ಕಾರವಾರ: 9 ಅಡಿ ಉದ್ದದ ಬೃಹತ್ ಗಾತ್ರದ ಹೆಬ್ಬಾವೊಂದು ಒಂದು ದಿನದ ಹಿಂದೆಯಷ್ಟೇ ಜನಿಸಿದ್ದ ಎಮ್ಮೆಕರುವನ್ನು ಕೊಂದು, ಅದನ್ನು ಭಕ್ಷಿಸಲು ದಿನವಿಡಿ ವಿಫಲ ಯತ್ನ ನಡೆಸಿರುವ ಘಟನೆ ಇಲ್ಲಿನ ಸೋನಾರವಾಡದಲ್ಲಿ ನಡೆದಿದೆ.
ಸೋನಾರವಾಡದ ಬಳಿ ಪಾಳು ಬಿದ್ದ ಗದ್ದೆ ಬಯಲಿನಲ್ಲಿ ಎಮ್ಮೆಯೊಂದು ಒಂದು ದಿನದ ಹಿಂದೆ ಜನಿಸಿದ್ದ ಕರುವಿನೊಂದಿಗೆ ಮೇಯಲು ತೆರಳಿತ್ತು. ಈ ವೇಳೆ ಹೆಬ್ಬಾವು ಕರುವಿನ ಮೇಲೆ ದಾಳಿ ಮಾಡಿದ್ದು, ಬೆಳಗ್ಗೆಯಿಂದಲೂ ನೀರು ತುಂಬಿದ ಗದ್ದೆಯಲ್ಲಿ ಕರು ಹೆಬ್ಬಾವಿನ ಬಾಯಿಗೆ ಸಿಲುಕಿ ಒದ್ದಾಡುತ್ತಿತ್ತು. ಎಮ್ಮೆ ಕೂಡ ತನ್ನ ಕರುವನ್ನು ಉಳುಸಿಕೊಳ್ಳಲು ಪ್ರಯತ್ನಿಸಿತ್ತು. ಆದರೆ ಇದನ್ನು ದೂರದಿಂದಲೇ ನೋಡಿದ್ದ ಸ್ಥಳೀಯರು ಎಮ್ಮೆಕರುವನ್ನು ರಕ್ಷಣೆಗೆ ಧಾವಿಸಿರಲಿಲ್ಲ.
ಕೊನೆಗೆ ಸಂಜೆಯಾದರೂ ಎಮ್ಮೆ ಅಲ್ಲಿಯೇ ನಿಂತಿರುವುದನ್ನು ಗಮನಿಸಿ ಕೆಲವರು ಹೋಗಿ ನೋಡಿದಾಗ ಅಷ್ಟರಲ್ಲಿ ಕರು ಸಾವನ್ನಪ್ಪಿತ್ತು. ಬಳಿಕ ಅರಣ್ಯ ಇಲಾಖೆ ಸಿಬ್ಬಂದಿಗೆ ಸ್ಥಳೀಯರು ಮಾಹಿತಿ ನೀಡಿದ್ದಾರೆ. ಆಗ ಸ್ಥಳಕ್ಕಾಗಮಿಸಿದ ಸಿಬ್ಬಂದಿ ಕರುವಿನ ತಲೆ ನುಂಗಿದ್ದ ಹೆಬ್ಬಾವನ್ನು ಬೆರ್ಪಡಿಸಿ ಸೆರೆ ಹಿಡಿದಿದ್ದಾರೆ. ಹಾವನ್ನು ಕಾಡಿಗೆ ಬಿಡುವುದಾಗಿ ಅರಣ್ಯ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.
ಆದರೆ ಆಗ ತಾನೆ ಜನಿಸಿದ ಕರುವನ್ನು ಕಳೆದುಕೊಂಡ ತಾಯಿ ಎಮ್ಮೆಯ ಮೂಖ ರೋಧನೆ ನೆರೆದವರ ಕರಳು ಹಿಂಡುವಂತಿತ್ತು.
