ರಾಯಚೂರು : ಮಂತ್ರಾಲಯದ ಶ್ರೀರಾಘವೇಂದ್ರ ಸ್ವಾಮಿಗಳ 350ನೇ ಆರಾಧನಾ ಮಹೋತ್ಸವ ಹಿನ್ನೆಲೆಯಲ್ಲಿ ಇಂದು ಉತ್ತಾರಾರಾಧಾನೆ ನಿಮಿತ್ತವಾಗಿ ಮಹಾ ರಥೋತ್ಸವ ನಡೆಯಿತು. ಶ್ರೀಮಠದ ರಥ ಬೀದಿಗಳಲ್ಲಿ ಪ್ರಹ್ಲಾದ ರಾಜರ ಮೂರ್ತಿಯನ್ನು ಇರಿಸಿ ಮಹಾ ರಥೋತ್ಸವ ನೆರವೇರಿಸಲಾಯಿತು. ವಿವಿಧ ಕಲಾ ತಂಡಗಳು, ವಾದ್ಯ-ಮೇಳಗಳೊಂದಿಗೆ ವೈಭವದ ರಥೋತ್ಸವ ಜರುಗಿತು.
ರಥವನೇರಿದ ಶ್ರೀ ಗುರು ರಾಘವೇಂದ್ರ ರಾಯರು..
ಶ್ರೀಗುರು ರಾಯರು ಬೃಂದಾವನಸ್ಥರಾಗಿ 350 ವರ್ಷಗಳು ಸಂದಿವೆ. ಉತ್ತಾರಾರಾಧನೆ ವಿಶೇಷವಾಗಿ ಮೂಲ ಬೃಂದಾವನಕ್ಕೆ ಪುಷ್ಪಾಂಲಕಾರ ಮಾಡಲಾಗಿತ್ತು. ವಿಶೇಷ ಪೂಜೆ-ಪುನಸ್ಕಾರಗಳನ್ನು ನೆರವೇರಿಸಲಾಯಿತು.
ರಥೋತ್ಸವದ ಹಿನ್ನೆಲೆಯಲ್ಲಿ ಸ್ಥಳೀಯ ಹಾಗೂ ದೇಶದ ನಾನಾ ಭಾಗಗಳಿಂದ ಸಾವಿರಾರು ಭಕ್ತರು ಆಗಮಿಸಿದ್ದಾರೆ. ರಥೋತ್ಸವ ಚಾಲನೆಗೂ ಮುನ್ನ ಪೀಠಾಧಿಪತಿಗಳಾದ ಶ್ರೀ ಸುಬುಧೇಂದ್ರ ತೀರ್ಥರು ಆಶೀರ್ವಚನ ನೀಡಿದರು.
