ಮೈಸೂರು: ಮೈಸೂರು ನಗರಕ್ಕೆ ಬಂದ ಸಿನಿಮಾ ನಟರು ಹಾಗೂ ರಾಜಕಾರಣಿಗಳು ತಪ್ಪದೇ ಭೇಟಿ ನೀಡುತ್ತಿದ್ದ ರಮ್ಯ ಹೋಟೆಲ್ ಲಾಕ್ಡೌನ್ ನಷ್ಟದಿಂದ ಬಂದ್ ಆಗಿದೆ.
ನಗರದಲ್ಲಿ ಕಳೆದ 40 ವರ್ಷಗಳಿಂದ ರಾಜಕಾರಣಿಗಳು ಹಾಗೂ ಚಲನಚಿತ್ರ ನಟರು ಭೇಟಿ ನೀಡಿ ಇಲ್ಲಿನ ದೋಸೆ ಹಾಗೂ ಬಾದಾಮಿ ಹಲ್ವಾ ಸವಿದು ಹೋಗುತ್ತಿದ್ದರು. ಈ ಹೋಟೆಲ್ ಜೆ.ಎಲ್.ಬಿ ರಸ್ತೆಯ ಮೂಡಾ ಕಚೇರಿಯ ಹಿಂಭಾಗದಲ್ಲಿರುವ ಕಾಸ್ಮೋ ಪಾಲಿಟಿನ್ ಕಬ್ಲ್ ಜಾಗವನ್ನು ಗುತ್ತಿಗೆ ಪಡೆದು 40 ವರ್ಷದ ಹಿಂದೆ ರಮ್ಯ ಹೋಟೆಲ್ ಅನ್ನು ಆರಂಭಿಸಿದರು. ನಂತರ 2002 ರಲ್ಲಿ ಸಿದ್ದಪ್ಪ ವೃತ್ತದಲ್ಲಿರುವ ಜೋಡಿ ಟ್ಯಾಂಕ್ ಬಳಿ ಪ್ರಾರಂಭಿಸಲಾಯಿತು. ಈಗ ಕಾರ್ಮಿಕರ ಕೊರತೆ, ಹೆಚ್ಚಾದ ಬಾಡಿಗೆ ದರದಿಂದ ಮಾಲೀಕರು ಈ ಹೋಟೆಲ್ ಅನ್ನು ನಿನ್ನೆ ಸಂಜೆ ಕೊನೆ ದಿನ ಓಪನ್ ಮಾಡಿ ಬಂದ್ ಮಾಡಿದರು.
ಈ ಹೋಟೆಲ್ನಲ್ಲಿ ದೋಸೆ ಹಾಗೂ ಬಾದಾಮಿ ಹಲ್ವಾ ತುಂಬಾ ಪ್ರಸಿದ್ಧಿ ಪಡೆದಿತ್ತು. ನಟರು ಹಾಗೂ ರಾಜಕಾರಣಿಗಳು ಮೈಸೂರಿಗೆ ಬಂದಾಗ ರಮ್ಯ ಹೋಟೆಲ್ಗೆ ಭೇಟಿ ಅಲ್ಲಿನ ರುಚಿಯನ್ನು ಸವಿಯುತ್ತಿದ್ದರು. ಮೈಸೂರಿಗೆ ಬಂದಾಗ ರಮ್ಯ ಹೋಟೆಲ್ಗೆ ತಪ್ಪದೇ ಭೇಟಿ ನೀಡುತ್ತಿದ್ದವರು ದಿವಂಗತ ಅಂಬರೀಶ್.
ಇವರು ಈ ಹೋಟೆಲ್ನಲ್ಲಿ ತಿಂಡಿ ತಿಂದು, ಬಾದಾಮಿ ಹಲ್ವಾವನ್ನು ತಪ್ಪದೆ ಮನೆಗೆ ತೆಗೆದುಕೊಂಡು ಹೋಗುತ್ತಿದ್ದರು. ಇವರ ಜೊತೆಗೆ ಡಾ.ರಾಜ್ ಕುಮಾರ್, ರಾಕ್ಲೈನ್ ವೆಂಕಟೇಶ್, ನಟ ರಮೇಶ್ ಅರವಿಂದ್ ಸೇರಿದಂತೆ ಹಲವಾರು ನಟರು ಇಲ್ಲಿಗೆ ಭೇಟಿ ನೀಡಿ ಇಲ್ಲಿನ ದೋಸೆ, ಉಪ್ಪಿಟ್ಟು , ಇಡ್ಲಿ ರುಚಿಕರವಾದ ಬಾದಾಮಿ ಹಲ್ವಾದ ರುಚಿ ನೋಡಿದ್ದಾರೆ.
ಇನ್ನು ಈ ಹೋಟೆಲ್ಗೆ ಬಂದಾಗ ತಪ್ಪದೇ ಭೇಟಿ ನೀಡುತ್ತಿದ್ದವರು ಮಾಜಿ ಮುಖ್ಯಮಂತ್ರಿ ಎಸ್ ಬಂಗಾರಪ್ಪ, ಸಿದ್ದರಾಮಯ್ಯ ಇಲ್ಲಿಗೆ ಬಂದು ತಿಂಡಿ ತಿಂದು ಹೋಗುತ್ತಿದ್ದರು. ಇವರ ಜೊತೆಗೆ ಸಚಿವ ಆರ್.ಅಶೋಕ್ , ಸಚಿವ ಈಶ್ವರಪ್ಪ , ಬಿ.ಸಿ ಪಾಟೀಲ್ ಸೇರಿದಂತೆ ಪ್ರತಿಯೊಬ್ಬ ರಾಜಕಾರಣಿಗಳು ಮೈಸೂರಿಗೆ ಬಂದಾಗ ಇಲ್ಲಿಗೆ ಭೇಟಿ ನೀಡುತ್ತಿದ್ದರು ಎಂದು ಮಾಲೀಕರಾದ ಮಹೇಂದ್ರ ತಿಳಿಸಿದ್ದಾರೆ
ಈ ಬಗ್ಗೆ ಮಾಧ್ಯಮಗಳ ಜೊತೆ ಮಾತನಾಡಲು ಬಯಸದ ಇವರು ಕೊರೊನಾ ಲಾಕ್ಡೌನ್ನಿಂದ ನಷ್ಟವಾಗಿದೆ. ಸದ್ಯಕ್ಕೆ ಈ ಹೋಟೆಲ್ ಮುಚ್ಚುತ್ತಿದ್ದೇನೆ, ಮುಂದಿನ ವರ್ಷ ಪರಿಸ್ಥಿತಿ ಬದಲಾದರೆ ಓಪನ್ ಮಾಡುವ ಬಗ್ಗೆ ಚಿಂತಿಸುತ್ತೇನೆ ಎನ್ನುತ್ತಾರೆ.
