ನನ್ನ ಕಂಡರೆ ಸಿಎಂಗೆ ಏಕೋ ಭಯ: ವಿನಯ ಕೆ.ಸಿ ರಾಜಾವತ್

ರಾಜ್ಯದ ಉಪ ಚುನಾವಣೆಯಲ್ಲಿ ಮುಖ್ಯಮಂತ್ರಿಗಳ ಅಭಿವೃದ್ಧಿ ನೋಡಿ ಅಥವಾ ಅವರ ಮುಖ ನೋಡಿ ಜನರು ಮತ ನೀಡಿಲ್ಲ ,ಅವರು ನೀಡಿರುವ ಗಾಂಧಿ ನೋಟು ನೋಡಿ ಮತ ನೀಡಿದ್ದಾರೆ ಎಂದು ವಿನಯ ಕೆ.ಸಿ ರಾಜಾವತ್​ ಆರೋಪಿಸಿದ್ದಾರೆ.

ಶಿವಮೊಗ್ಗ: ನನ್ನ ಕಂಡರೆ ಮುಖ್ಯಮಂತ್ರಿ ಯಡಿಯೂರಪ್ಪಗೆ ಭಯ ಏಕೆ ಎಂದು ಅರ್ಥವಾಗುತ್ತಿಲ್ಲ ಎಂದು ವಿದ್ಯಾರ್ಥಿ ಸಂಘಟನೆಯ ರಾಜ್ಯಾಧ್ಯಕ್ಷ ವಿನಯ ಕೆ.ಸಿ ರಾಜಾವತ್ ಹೇಳಿದರು.

ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದಅವರು, ಈ ನಾಡಿನ ದೊರೆಯಾಗಿ ನನ್ನಂತ ಒಬ್ಬ ಸಾಮಾನ್ಯನಿಗೆ ಬಿ.ಎಸ್. ಯಡಿಯೂರಪ್ಪ ಏಕೆ ಹೆದರುತ್ತಾರೆ ಎಂದು ಗೊತ್ತಿಲ್ಲ ಅಂದ್ರು. ಮುಖ್ಯಮಂತ್ರಿಗಳು ಶಿವಮೊಗ್ಗ ಪ್ರವಾಸ ಕೈಗೊಂಡ ವೇಳೆ ಪೊಲೀಸರು ನನ್ನನ್ನು ವಶಕ್ಕೆ ತೆಗೆದುಕೊಳ್ಳುತ್ತಾರೆ ಏಕೆ ಎಂದು ಗೊತ್ತಿಲ್ಲ ಎಂದರು. ಅನ್ಯಾಯದ ವಿರುದ್ಧ ಹೋರಾಟ ಮಾಡುವರ ವಿರುದ್ಧ ಪೊಲೀಸ್​ ಇಲಾಖೆಯನ್ನು ದುರ್ಬಳಕೆ ಮಾಡಿಕೊಂಡು ಹೋರಾಟಗಾರರನ್ನು ಹತ್ತಿಕ್ಕುವ ಕೆಲಸವನ್ನು ಮುಖ್ಯಮಂತ್ರಿಗಳು ಮಾಡುತ್ತಿದ್ದಾರೆ ಎಂದು ಆರೋಪಿಸಿದರು.

ರಾಜ್ಯದ ಉಪ ಚುನಾವಣೆಯಲ್ಲಿ ಮುಖ್ಯಮಂತ್ರಿಗಳ ಅಭಿವೃದ್ಧಿ ನೋಡಿ ಅಥವಾ ಅವರ ಮುಖ ನೋಡಿ ಜನರು ಮತ ನೀಡಿಲ್ಲ. ಅವರು ನೀಡಿರುವ ಗಾಂಧಿ ನೋಟು ನೋಡಿ ಮತ ನೀಡಿದ್ದಾರೆ ಎಂದು ದೂರಿದರು. ಯಡಿಯೂರಪ್ಪ ಜನರ ಸಮಸ್ಯೆಗಳಿಗೆ ಸ್ಪಂದಿಸದೇ ಸ್ವ ಹಿತಾಸಕ್ತಿಗಾಗಿ ರಾಜಕೀಯ ಮಾಡುತ್ತಿದ್ದಾರೆ. ರಾಜ್ಯದ ಅಭಿವೃದ್ಧಿ ಮಾಡದೇ ,ಜನರ ಸಮಸ್ಯೆಗಳಿಗೆ ಸ್ಪಂದಿಸದೆ ಇದ್ದರೆ , ವಿದ್ಯಾರ್ಥಿ ಸಂಘಟನೆ ಮೂಲಕ ತ್ರಿಕೋನ ಚಳವಳಿ ಹಮ್ಮಿಕೊಂಡು ಸರ್ಕಾರ ಉರುಳಿಸುತ್ತೇವೆ ಎಂದು ಎಚ್ಚರಿಸಿದರು.