ಗೋ ಹತ್ಯೆ ನಿಷೇಧ ಕಾಯ್ದೆ ಬಗ್ಗೆ ಅಧಿಕಾರಿಗಳಲ್ಲಿ ಮಾಹಿತಿ ಕೊರತೆ: ಹಣೆ ಚಚ್ಚಿಗೊಂಡ ಸಚಿವ ಚೌಹಾಣ್

ಸಚಿವ ಪ್ರಭು ಚೌಹಾಣ್ ಅವರು ಸಿಎಂ ತವರು ಜಿಲ್ಲೆ ಶಿವಮೊಗ್ಗದಲ್ಲಿ ಪಶುಪಾಲನಾ ಇಲಾಖೆಯ ಕೆಡಿಪಿ ಸಭೆ ನಡೆಸಿದರು. ಈ ವೇಳೆ ಅಧಿಕಾರಿಗಳಿಗೆ ಹೊಸದಾಗಿ ಜಾರಿಯಾಗಿರುವ ಗೋ ಹತ್ಯೆ ನಿಷೇಧ ಕಾಯ್ದೆಯ ಬಗ್ಗೆ ಮಾಹಿತಿ ಇಲ್ಲದಿರುವುದನ್ನು ಕಂಡು ತಲೆ ಚಚ್ಚಿಕೊಂಡರು.

ಶಿವಮೊಗ್ಗ: ಗೋ ಹತ್ಯೆ ನಿಷೇಧ ಕಾನೂನಿನ ಬಗ್ಗೆ ಅಧಿಕಾರಿಗಳಿಗೆ ಸರಿಯಾದ ಮಾಹಿತಿ ಇಲ್ಲದೆ ಇರುವುದನ್ನು ಕಂಡು ಪಶುಸಂಗೋಪನೆ ಸಚಿವ ಪ್ರಭು ಚೌಹಾಣ್ ಸಿಟ್ಟಾದ ಘಟನೆ ನಡೆಯಿತು.

ಪ್ರಭು ಚೌಹಾಣ್ ಅವರು ಜಿಲ್ಲಾಧಿಕಾರಿಗಳ ಕಚೇರಿಯಲ್ಲಿ ಪಶುಪಾಲನಾ ಇಲಾಖೆಯ ಕೆಡಿಪಿ ಸಭೆ ನಡೆಸಿದರು. ಈ ವೇಳೆ ಅಧಿಕಾರಿಗಳ ಜೊತೆ ಹೊಸದಾಗಿ ಗೋ ಹತ್ಯೆ ನಿಷೇಧ ಕಾನೂನು ಹಾಗೂ ಶಿಕ್ಷೆಯ ಕುರಿತು ಮಾಹಿತಿ ಕೇಳಿದ್ದಾರೆ. ಆದ್ರೆ ಈ ವೇಳೆ, ತಾಲೂಕು ವೈದ್ಯಾಧಿಕಾರಿಗಳು ಸರಿಯಾದ ಉತ್ತರ ನೀಡಲಿಲ್ಲ.

ಉಪ‌ ನಿರ್ದೇಶಕರಿಗೆ ಖಡಕ್​​ ವಾರ್ನಿಂಗ್​:

ಜಿಲ್ಲೆಯ ಎಲ್ಲಾ ಉಪ‌ ನಿರ್ದೇಶಕರಿಗೆ ಗೋ ಹತ್ಯೆ ನಿಷೇಧ ಕಾನೂನಿನ ಬಗ್ಗೆ ತಿಳಿಸಬೇಕು ಎಂದು ತಿಳಿಸಿದ ಸಚಿವರು, ಕಾನೂನಿನ ಬಗ್ಗೆ ಮಾಹಿತಿ ನೀಡುವ ದಿನಾಂಕವನ್ನು ನಿರ್ದೇಶಕರಿಂದ ಪಡೆದುಕೊಂಡರು. ಇದೇ ವೇಳೆ, ಮಾಹಿತಿ ನೀಡುವ ಕಾರ್ಯಕ್ರಮದ ಫೋಟೊವನ್ನು ತನಗೆ ವಾಟ್ಸಾಪ್ ಮಾಡುವಂತೆಯೂ ಖಡಕ್​ ಆಗಿ ತಿಳಿಸಿದರು.

ಬಳಿಕ ಕಾನೂನಿನಡಿ ಎಷ್ಟು ಎಫ್​​ಐಆರ್ ದಾಖಲಾಗಿವೆ ಎಂದು ಎಸ್ಪಿ ಬಳಿ ಕೇಳಿದಾಗ, ಅವರು 7 ಎಫ್​​ಐಆರ್ ದಾಖಲಾಗಿದೆ ಎಂದರು. ಇಂತಹ ದೂರುಗಳು ಬಂದಾಗ ತಕ್ಷಣ ಪಡೆದು ಕಾರ್ಯಪ್ರವೃತ್ತರಾಗಬೇಕು ಎಂದು ಸಚಿವರು ಸೂಚನೆ ನೀಡಿದರು.

ಇದನ್ನೂ ಓದಿ: ಪ್ರಿಯತಮೆ ಪ್ರೀತಿ ಒಪ್ಪಲಿಲ್ಲ ಅಂತ ವಾಹನಗಳ ಪುಡಿಗಟ್ಟಿ ಭಗ್ನಪ್ರೇಮಿಯ ಪುಂಡಾಟಿಕೆ

ಉಪ‌ ನಿರ್ದೇಶಕರು, ಪಶು ವೈದ್ಯರು ತಮ್ಮ ತಮ್ಮ ಕೇಂದ್ರ ಸ್ಥಾನವನ್ನು ಬಿಟ್ಟು ಹೋಗಬಾರದು. ಪಶು ವೈದ್ಯರು ತಮ್ಮ ಮೊಬೈಲ್​ಗಳನ್ನು ಸ್ವಿಚ್‌ಆಫ್ ಮಾಡಬಾರದು. ಒಂದು ವೇಳೆ ಕೆಲಸ ಮಾಡಲು ಆಗಲ್ಲ ಅಂದ್ರೆ, ವರ್ಗಾವಣೆ ಮಾಡಿ‌ಕೊಂಡು ಹೋಗಲಿ, ಇಲ್ಲವೇ ಕೆಲಸವೇ ಬಿಟ್ಟು ಹೋಗಲಿ ಎಂದು‌ ಎಚ್ಚರಿಕೆ ಕೊಟ್ಟರು.