ಪೊಲೀಸ್ ಠಾಣೆ ಮುಂದೆ ಆತ್ಮಹತ್ಯೆಗೆ ಮುಂದಾದ ದಂಪತಿ

ಹೆಚ್.ಡಿ.ಕೋಟೆ ಪೊಲೀಸ್ ಠಾಣೆಯಲ್ಲಿ ವಾಹನ ಚಾಲಕನಾಗಿ ಕಾರ್ಯನಿರ್ವಹಿಸುವ ನಾಗೇಶ್ ಆಸ್ತಿ ವಿಚಾರವಾಗಿ ತನ್ನ ಅತ್ತೆ ಜೊತೆ ಜಗಳವಾಡಿಕೊಂಡು ನನಗೆ ನ್ಯಾಯ ಸಿಗುತ್ತಿಲ್ಲ ಎಂದು ಆರೋಪಿಸಿ ಪೊಲೀಸ್​ ಠಾಣೆಯ ಮುಂದೆಯೇ ವಿಷ ಕುಡಿದಿದ್ದಾನೆ.

ಮೈಸೂರು: ಅತ್ತೆ ಮನೆಯ ಆಸ್ತಿಗಾಗಿ ಪೊಲೀಸ್ ಪೇದೆ ತನ್ನ ಹೆಂಡತಿಯೊಂದಿಗೆ ಪೊಲೀಸ್ ಠಾಣೆ ಎದುರು ವಿಷದ ಬಾಟಲ್ ಹಿಡಿದುಕೊಂಡು ನನಗೆ ನ್ಯಾಯ ಸಿಗುತ್ತಿಲ್ಲವೆಂದು ವಿಷ ಕುಡಿದು ಆಸ್ಪತ್ರೆಗೆ ಸೇರಿರುವ ಘಟನೆ ಹೆಚ್.ಡಿ.ಕೋಟೆ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದೆ.

ಪೊಲೀಸ್​ ಠಾಣೆಯ ವಾಹನ ಚಾಲಕನಾಗಿರುವ ನಾಗೇಶ್ (31) ಕಳೆದ 5 ತಿಂಗಳ ಹಿಂದೆ ಹೆಚ್.ಡಿ.ಕೋಟೆ ತಾಲೂಕಿನ ಬೂದನೂರು ಗ್ರಾಮದ ಲಾವಣ್ಯ ಎಂಬ ಯುವತಿಯನ್ನು ಪ್ರೀತಿಸಿ ಮದಯವೆಯಾಗಿದ್ದ , ಗುರುವಾರ ಪತ್ನಿಯೊಂದಿಗೆ ಬೂದನೂರು ಗ್ರಾಮಕ್ಕೆ ಬಂದ ನಾಗೇಶ್ ತನ್ನ ವಿಧವೆ ಅತ್ತೆಯೊಂದಿಗೆ ಜಗಳ ಮಾಡಿ ನನಗೆ ಮಗಳ ಪಾಲಿನ ಆಸ್ತಿ ಬೇಕು ಎಂದು ಗಲಾಟೆ ಮಾಡಿದ್ದಾನೆ. ಕೊನೆಗೆ ಸಂಜೆ ಪೊಲೀಸ್ ಠಾಣೆಗೆ ಈ ಸಂಬಂಧ ನಾಗೇಶನೇ ದೂರು ನೀಡಿದ್ದು, ಪೊಲೀಸರು ಇಬ್ಬರನ್ನೂ ಕರೆಸಿ ನ್ಯಾಯ ಪಂಚಾಯಿತಿ ಮಾಡಿ ಕಳುಹಿಸಿದ್ದಾರೆ.

ಠಾಣೆ ಮುಂದೆ ನಾಟಕ ಮಾಡಿದ ಪೊಲೀಸ್ ಪೇದೆ : ಹೆಂಡತಿಯೊಂದಿಗೆ ಠಾಣೆಯ ಮುಂದೆ ಬಂದ ಪೇದೆ ನಾಗೇಶ್ ಠಾಣೆಯಲ್ಲಿ ನನಗೆ ನ್ಯಾಯ ಸಿಗುತ್ತಿಲ್ಲ ಎಂದು ವಿಷದ ಬಾಟಲ್ ಹಿಡಿದುಕೊಂಡು ಬೇರಯವರಿಂದ ವಿಡಿಯೋ ಮಾಡಿಸಿ ಸ್ವಲ್ಪ ವಿಷ ಕುಡಿಯುವಂತೆ ನಾಟಕ ಮಾಡಿದ್ದಾನೆ ಎನ್ನಲಾಗಿದೆ. ಅಷ್ಟೇ ಅಲ್ಲ ಈ ವಿಷವನ್ನು ತನ್ನ ಹೆಂಡತಿಗೂ ಕುಡಿಸಿದ್ದಾನೆ. ಇದರಿಂದಾಗಿ, ಹೆಂಡತಿ ಅಸ್ವಸ್ಥಳಾಗಿದ್ದಾಳೆ. ಆದರೆ ನಾಗೇಶ್ ಸ್ವಲ್ಪ ವಿಷ ಕುಡಿದಿದ್ದು ಇಬ್ಬರನ್ನೂ ಆಸ್ಪತ್ರೆಗೆ ಸೇರಿಸಲಾಗಿದೆ. ಈ ಸಂಬಂಧ ಹೆಚ್.ಡಿ.ಕೋಟೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.