ಮೈಸೂರು: ರೈತರ ಸಂಚಾರಕ್ಕೆ ಹಸಿರು ಪಾಸ್ಗಳನ್ನು ನೀಡಲಾಗುವುದು. ಇದರಿಂದಾಗಿ ರೈತರು ಜಿಲ್ಲೆ ಹಾಗೂ ಅಂತರ್ರಾಜ್ಯಗಳಿಗೆ ತರಕಾರಿ ಮಾರಾಟ ಮಾಡಲು ಹೋಗಬಹುದು ಎಂದು ಕೃಷಿ ಸಚಿವ ಬಿ ಸಿ ಪಾಟೀಲ್ ಹೇಳಿದರು.
ನಗರದಲ್ಲಿ ಮಾತನಾಡಿದ ಅವರು, ಕೇರಳದ ಗಡಿಯಲ್ಲಿ ಹೆಚ್ಚು ಕೊರೊನಾ ಸೋಂಕು ಇರುವುದರಿಂದ ರಾಜ್ಯಕ್ಕೆ ಕೇರಳದಿಂದ ಸಂಪರ್ಕಿಸುವ ಚೆಕ್ ಪೋಸ್ಟ್ ತೆರೆಯುವುದಿಲ್ಲ. ವಾಹನಗಳ ಸಂಚಾರವೂ ಇರಲ್ಲ ಎಂದರು.
ರೈತರಿಗೆ ನೀಡುವ ಹಸಿರು ಪಾಸ್ಗಳನ್ನು ಬಳಸಿ ಅಂತರ್ರಾಜ್ಯಗಳಿಗೆ ತರಕಾರಿ ಮಾರಾಟ ಮಾಡಲು ಹೋಗಬಹುದು. ಅಗತ್ಯಕ್ಕೆ ಮಾತ್ರ ಪಾಸ್ ನೀಡಲಾಗುವುದು. ಅನಗತ್ಯ ಸಂಚಾರಕ್ಕೆ ಯಾವುದೇ ಪಾಸ್ ನೀಡುವುದಿಲ್ಲ. ರೈತರು ಬೆಳೆಯನ್ನು ನಾಶ ಮಾಡಬಾರದು ಎಂದು ಇದೇ ವೇಳೆ ಮನವಿ ಮಾಡಿದರು.
ರೈತರ ಬೆಳೆಗಳನ್ನು ಈಗಾಗಲೇ ಹಾಪ್ಕಾಮ್ಸ್ಗಳಲ್ಲಿ ಖರೀದಿ ಮಾಡಲಾಗುತ್ತಿದೆ. ಬೆಂಬಲ ಬೆಲೆ ನೀಡುವ ಬಗ್ಗೆ ಮುಖ್ಯಮಂತ್ರಿಗಳೊಂದಿಗೆ ಚರ್ಚೆ ಮಾಡುತ್ತೀನಿ. ತರಕಾರಿ ಕೆಡದಂತೆ ಇಡಲು ಕೋಲ್ಡ್ ಸ್ಟೋರೇಜ್ ವ್ಯವಸ್ಥೆ ಮಾಡಲಾಗುವುದು ಎಂದರು. ಜುಬಲಿಯಂಟ್ ಪ್ರಕರಣದಿಂದ ನಂಜನಗೂಡಿಗೆ ಯಾರೂ ಹೋಗುತ್ತಿಲ್ಲ. ಜಿಲ್ಲೆಯ ಕೃಷಿ ಇಲಾಖೆ ಸಿಬ್ಬಂದಿಯೇ ಮನೆಮನೆಗೆ ತರಕಾರಿ ಸಾಗಿಸುವ ವ್ಯವಸ್ಥೆ ಮಾಡುತ್ತಿದ್ದಾರೆ ಎಂದರು.
