ಕಾರವಾರ: ಒನ್ ವೇ ಎಂದು ಸೂಚಿಸಿದರೂ ಅನುಮಾನಾಸ್ಪದವಾಗಿ ಚಾಲನೆ ಮಾಡುತ್ತಾ ತೆರಳುತ್ತಿದ್ದ ಪ್ರವಾಸಿ ವಾಹನವೊಂದನ್ನು ತಡೆದ ಹೋಮ್ಗಾರ್ಡ್‌ನನ್ನೇ ವಾಹನದಲ್ಲಿ ಹೊತ್ತೊಯ್ದಿರುವ ಘಟನೆ ಗೋಕರ್ಣದಲ್ಲಿ ನಡೆದಿದ್ದು, ಈ ದೃಶ್ಯ ಸಿಸಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ.
ಗೋಕರ್ಣದ ಮುಖ್ಯ ಕಡಲತೀರದಿಂದ ಒನ್ ವೇದಲ್ಲಿ ಬರುತ್ತಿದ್ದ ಟವೇರಾ ಪ್ರವಾಸಿ ವಾಹನವೊಂದನ್ನು ಹೋಮ್ಗಾರ್ಡ್ ಚಿದಾನಂದ ಶಾನಭಾಗ್ ಎಂಬಾತ ತಡೆದು ಹಿಂದೆ ಹೋಗುವಂತೆ ಸೂಚಿಸಿದ್ದರು. ಆದರೆ, ಅನುಮಾನಾಸ್ಪದವಾಗಿ ವರ್ತಿಸುತ್ತಿದ್ದ ಚಾಲಕನ ನಡೆಯಿಂದ ವಾಹನವನ್ನು ನೋಡಲು ಮುಂದಾದಾಗ ವಾಹನ ಚಲಾಯಿಸಿಕೊಂಡು ತೆರಳಿದ್ದಾರೆ.
ಆದರೆ, ಬಿಡದಂತೆ ವಾಹನವನ್ನು ಗಟ್ಟಿಯಾಗಿ ಹಿಡಿದುಕೊಂಡಿದ್ದ ಹೋಮ್ಗಾರ್ಡ್ನನ್ನು ಕೆಲ ದೂರದವರೆಗೆ ಒಯ್ದು ಬಳಿಕ ದೂಡಿ ಹಾಕಿ ತೆರಳಿದ್ದಾರೆ ಎನ್ನಲಾಗಿದೆ. ವಾಹನದಲ್ಲಿ ಎಳೆದೊಯ್ಯುತ್ತಿರುವ ವಿಡಿಯೋ ಸಿಸಿ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ವಾಹನಕ್ಕಾಗಿ ಪೊಲೀಸರು ಹುಡುಕಾಟ ಆರಂಭಿಸಿದ್ದಾರೆ. ಆದರೆ, ಇನ್ನು ಯಾವುದೇ ಪ್ರಕರಣ ದಾಖಲಾಗಿಲ್ಲ. ವಾಹನ ಪತ್ತೆ ಬಳಿಕ ಪ್ರಕರಣ ದಾಖಲಿಸುವುದಾಗಿ ಪೊಲೀಸರು ತಿಳಿಸಿದ್ದಾರೆ.
