ಡಿಕೆಶಿಗೆ ಮತ್ತೆ ಇಡಿ ಕಸ್ಟಡಿ ಸಾಧ್ಯತೆ: ರಾಮನಗರದಲ್ಲಿ ಬಿಗಿ ಪೊಲೀಸ್​ ಬಂದೋಬಸ್ತ್​​​

ಮಾಜಿ ಸಚಿವ ಡಿ.ಕೆ.ಶಿವಕುಮಾರ್ ಕಸ್ಟಡಿ ಇಂದು ಮುಕ್ತಾಯ ಹಿನ್ನೆಲೆಯಲ್ಲಿ ಯಾವುದೇ ಅಹಿತಕರ ಘಟನೆ ನಡೆಯದಂತೆ ಕನಕಪುರದಲ್ಲಿ ಪೊಲೀಸ್ ಬಂದೋಬಸ್ತ್​​​ಗೆ ಸಜ್ಜಾಗಿದೆ. ಡಿಕೆಶಿಯವರನ್ನ ಮತ್ತೆ ಇಡಿ ಕಸ್ಟಡಿಗೆ ಪಡೆಯಬಹುದು ಎಂಬ ಶಂಕೆಯೂ ಇದ್ದು, ಮುನ್ನೆಚ್ಚರಿಕಾ ಕ್ರಮ ಕೈಗೊಳ್ಳಲಾಗಿದೆ.

ರಾಮನಗರ: ಜಾರಿ ನಿರ್ದೆಶನಾಲಯದ‌ ಬಂಧನದಲ್ಲಿರುವ ಮಾಜಿ ಸಚಿವ ಡಿ.ಕೆ.ಶಿವಕುಮಾರ್ ಕಸ್ಟಡಿ ಇಂದು ಮುಕ್ತಾಯವಾಗುತ್ತಿರುವ ಹಿನ್ನೆಲೆ ಕನಕಪುರದಲ್ಲಿ ಪೊಲೀಸರ ಕಣ್ಗಾವಲಿದೆ. ಯಾವುದೇ ಅಹಿತಕರ ಘಟನೆ ನಡೆಯದಂತೆ ಮುನ್ನೆಚ್ಚರಿಕೆ ವಹಿಸಿರುವ ಪೊಲೀಸ್ ಇಲಾಖೆ, ಬಿಗಿ ಬಂದೋಬಸ್ತ್​ಗೆ ಸಜ್ಜಾಗಿದೆ.

ಡಿಕೆಶಿಯವರನ್ನ ಮತ್ತೆ ಇಡಿ ಕಸ್ಟಡಿಗೆ ಪಡೆಯಬಹುದು ಎಂಬ ಶಂಕೆ ಹೆಚ್ಚಾಗಿದೆ. ಡಿ.ಕೆ.ಶಿವಕುಮಾರ್​ಗೆ ಜಾಮೀನು ನೀಡಿದರೆ ತನಿಖೆಗೆ‌ ತೊಂದರೆಯಾಗುವುದಲ್ಲದೆ, ಆರೋಪಿ ಹೊರಗಿದ್ದರೆ ಸಾಕ್ಷಿಗಳನ್ನು ಬೆದರಿಸಿ ನಾಶ ಪಡಿಸುವ ಸಾಧ್ಯತೆ ಹೆಚ್ಚಾಗಿದೆ ಎಂದು ಇಡಿ ಅಭಿಪ್ರಾಯಪಟ್ಟಿದ್ದು, ಕೋರ್ಟ್​ಗೆ ಜಾಮೀನು ನೀಡದಂತೆ‌ ಮನವಿ‌ ಮಾಡಿದೆ.

ಡಿಕೆಶಿ ಅಭಿಮಾನಿಗಳು ರಸ್ತೆಗಿಳಿದು ಟೈರ್​ಗೆ ಬೆಂಕಿ ಹಚ್ಚಿ ಪರಿಸ್ಥಿತಿ ವಿಕೋಪಕ್ಕೆ ತಿರುಗುವ ಸಾಧ್ಯತೆ ಇದೆ. ಈ ಹಿನ್ನೆಲೆಯಲ್ಲಿ ಕನಕಪುರ ತಾಲೂಕಿನಾದ್ಯಂತ ಬಿಗಿ ಬಂದೋಬಸ್ತ್ ಮಾಡಿರುವ ಜಿಲ್ಲಾ ಎಸ್​​​​ಪಿ ಅನೂಪ್ ಶೆಟ್ಟಿ, ಮುನ್ನೆಚ್ಚರಿಕೆ ಕ್ರಮವಾಗಿ ಓರ್ವ ಎಎಸ್ಪಿ ನೇತೃತ್ವದಲ್ಲಿ ಡಿವೈಎಸ್ಪಿ, ಸಿಪಿಐ, ಪಿಎಸ್ಐ, ಎಎಸ್ಐ, 4 ಡಿಆರ್ ತುಕಡಿ, 4 ಕೆಎಸ್ಆರ್​ಪಿ ತುಕಡಿ ನಿಯೋಜನೆಗೊಳಿಸಿ ಕಟ್ಟೆಚ್ಚರ ವಹಿಸಿದ್ದಾರೆ.