ಕಾರವಾರ: ವರ್ಷಾಂತ್ಯಕ್ಕೆ ಮಕ್ಕಳಿಗೆ ಸಾಲು ಸಾಲು ರಜೆಗಳು ದೊರಕಿವೆ. ಕ್ರಿಸ್ಮಸ್ ಜತೆಗೆ ನ್ಯೂ - ಇಯರ್ ಆಚರಣೆಯನ್ನು ಮಾಡಲು ಕುಟುಂಬ ಸಮೇತ ಪ್ರವಾಸಿ ತಾಣಗಳತ್ತ ಜನರು ಇದೀಗ ಮುಗಿ ಬೀಳುತ್ತಿದ್ದಾರೆ. ಆದರೆ, ಹೊಸ ವರ್ಷಾಚರಣೆ ಅಂದಾಕ್ಷಣ ಗೋವಾದತ್ತ ಮುಖಮಾಡುತ್ತಿದ್ದ ಪ್ರವಾಸಿಗರು ಈ ಬಾರಿ ಕಡಲನಗರಿಯತ್ತ ಲಗ್ಗೆ ಇಡುತ್ತಿದ್ದಾರೆ. ಸಾವಿರಾರು ಸಂಖ್ಯೆಯಲ್ಲಿ ಪ್ರವಾಸಿಗರ ಆಗಮನದಿಂದ ಈಗಾಗಲೇ ಬೀಚ್ಗಳು ಹೌಸ್ ಫುಲ್ ಆಗಿದ್ದು, ಕಡಲತೀರದಲ್ಲಿ ಪ್ರವಾಸಿಗರು ಎಂಜಾಯ್ ಮಾಡುತ್ತಿದ್ದಾರೆ.
ಸದ್ಯ ಕ್ರಿಸ್ಮಸ್ ಕ್ರೇಜ್ನಲ್ಲಿರೋ ಜನರು ಇದೀಗ ನ್ಯೂ - ಇಯರನ್ನು ಗ್ರ್ಯಾಂಡ್ ಆಗಿ ವೆಲ್ ಕಮ್ ಮಾಡೋದಕ್ಕೆ ಸಿದ್ಧತೆ ಮಾಡಿಕೊಳ್ಳುತ್ತಿದ್ದಾರೆ. ಕಳೆದ 3 - 4 ದಿನಗಳಿಂದ ರಾಜ್ಯ ಹೊರರಾಜ್ಯದಿಂದ ಕಾರವಾರದ ಕಡಲ ತೀರದತ್ತ ಸಾವಿರಾರು ಸಂಖ್ಯೆಯಲ್ಲಿ ಪ್ರವಾಸಿಗರು ಹರಿದು ಬರುತ್ತಿದ್ದಾರೆ.
ಗೋವಾಕ್ಕೆ ಹೊಂದಿಕೊಂಡೇ ಇರುವ ಕಾರವಾರದಲ್ಲಿ ಹೆದ್ದಾರಿ ಪಕ್ಕದಲ್ಲೇ ವಿಶಾಲವಾದ ಬೀಚ್ ಇರುವುದರಿಂದ ಗೋವಾಕ್ಕೆ ತೆರಳುವ ಪ್ರವಾಸಿಗರು ಸಹ ಇಲ್ಲಿಗೆ ಭೇಟಿ ನೀಡುತ್ತಿದ್ದಾರೆ. ಗೋವಾ ಕಡಲ ತೀರಗಳಿಗೆ ಹೋಲಿಸಿದರೆ ಕಾರವಾರದ ಠಾಗೋರ್ ಬೀಚ್ ಶಾಂತವಾಗಿದ್ದು, ಕಡಲತೀರದಲ್ಲಿ ಕಿಕ್ಕಿರಿದ ಜನಸಂದಣಿ ಇರುವುದಿಲ್ಲ. ಹೀಗಾಗಿ ಕುಟುಂಬಸ್ಥರು, ಮಕ್ಕಳೊಂದಿಗೆ ನೀರಿನಲ್ಲಿ ಈಜಾಡಿ ಎಂಜಾಯ್ ಮಾಡಲು ಠಾಗೋರ್ ಬೀಚ್‌ನತ್ತ ಆಗಮಿಸುತ್ತಿದ್ದಾರೆ. ಸುಂದರ ಪರಿಸರದ ನಡುವೆ ಠಾಗೋರ್ ಬೀಚ್ ಇದ್ದು ಸ್ವಚ್ಛತೆಯಿಂದ ಸಹ ಕೂಡಿರುವುದರಿಂದ ಕುಟುಂಬಸ್ಥರೊಂದಿಗೆ ಇಲ್ಲಿಗೆ ಹೊಸವರ್ಷಾಚರಣೆಗೆ ಆಗಮಿಸಿದ್ದೀವಿ ಅಂತಾರೇ ಪ್ರವಾಸಿಗರು.
ಇನ್ನು ಠಾಗೋರ್ ಕಡಲತೀರದಲ್ಲಿ ಪ್ರವಾಸಿಗರಿಗೆ ಎಂಜಾಯ್ ಮಾಡಲು ವಿವಿಧ ಬಗೆಯ ಜಲಸಾಹಸ ಕ್ರೀಡೆಗಳು ಸಹ ಇವೆ. ಗೋವಾಕ್ಕೆ ಹೋಲಿಸಿದರೆ ಕಾರವಾರದಲ್ಲಿ ಜಲಸಾಹಸ ಕ್ರೀಡೆಗಳಿಗೆ ಕಡಿಮೆ ಬೆಲೆ ಇದೆ. ಪುಡ್ ಸಹ ಕಡಿಮೆ ದರದಲ್ಲಿ ಸಿಗುತ್ತವೆ. ಹೀಗಾಗಿ ಗೋವಾಕ್ಕಿಂತ ಕಾರವಾರ ಎಂಜಾಯ್ ಮಾಡೋದಕ್ಕೆ ಉತ್ತಮ ತಾಣ ಅಂತಾ ಪ್ರವಾಸಿಗರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಪ್ರವಾಸಿ ಸ್ಥಳಗಳಲ್ಲಿ ಪ್ರವಾಸಿಗರ ಸುರಕ್ಷತೆಯ ದೃಷ್ಟಿಯಿಂದ ಹೆಚ್ಚಿನ ಭದ್ರತೆ ವ್ಯವಸ್ಥೆ ಮಾಡಲಾಗಿದೆ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.
ಇನ್ನು ಕಾರವಾರದಲ್ಲಿ ಕೇವಲ ಠಾಗೋರ್ ಬೀಚ್ ಮಾತ್ರವಲ್ಲದೇ ರಾಕ್ ಗಾರ್ಡನ್, ಕಾಳಿ ರಿವರ್ ಗಾರ್ಡನ್, ಅಲ್ಲದೇ ಜಿಲ್ಲೆಯ ಮುರುಡೇಶ್ವರ, ಗೋಕರ್ಣ, ಹೊನ್ನಾವರ ಕಡಲತೀರಗಳಿಗೆ ಸಹ ಪ್ರವಾಸಿಗರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸುತ್ತಿದ್ದಾರೆ. ಕ್ರಿಸ್ಮಸ್ ಆಚರಣೆ ಬೆನ್ನಲ್ಲೇ ನೂತನ ವರ್ಷವನ್ನು ಬರಮಾಡಿಕೊಳ್ಳಲು ದಿನಗಣನೆ ಪ್ರಾರಂಭವಾಗಿದ್ದು, ಕರಾವಳಿಯತ್ತ ಪ್ರವಾಸಿಗರ ದಂಡೇ ಹರಿದು ಬರುತ್ತಿದೆ.
ಇದನ್ನೂ ಓದಿ: ಹೊಸ ವರ್ಷ, ಕ್ರಿಸ್ಮಸ್ ಎಫೆಕ್ಟ್: ಕೊಡಗು ತುಂಬೆಲ್ಲಾ ಪ್ರವಾಸಿಗರು
