ಮೈಸೂರಿನ ಬಾಲಕನಿಗೆ ಕಾಡುತ್ತಿರುವ ಕ್ಯಾನ್ಸರ್‌: ಮಗನ ಚಿಕಿತ್ಸೆಗಾಗಿ ದಾನಿಗಳಿಗೆ ಪೋಷಕರ ಮೊರೆ

ಇನ್ನೂ ಬಾಲ್ಯದ ವಯಸ್ಸು, ಈ ಚಿಕ್ಕ ವಯಸ್ಸಿಗೆ ಹೆಮ್ಮಾರಿ ಕ್ಯಾನ್ಸರ್​​ ಬಂದೆರಗಿದೆ. ಬಡಪಾಯಿ ಪೋಷಕರು ಮಗನ ಪ್ರಾಣ ಉಳಿಸಿಕೊಳ್ಳಲು ದಾನಿಗಳಿಗೆ ಮೊರೆಯಿಟ್ಟಿದ್ದಾರೆ.

ಮೈಸೂರು: 12 ವರ್ಷದ ಬಾಲಕನೊಬ್ಬ ಕಳೆದ ಎರಡು ವರ್ಷಗಳಿಂದ ಶ್ವಾಸಕೋಶದ ಕ್ಯಾನ್ಸರ್​​ನಿಂದ ತೀವ್ರವಾಗಿ ಬಳಲುತ್ತಿದ್ದು, ತಮ್ಮ ಪುತ್ರನನ್ನು ಹೇಗಾದರೂ ಮಾಡಿ ಬದುಕಿಸಿಕೊಳ್ಳಲು ಪೋಷಕರು ಅವಿರತ ಶ್ರಮಿಸುತ್ತಿದ್ದಾರೆ. ರಾಜ್ಯದ ಪ್ರತಿಷ್ಠಿತ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಒದಗಿಸಿದರೂ, ಬಾಲಕನಿಗೆ ವಕ್ಕರಿಸಿರುವ ಕ್ಯಾನ್ಸರ್ ಗುಣಮುಖ ಆಗದ ಕಾರಣ ಅಮೆರಿಕದ ಆಸ್ಪತ್ರೆ ವೈದ್ಯರು ಚಿಕಿತ್ಸೆಗೆ ಒಪ್ಪಿಕೊಂಡಿದ್ದಾರೆ. ಆದ್ರೆ ಮಗನ ಪ್ರಾಣ ಉಳಿಸುವುದಕ್ಕಾಗಿ, ಹಣ ಹೊಂದಿಸಲು ಪೋಷಕರು ಪರದಾಡುತ್ತಿದ್ದಾರೆ.

ಧನ ಸಹಾಯಕ್ಕಾಗಿ ಪೋಷಕರು ಮನವಿ: ಅಮೆರಿಕದ ವಾಷಿಂಗ್ಟನ್​ನಲ್ಲಿ ಇರುವ ಚಿಲ್ಡ್ರನ್ ನ್ಯಾಷನಲ್ ಆಸ್ಪತ್ರೆಯಲ್ಲಿ ಚಿಕಿತ್ಸೆಗೆ ಈಗ ಈ ಬಾಲಕ ಆಯ್ಕೆಯಾಗಿದ್ದು, ಚಿಕಿತ್ಸೆ ವೆಚ್ಚ ಅಂದಾಜು 1.25 ಕೋಟಿ ರೂ. ಆಗಲಿದೆ. ಚಿಕಿತ್ಸಾ ವೆಚ್ಚವನ್ನು ಭರಿಸಲು ದಾನಿಗಳು, ಸಂಘ ಸಂಸ್ಥೆಗಳಲ್ಲಿ ಧನ ಸಹಾಯಕ್ಕಾಗಿ ಬಾಲಕನ ಪೋಷಕರು ಮನವಿ ಮಾಡಿದ್ದಾರೆ.

ಮೈಸೂರಿನ ಮೇಟಗಳ್ಳಿಯ ರೈಲ್ವೆ ಕಾಲೊನಿಯಲ್ಲಿ ವಾಸವಾಗಿರುವ ವಸಂತಕುಮಾರ್ ಮತ್ತು ಶಿಲ್ಪಾ ದಂಪತಿಯ ಪುತ್ರ ಮೀತಾಕ್ಷ್ (12) ಶ್ವಾಸಕೋಶದ ಕ್ಯಾನ್ಸರ್ ರೋಗದಿಂದ ಬಳಲುತ್ತಿರುವ ಬಾಲಕ. 2021 ಫೆಬ್ರವರಿಯಲ್ಲಿ ಈ ಬಾಲಕನಿಗೆ ಶ್ವಾಸಕೋಶದ ಕ್ಯಾನ್ಸರ್ ಇದೆ ಎಂಬುದನ್ನು ಬೆಂಗಳೂರಿನ ಕಿದ್ವಾಯಿ ಆಸ್ಪತ್ರೆಯಲ್ಲಿ ಪತ್ತೆ ಮಾಡಲಾಯಿತು.

ನಂತರ ಬೆಂಗಳೂರಿನ ಬಸವನಗುಡಿಯಲ್ಲಿ ಶ್ರೀ ಶಂಕರ ಕ್ಯಾನ್ಸರ್ ಆಸ್ಪತ್ರೆಯಲ್ಲಿ ಎರಡು ವರ್ಷಗಳಿಂದ ನಿರಂತರ ಚಿಕಿತ್ಸೆ ನೀಡುತ್ತಿದ್ದು, ಕ್ಯಾನ್ಸರ್ ರೋಗವು ಇನ್ನೂ ಗುಣಮುಖವಾಗದ ಕಾರಣ ಹೆಚ್ಚಿನ ಚಿಕಿತ್ಸೆಗಾಗಿ ಅಮೆರಿಕದ ಆಸ್ಪತ್ರೆಯಲ್ಲಿ ಪಡೆಯುವಂತೆ ವೈದ್ಯರು ಸಲಹೆ ನೀಡಿದ್ದಾರೆ.

ಇದನ್ನೂಓದಿ:ಇನ್ನೆರಡು ದಿನ ಭಾರೀ ಮಳೆ ಹಿಮಪಾತ ಸಾಧ್ಯತೆ: ಕೇದಾರನಾಥ ಧಾಮ್​​ಕ್ಕೆ ತೆರಳದಂತೆ ಯಾತ್ರಾರ್ಥಿಗಳಿಗೆ ಸರ್ಕಾರದ ಸೂಚನೆ

ಅಮೆರಿಕದಲ್ಲಿ ಚಿಲ್ಡ್ರನ್ ನ್ಯಾಷನಲ್ ಆಸ್ಪತ್ರೆಗೆ ಈ ಬಾಲಕ ರೋಗದ ಬಗ್ಗೆ ಶ್ರೀ ಶಂಕರ ಆಸ್ಪತ್ರೆಯ ವೈದ್ಯರು ರಿರ್ಪೋಟ್‌ಗಳನ್ನು ಕಳುಹಿಸಿದ್ದರು. ಅಮೆರಿಕ ಆಸ್ಪತ್ರೆಯ ವೈದ್ಯರು ಬಾಲಕನಿಗಿರುವ ರೋಗದ ರಿಪೋರ್ಟ್​ ನೋಡಿ ಅದನ್ನು ಗುಣಪಡಿಸಲು ಚಿಕಿತ್ಸೆ ನೀಡಲು ಒಪ್ಪಿಕೊಂಡಿದ್ದಾರೆ. ಆದರೆ ಈ ಚಿಕಿತ್ಸೆಗಾಗಿ ಅಂದಾಜು 1.25 ಕೋಟಿ ರೂ. ವೆಚ್ಚವಾಗಲಿದೆ ಎಂದು ಅಮೆರಿಕದ ಆಸ್ಪತ್ರೆಯ ಆಡಳಿತ ಮಂಡಳಿ ತಿಳಿಸಿದೆಯಂತೆ.

ದಾನಿಗಳಿಗೆ ಮೊರೆಯಿಟ್ಟ ಬಾಲಕನ ಪೋಷಕರು.. ಕೂಡಲೇ ಬಾಲಕನನ್ನು ಉಳಿಸಿಕೊಳ್ಳಲು ಚಿಕಿತ್ಸೆಗಾಗಿ ಅಮೆರಿಕಕ್ಕೆ ಕರೆದೊಯ್ಯಲು ಪೋಷಕರು ಸಿದ್ಧವಾಗಿದ್ದಾರೆ. ಆದರೆ ಈಗಾಗಲೇ ಚಿಕಿತ್ಸೆಗಾಗಿ ಬಾಲಕರ ಪೋಷಕರು ಲಕ್ಷಾಂತರ ರೂಪಾಯಿ ಖರ್ಚು ಮಾಡಿರುವುದರಿಂದ ಹೆಚ್ಚಿನ ಚಿಕಿತ್ಸೆಗೆ ಹಣ ಹೊಂದಿಸಲು ಅಸಹಾಯಕರಾಗಿದ್ದಾರೆ. ಮಗನನ್ನು ಉಳಿಸಿಕೊಳ್ಳಲು ದಾನಿಗಳು, ಸಂಘ ಸಂಸ್ಥೆಗಳು ಧನ ಸಹಾಯ ಮಾಡುವಂತೆ ಬಾಲಕನ ಪೋಷಕರು ಮನವಿ ಮಾಡಿದ್ದಾರೆ.

ದಾನಿಗಳು ಹಣ ಸಂದಾಯಕ್ಕಾಗಿ ಎಸ್. ವಸಂತಕುಮಾರ್, ಎಸ್‌ಬಿಐ ಬ್ಯಾಂಕ್, ಮಾರ್ಕೆಟ್ ಶಾಖೆ, ಮೈಸೂರು, ಖಾತೆ ಸಂಖ್ಯೆ: 64018933941, ಐಎಫ್‌ಎಸ್‌ಸಿ SBIN0040058 ಕಳುಹಿಸಬಹುದು. ಪೇಟಿಎಂ ನಂ. 9986680747 ಸಂಪರ್ಕಿಸಲು ಶ್ವಾಸಕೋಶ ಕ್ಯಾನ್ಸರ್‌ನಿಂದ ಬಳಲುತ್ತಿರುವ 12 ವರ್ಷದ ಬಾಲಕ ಚಿಕಿತ್ಸೆಗೆ ದಾನಿಗಳಲ್ಲಿ ಪೋಷಕರ ಮನವಿ ಮಾಡಿದ್ದಾರೆ.

ಇದನ್ನೂಓದಿ:ವಿಶ್ವ ಅಸ್ತಮಾ ದಿನ: ರೋಗ ಲಕ್ಷಣ, ಮುನ್ನೆಚ್ಚರಿಕೆ ಕ್ರಮಗಳು ಗೊತ್ತಿರಲಿ..