ ಪೂಜೆ ನೆರವೇರಿಸಿದರು. ಕಿಕ್ಕಿರಿದ ಜನರು, ಕ್ಯಾಮೆರಾ ಕಂಡ ಎತ್ತು, ಹಸು ಅರೆಕ್ಷಣ ಬೆದರಿದವು. ಸಿಎಂಗೆ ಹಸು ಹಾಯಲು ಬಂದ ಪ್ರಸಂಗವೂ ನಡೆಯಿತು. ಇದೇ ವೇಳೆ ಎತ್ತುಗಳಿಗೆ ಮುತ್ತಿಟ್ಟ ಸಿಎಂ ಗೌರವ ಸಲ್ಲಿಸಿದರು.
ಇದನ್ನೂ ಓದಿ: ಗೃಹ ಸಚಿವರ ವಜಾ ಕೋರಿ ರಾಜ್ಯಪಾಲರಿಗೆ ಆಪ್ ಮನವಿ
