ಕಾರವಾರ: ಅದು ನೌಕಾನೆಲೆ ವ್ಯಾಪ್ತಿಯ ಸಮುದ್ರ ಮಧ್ಯದ ದ್ವೀಪ. ಒಂದು ಕಾಲದಲ್ಲಿ ಹಿಂದೂ ಮತ್ತು ಕ್ರಿಶ್ಚಿಯನ್ನರು ಇಲ್ಲಿನ ದೇವಸ್ಥಾನ ಹಾಗೂ ಚರ್ಚ್ಗಳಿಗೆ ತೆರಳಿ ಪೂಜೆ ಸಲ್ಲಿಸುತ್ತಿದ್ದರು. ನೌಕಾನೆಲೆ ಸ್ಥಾಪನೆಯಾದ ಬಳಿಕ ಭದ್ರತಾ ದೃಷ್ಟಿಯಿಂದ ಅಲ್ಲಿ ಧಾರ್ಮಿಕ ಆಚರಣೆಗಳಿಗೆ ನಿರ್ಬಂಧ ಹೇರಲಾಗಿದೆ. ಇದೀಗ ಗೋವಾದ ಕ್ರಿಶ್ಚಿಯನ್ನರು ಅಂಜುದೀವ್ ದ್ವೀಪದ ಪ್ರವೇಶಕ್ಕೆ ಅವಕಾಶ ಕೋರಿ ಪ್ರಧಾನಿ ಮೋದಿಗೆ ಪತ್ರ ಬರೆದಿರುವುದು ಹಿಂದೂ ಸಮುದಾಯದವರ ಕೆಂಗಣ್ಣಿಗೆ ಗುರಿಯಾಗಿದೆ.
ಕಾರವಾರದ ಬಿಣಗಾ ಬಳಿ ಅರಬ್ಬಿ ಸಮುದ್ರದಲ್ಲಿರುವ ಅಂಜುದೀವ್ ದ್ವೀಪ ಕದಂಬ ನೌಕಾನೆಲೆ ಪ್ರಾರಂಭವಾದ ಬಳಿಕ ನಿಷೇಧಕ್ಕೊಳಗಾಗಿದೆ. ವಿಚಿತ್ರ ಅಂದ್ರೆ ಈ ದ್ವೀಪ ಕಾರವಾರಕ್ಕೆ ಸಮೀಪವಿದ್ರು ಗೋವಾ ವ್ಯಾಪ್ತಿಗೆ ಬರುತ್ತದೆ. ಇದು ಪ್ರವಾಸಿಗರ ಅಚ್ಚುಮೆಚ್ಚಿನ ತಾಣವೂ ಆಗಿತ್ತು.
ಪೊರ್ಚುಗೀಸರು ಈ ಪ್ರದೇಶದಲ್ಲಿ ನಿರ್ಮಿಸಿದ ಚರ್ಚ್ನಲ್ಲಿ ಪ್ರತಿ ವರ್ಷ ಧಾರ್ಮಿಕ ಆಚರಣೆ ನಡೆಸುತ್ತಿದ್ದರೆ, ಹಿಂದೂಗಳು ಅಂಜದುರ್ಗಾ ದೇವಿ ದೇವಸ್ಥಾನದಲ್ಲಿ ಪೂಜೆ ಸಲ್ಲಿಸುತ್ತಿದ್ದರು. 1991ರಲ್ಲಿ ಕದಂಬ ನೌಕಾನೆಲೆ ಯೋಜನೆ ವ್ಯಾಪ್ತಿಗೆ ದ್ವೀಪವನ್ನು ಹಸ್ತಾಂತರಿಸಲಾಯ್ತು. ಭದ್ರತೆ ದೃಷ್ಟಿಯಿಂದ 2000ರ ನಂತರ ಸಾರ್ವಜನಿಕರಿಗೆ ನಿರ್ಬಂಧ ವಿಧಿಸಿತ್ತು. ಅದರಂತೆ ಚರ್ಚ್ ಹಾಗೂ ದೇವಸ್ಥಾನಗಳಿಗೂ ಪ್ರವೇಶ ನಿಷೇಧಿಸಲಾಗಿತ್ತು.
ದ್ವೀಪ ಪ್ರವೇಶಕ್ಕೆ ಕ್ರಿಶ್ಚಿಯನ್ನರು ಅನೇಕ ಬಾರಿ ಸರ್ಕಾರಕ್ಕೆ ಮನವಿ ಸಲ್ಲಿಸಿದ್ದರೂ ಅವಕಾಶ ನೀಡಿರಲಿಲ್ಲ. ಈಗ ಅವಕಾಶಕ್ಕಾಗಿ ಕ್ರಿಶ್ಚಿಯನ್ನರು ಪ್ರಧಾನಿ ಕಾರ್ಯಾಲಯಕ್ಕೆ ಮತ್ತೆ ಪತ್ರ ಬರೆದಿದ್ದಾರೆ. ಇದು ಹಿಂದೂ ಸಂಘಟನೆಗಳ ವಿರೋಧಕ್ಕೆ ಕಾರಣವಾಗಿದೆ. ದೇಶದ ಹಿತದೃಷ್ಟಿಯಿಂದ ನಾವೂ ಇಲ್ಲಿನ ಧಾರ್ಮಿಕ ಕೇಂದ್ರಗಳಿಗೆ ತೆರಳುತ್ತಿರಲಿಲ್ಲ. ಒಂದು ವೇಳೆ ಕ್ರಿಶ್ಚಿಯನ್ನರಿಗೆ ಕೊಟ್ಟರೆ ನಮಗೂ ಅವಕಾಶ ಕೊಡಿ ಎನ್ನುತ್ತಾರೆ ಹಿಂದೂ ಜಾಗರಣ ವೇದಿಕೆಯ ಕಾರ್ಯಕರ್ತ ಬಿಎಸ್.ಪೈ.
ಅಂಜದುರ್ಗಾ ದೇವಿ ದೇವಸ್ಥಾನ ಇದ್ದಿದ್ದರಿಂದಲೇ ದ್ವೀಪಕ್ಕೆ ಅಂಜುದೀವ್ ಎಂಬ ಹೆಸರು ಬಂದಿದೆ. ಈಗಲೂ ಮೊದಲಿನಂತೆಯೇ ನಿಷೇಧ ಮುಂದುವರೆಸಬೇಕು. ಎರಡೂ ಸಮುದಾಯದವರ ಭಾವನೆಗಳಿಗೆ ಧಕ್ಕೆಯಾಗದಂತೆ ನೋಡಿಕೊಳ್ಳಬೇಕು ಎಂಬುದು ಸಾರ್ವಜನಿಕರ ಅಭಿಪ್ರಾಯವಾಗಿದೆ.
ಅಂಜದುರ್ಗಾ ದೇವಿ ಮೀನುಗಾರರ ಆರಾಧ್ಯ ದೈವವಾಗಿದ್ದು, ದೇವಿಗೆ ಪೂಜೆ ಸಲ್ಲಿಸಿದ ಬಳಿಕವೇ ಅವರು ಮೀನುಗಾರಿಕೆಗೆ ತೆರಳುತ್ತಿದ್ದರು. ನೌಕಾನೆಲೆ ಪ್ರಾರಂಭವಾದ ಬಳಿಕ ಮೀನುಗಾರರೂ ದ್ವೀಪಕ್ಕೆ ತೆರಳುತ್ತಿಲ್ಲ. ಕ್ರಿಶ್ಚಿಯನ್ನರು ದ್ವೀಪ ಪ್ರವೇಶಕ್ಕೆ ಅವಕಾಶ ನೀಡುವಂತೆ ಒತ್ತಾಯಿಸಲು ಮುಂದಾಗಿರೋದು ಸಾಕಷ್ಟು ಆಕ್ರೋಶಕ್ಕೆ ಕಾರಣವಾಗಿದೆ.
