ಮಂಡ್ಯ: ಈ ಬಾರಿಯ ದಸರಾದಲ್ಲಿ ಮಸ್ತ್ ಮಜಾ ಮಾಡೋಕೆ ಪ್ರವಾಸಿಗರಿಗೆ ಅವಕಾಶ ನೀಡಲಾಗಿದೆ. ಅದರಲ್ಲೂ ಯುವ ಜೋಡಿಯ ಹಾಟ್ ಸ್ಪಾಟ್ ಕೆಆರ್ಎಸ್ ಹಿನ್ನೀರು ಮತ್ತಷ್ಟು ಮಸ್ತಿ ಕೊಡಲಿದೆ. ಹೆಲಿಕಾಪ್ಟರ್ ಮೂಲಕ ಜಾಲಿ ರೈಡ್ ಮಾಡಿ, ಹಿನ್ನೀರಿನಲ್ಲಿ ಬೊಂಬಾಟ್ ಬೋಟಿಂಗ್ ಮಾಡಬಹುದು.
ಹೌದು, ಈ ಬಾರಿಯ ದಸರಾ ಹೊಸತನಕ್ಕೆ ಸಾಕ್ಷಿಯಾಗಿದೆ. ಮೈಸೂರಿಗಿಂತ ಕೆಆರ್ಎಸ್‌ನಲ್ಲಿ ಹೆಚ್ಚಿನ ಮಸ್ತಿ ಪ್ರವಾಸಿಗರಿಗೆ ಸಿಗಲಿದೆ. ಖಾಸಗಿ ಕಂಪನಿಗಳ ಜೊತೆ ಒಪ್ಪಂದ ಮಾಡಿಕೊಂಡಿರುವ ಪ್ರವಾಸೋದ್ಯಮ ಇಲಾಖೆ ಹೊಸತನದ ಅಡ್ವೆಂಚರ್‌ ಸೃಷ್ಟಿ ಮಾಡಿದೆ.
ನೀವು ಕೆಆರ್ಎಸ್ ಹಿನ್ನೀರಿಗೆ ಬಂದರೆ ಸಾಕು ಸಖತ್ ಎಂಜಾಯ್ ಮಾಡಬಹುದು. ಖಾಸಗಿ ಕಂಪನಿಯವರು ನಿಮಗಾಗಿ ಹೆಲಿ ಟೂರಿಸಂ ಪ್ರಾರಂಭ ಮಾಡಿದ್ದಾರೆ. ಅಕ್ಟೋಬರ್ 8ರವರೆಗೆ ಈ ಹೆಲಿಕಾಪ್ಟರ್ ಜಾಲಿ ರೈಡ್ ನಿಮಗೆ ಕೆಆರ್ಎಸ್ ಹಿನ್ನೀರಿನ ವೇಣುಗೋಪಾಲ ಸ್ವಾಮಿ ದೇವಸ್ಥಾನದ ಬಳಿ ಸಿಗಲಿದೆ.
ಇಂದಿನಿಂದ ಆರಂಭವಾಗಿರುವ ಜಾಲಿ ರೈಡ್‌ಗೆ ಪ್ರವಾಸಿಗರು ಮನ ಸೋತಿದ್ದಾರೆ. 8 ನಿಮಿಷಗಳ ಕಾಲ ಹೆಲಿಕಾಪ್ಟರ್ ರೈಡ್ ನಂತರ ಪಕ್ಕದಲ್ಲೇ ರಿವರ್ ರ್ಯಾಪ್ಟಿಂಗ್ ಆರಂಭ ಮಾಡಲಾಗಿದೆ. ಸ್ಪೀಡ್ ಬೋಟ್ ಜೊತೆಗೆ ಜೆಟ್ ಬೋಟ್, ತೆಪ್ಪದ ಅನುಭವವೂ ನಿಮಗೆ ಸಿಗಲಿದೆ. ಹಿನ್ನೀರಿನಲ್ಲಿ ಜಾಲಿಯಾಗಿ ಬೋಟಿಂಗ್ ಮಾಡಿಕೊಂಡು ಪಕ್ಕದಲ್ಲೇ ಇರುವ ವೇಣುಗೋಪಾಲ ಸ್ವಾಮಿ ದೇವಸ್ಥಾನ ನೋಡಿಕೊಂಡು ನಂತರ ಕೆಆರ್ಎಸ್‌ನ ದೀಪಾಲಂಕಾರ ನೋಡಿ ಎಂಜಾಯ್ ಮಾಡಬಹುದು.
