ಕಾರವಾರ(ಉತ್ತರ ಕನ್ನಡ): ಪ್ರಾಕೃತಿಕವಾಗಿ ಶ್ರೀಮಂತವಾಗಿರುವ ಉತ್ತರಕನ್ನಡ ಜಿಲ್ಲೆಯ ಸೊಬಗಿಗೆ ಮನಸೋಲದವರೇ ಇಲ್ಲ. ಮಳೆಗಾಲ ಪ್ರಾರಂಭವಾದಾಗ ಎಲ್ಲೆಂದರಲ್ಲಿ ಧುಮ್ಮಿಕ್ಕುವ ಜಲಪಾತಗಳ ಸೊಬಗು ಒಂದೆಡೆಯಾದರೆ, ಇನ್ನೊಂದೆಡೆ ಐತಿಹಾಸಿಕ ಸ್ಥಳಗಳು ಪ್ರವಾಸಿಗರನ್ನು ಮಂತ್ರಮುಗ್ಧರನ್ನಾಗಿಸುತ್ತವೆ. ಉತ್ತರಕನ್ನಡ ಜಿಲ್ಲೆಯ ದಾಂಡೇಲಿ ಜೋಯಿಡಾ ಭಾಗದಲ್ಲಿ ಪ್ರಾರಂಭವಾಗಿರುವ ಜಲಸಾಹಸಿ ಕ್ರೀಡೆಗಳು ಇನ್ನಷ್ಟು ಪ್ರವಾಸಿಗರನ್ನ ಆಕರ್ಷಿಸುತ್ತವೆ..
ಕಳೆದ ಬಾರಿಯಂತೆ ಈ ಸಾರಿಯೂ ಕೊರೊನಾ ಅಬ್ಬರದಿಂದಾಗಿ ಲಾಕ್‌ಡೌನ್ ಹೇರಿದ್ದ ಕಾರಣ ಪ್ರವಾಸಿ ತಾಣಗಳು ಸಂಪೂರ್ಣ ಮಂಕಾಗಿದ್ದವು. ಪ್ರವಾಸಿಗರನ್ನೇ ನಂಬಿದ್ದ ಇಲ್ಲಿನ ಜಲಸಾಹಸಿ ಕೇಂದ್ರಗಳು, ಹೋಂ ಸ್ಟೇಗಳು ಸಾಕಷ್ಟು ನಷ್ಟ ಅನುಭವಿಸುವಂತಾಗಿತ್ತು.
ಈ ನಡುವೆ ಸರ್ಕಾರ ಕೊರೊನಾ ಕಡಿಮೆಯಾಗುತ್ತಿದ್ದಂತೆ ಅನ್ಲಾಕ್ ಘೋಷಣೆ ಮಾಡಿತ್ತಾದರೂ ಪ್ರವಾಸಿ ತಾಣಗಳಿಗೆ ಅನುಮತಿಸಿರಲಿಲ್ಲ. ಆದರೆ, ಇದೀಗ ಪ್ರವಾಸಿ ತಾಣಗಳಿಗೆ ಮುಕ್ತ ಅವಕಾಶ ನೀಡಲಾಗಿದೆ.
ಅನ್ಲಾಕ್ 4.0 ಜಾರಿಯಾದ ಬೆನ್ನಲ್ಲೇ ಜಲಸಾಹಸಿ ಚಟುವಟಿಕೆಗಳಿಗೂ ಷರತ್ತು ಬದ್ಧ ಅವಕಾಶ ನೀಡಲಾಗಿದೆ. ಕೋವಿಡ್‌ ಮುನ್ನೆಚ್ಚರಿಕೆ ಜೊತೆಗೆ ಪ್ರವಾಸಿಗರ ಸಂಪೂರ್ಣ ವಿವರವನ್ನು ನಿತ್ಯವೂ ಗ್ರಾಮ ಪಂಚಾಯತ್‌ಗಳಿಗೆ ಸಲ್ಲಿಸಲು ಸೂಚಿಸಲಾಗಿದೆ. ರ್ಯಾಪ್ಟಿಂಗ್ ಇಲ್ಲವೇ ಜಲಸಾಹಸಿ ಚಟುವಟಿಕೆ ವೇಳೆ ಸುರಕ್ಷತೆಯೊಂದಿಗೆ ನಿಗದಿ ಪಡಿಸಿದ ಜನರಿಗಷ್ಟೇ ಅವಕಾಶ ಕಲ್ಪಿಸಲು ಸೂಚಿಸಲಾಗಿದೆ.
ಇದನ್ನೂ ಓದಿ: ವರುಣನ ಆರ್ಭಟಕ್ಕೆ ಕರಾವಳಿ ತತ್ತರ; ರಕ್ಕಸದಲೆಗಳಿಗೆ ಕೊಚ್ಚಿ ಹೋಗ್ತಿದೆ ಕಡಲತೀರ
ದಾಂಡೇಲಿ, ಜೋಯಿಡಾ ಭಾಗದ ಹೋಂ ಸ್ಟೇಗಳತ್ತ ಪ್ರವಾಸಿಗರ ದಂಡೇ ಹರಿದು ಬರುತ್ತಿದೆ. ಇಲ್ಲಿ ಹರಿಯುವ ಕಾಳಿ ನದಿಯಲ್ಲಿ ನಡೆಸುವ ರ್ಯಾಪ್ಟಿಂಗ್ ಹಾಗೂ ಜಲಸಾಹಸಿ ಕ್ರೀಡೆಗಳಿಗೆ ರಾಜ್ಯ ಹಾಗೂ ಹೊರ ರಾಜ್ಯದ ಪ್ರವಾಸಿಗರು ಆಕರ್ಷಿತರಾಗುತ್ತಿದ್ದಾರೆ.
ಕಳೆದ ನಾಲ್ಕೈದು ತಿಂಗಳಿಂದ ಕೊರೊನಾ ಕಾರಣದಿಂದಾಗಿ ಮನೆಯಲ್ಲಿದ್ದು ಬೇಸರವೆನ್ನಿಸಿದವರು ತಮ್ಮ ಕುಟುಂಬದವರೊಂದಿಗೆ ಬಂದು ಜಲಸಾಹಸಿ ಕ್ರೀಡೆಗಳಲ್ಲಿ ಎಂಜಾಯ್ ಮಾಡ ತೊಡಗಿದ್ದಾರೆ. ಇನ್ನು, ಇಲ್ಲಿನ ಹೋಂ ಸ್ಟೇಗಳು ಕೂಡ ಪ್ರವಾಸಿಗರ ಆತಿಥ್ಯಕ್ಕೆ ಸಜ್ಜಾಗಿವೆ.
ಕಳೆದ ನಾಲ್ಕೈದು ತಿಂಗಳಿಂದ ಸಂಪೂರ್ಣ ಸ್ಥಗಿತಗೊಂಡು ಪ್ರವಾಸಿಗರಿಲ್ಲದೆ ಮಂಕಾಗಿದ್ದ ಪ್ರವಾಸಿ ತಾಣ, ಹೋಂ ಸ್ಟೇಗಳಿಗೆ ಪ್ರವಾಸಿಗರ ದಂಡೇ ಹರಿದು ಬರಲಾರಂಭಿಸಿದೆ. ಆದರೆ, ಮಳೆಗಾಲದಲ್ಲಿ ನದಿಗಳು ತುಂಬಿ ಹರಿಯುವುದರಿಂದ ಇಂಥ ಕ್ರೀಡೆಗಳು ಸಾಕಷ್ಟು ಅಪಾಯಕಾರಿ. ಈ ಬಗ್ಗೆಯೂ ಎಚ್ಚರವಹಿಸುವುದು ತೀರಾ ಅವಶ್ಯಕವಾಗಿದೆ.
