ಮಂಡ್ಯ: ಕಳೆದ 38 ವರ್ಷಗಳಿಂದ ಚರ್ಮ ತಜ್ಞ ಡಾ. ಶಂಕರೇಗೌಡ ಅವರು ಚಿಕಿತ್ಸೆ ನೀಡಲು ಒಬ್ಬರಿಂದ ಕೇವಲ 5 ರೂ. ಶುಲ್ಕವಾಗಿ ಪಡೆಯುತ್ತಿದ್ದಾರೆ. ಸಮಾಲೋಚನೆ ಮತ್ತು ಚಿಕಿತ್ಸೆಯ ಹೊರತಾಗಿಯೂ ಗೌಡರು ತಮ್ಮ ರೋಗಿಗಳಿಗೆ ಉತ್ತಮ ಹಾಗೂ ಕೈಗೆಟುಕುವ ಔಷಧಗಳನ್ನು ಶಿಫಾರಸು ಮಾಡುತ್ತಾರೆ. ಜೊತೆಗೆ, ಎಲ್ಲ ರೀತಿಯ ಚರ್ಮ ರೋಗಗಳಿಗೆ ಚಿಕಿತ್ಸೆ ನೀಡುವ ಮೂಲಕ ರೋಗಿಗಳ ಪಾಲಿಗೆ ದೇವರಾಗಿದ್ದಾರೆ.
ಹೀಗೆ ಅವಿರತ ಸೇವೆ ಮಾಡಲು ಮತ್ತು ಶುಲ್ಕ ಹೆಚ್ಚಿಸದೇ ಇರಲು ಕಾರಣವೇನು?: ಮೈಸೂರು ವೈದ್ಯಕೀಯ ಕಾಲೇಜು ಸಂಶೋಧನೆ ಮತ್ತು ಸಂಸ್ಥೆಯ ಮಾಜಿ ಪ್ರಾಧ್ಯಾಪಕರಾದ ಡಾ. ಕೆ ಗೋವಿಂದ ಅವರ ಸೇವೆ ಮತ್ತು ಸಮರ್ಪಣೆಯಿಂದ ಡಾ. ಗೌಡರು ಸ್ಫೂರ್ತಿ ಪಡೆದಿದ್ದಾರೆ. 'ನಾನು ಮಗುವಾಗಿದ್ದಾಗ, ನನ್ನ ವೈದ್ಯಕೀಯ ಸಮಾಲೋಚನೆಗಾಗಿ ನಾನು ಡಾ. ಗೋವಿಂದರನ್ನು ಭೇಟಿ ಮಾಡುತ್ತಿದ್ದೆ.
ಅವರು ನೂರಾರು ರೋಗಿಗಳಿಗೆ ಚಿಕಿತ್ಸೆ ನೀಡುತ್ತಿದ್ದರು ಮತ್ತು ಜನರಿಗಾಗಿ ತಮ್ಮ ಜೀವನವನ್ನು ಮುಡಿಪಾಗಿಟ್ಟರು. ಬಾಲ್ಯದಿಂದಲೂ ಅವರು ನನ್ನ ಸ್ಫೂರ್ತಿಯ ಮೂಲವಾಗಿದ್ದರು. ಇದು ನಾನು ಸೇವೆ ಸಲ್ಲಿಸಲು ಕಾರಣವಾಯಿತು' ಎಂದು ಐದು ರೂಪಾಯಿ ವೈದ್ಯರು ಹೇಳುತ್ತಾರೆ.
ಡಾ. ಶಂಕರೇಗೌಡ ಬೆಳೆದಂತೆ ಇಂಜಿನಿಯರಿಂಗ್ ಕಡೆಗೆ ಒಲವು ತೋರಿದರು. ಆದರೆ, ಕೆಲವು ಕಾರಣಗಳಿಂದಾಗಿ ಅವರ ಕುಟುಂಬದವರು ಡಾಕ್ಟರ್ ಆಗಬೇಕೆಂದು ಬಯಸಿದ್ದರು. ಆದ್ದರಿಂದ, ಮಣಿಪಾಲದ ಕಸ್ತೂರ್ಬಾ ವೈದ್ಯಕೀಯ ಕಾಲೇಜಿನಲ್ಲಿ ತಮ್ಮ ಎಂಬಿಬಿಎಸ್ ಮಾಡಿದರು ಮತ್ತು ವೆನೆರಿಯಾಲಜಿ ಮತ್ತು ಡರ್ಮಟಾಲಜಿ (ಡಿವಿಡಿ) ನಲ್ಲಿ ಡಿಪ್ಲೊಮಾ ಮಾಡಿದರು.
ಓದುವಾಗಲೇ ಮೂಡಿದ್ದ ಆಲೋಚನೆ: ಎಂಬಿಬಿಎಸ್ ವ್ಯಾಸಂಗ ಮಾಡಿದ ನಂತರ ಒಂದು ಆಲೋಚನೆ ಅವರಲ್ಲಿ ಮೂಡಿತು. ತಮ್ಮ ಜ್ಞಾನವನ್ನು ಹಳ್ಳಿ ಮತ್ತು ಸುತ್ತಮುತ್ತಲಿನ ಜನರ ಅನುಕೂಲಕ್ಕಾಗಿ ಬಳಸಬಹುದೆಂದು ಅವರು ಭಾವಿಸಿದ್ದರು. ಹಾಗಾಗಿ, ಸಮಾಲೋಚನೆ, ಚಿಕಿತ್ಸೆ, ತಪಾಸಣೆ ಇತ್ಯಾದಿಗಳಿಗೆ (ಮೂಲತಃ ಸಂಪೂರ್ಣ ವೈದ್ಯಕೀಯ ಪ್ಯಾಕೇಜ್) 5 ರೂ.ಗಳನ್ನು ವಿಧಿಸುವ ಮೂಲಕ ಅವರು ಅಭ್ಯಾಸವನ್ನು ಪ್ರಾರಂಭಿಸಿದರು. ಅದರ ನಂತರ ಅವರು ಶುಲ್ಕವನ್ನು ಹೆಚ್ಚಿಸಲು ಎಂದಿಗೂ ಯೋಚಿಸಲಿಲ್ಲ. ಅವರು ಸಮಾಜಕ್ಕೆ, ವಿಶೇಷವಾಗಿ ಗ್ರಾಮೀಣ ಪ್ರದೇಶದ ಜನರಿಗೆ ತಮ್ಮ ಕೈಯ್ಯಲಾದ ಸೇವೆ ನೀಡಲು ಬಯಸುತ್ತೇನೆ ಎನ್ನುತ್ತಾರೆ.
ಡಾ. ಗೌಡರು ಬೆಳಗ್ಗೆ ತಮ್ಮ ಹಳ್ಳಿಯಲ್ಲಿ ರೋಗಿಗಳಿಗೆ ಚಿಕಿತ್ಸೆ ನೀಡುತ್ತಾರೆ ಮತ್ತು ಮಧ್ಯಾಹ್ನ ಮಂಡ್ಯದ ಅವರ ಕ್ಲಿನಿಕ್‌ನಲ್ಲಿ ಜಿಲ್ಲೆ ಮತ್ತು ಹೊರ ರಾಜ್ಯಗಳಿಂದ ಬರುವ ರೋಗಿಗಳಿಗೆ ಚಿಕಿತ್ಸೆ ನೀಡುತ್ತಾರೆ . ಸರಾಸರಿ ದಿನಕ್ಕೆ 200 ಕ್ಕೂ ಹೆಚ್ಚು ಜನರಿಗೆ ಚಿಕಿತ್ಸೆ ನೀಡುತ್ತಾರೆ. ಮೊದಲು ಚಿಕಿತ್ಸೆ ನೀಡಲು ಆರಂಭಿಸಿದಾಗ ದಿನಕ್ಕೆ 10 ರೋಗಿಗಳಿಗೆ ಟ್ರೀಟ್ಮೆಂಟ್ ನೀಡುತ್ತಿದ್ದರು.
ನಿಧಾನವಾಗಿ, ಈ ವಿಷಯ ಊರೆಲ್ಲಾ ಹರಡಿತು. ಜನರು ಅವರನ್ನ 'ಮ್ಯಾಜಿಕಲ್ ಹ್ಯಾಂಡ್ಸ್' ಎಂದು ನಂಬಲು ಪ್ರಾರಂಭಿಸಿದರು. ದೊಡ್ಡ ಆಸ್ಪತ್ರೆಗಳಲ್ಲಿ ಗುಣಪಡಿಸಲಾಗದ ಕಾಯಿಲೆಗಳಿಗೆ ಚಿಕಿತ್ಸೆ ನೀಡಿ ಹೆಸರುವಾಸಿಯಾಗಿರುವುದರಿಂದ ಈಗ ದೇಶಾದ್ಯಂತ ಜನರು ಸಮಾಲೋಚನೆಗಾಗಿ ಅವರನ್ನು ಭೇಟಿ ಮಾಡುತ್ತಾರೆ. ಆದಾಗ್ಯೂ, ಈ ವಿನಮ್ರ ವ್ಯಕ್ತಿ ಯಾವುದೇ ಖಾಸಗಿ ನೇಮಕಾತಿಗಳನ್ನು ನೀಡುವುದಿಲ್ಲ. ಅವರ ಚಿಕಿತ್ಸೆ ಪಡೆಯಲು ಜನರು ಮಂಡ್ಯಕ್ಕೆ ತೆರಳಿ ಸರತಿ ಸಾಲಿನಲ್ಲಿ ನಿಲ್ಲಬೇಕಾಗಿದೆ.
ಇವರು ಕೃಷಿಕರೂ ಹೌದು: ಶಿವಳ್ಳಿ ಮೂಲದವರಾದ ಈ ಪ್ರಸಿದ್ಧ ವೈದ್ಯ ಅತ್ಯಾಸಕ್ತಿಯ ಕೃಷಿಕರೂ ಹೌದು. ಅವರು ತಮ್ಮ ಜಮೀನಿನಲ್ಲಿ ಸಸಿಗಳನ್ನು ಕಸಿ ಮಾಡುವುದು, ಬೆಳೆ ಬೆಳೆಸುವುದನ್ನ ಇಷ್ಟಪಡುತ್ತಾರೆ. ಡಾ. ಗೌಡರು (64 ವರ್ಷ) ಫೋನ್, ಕಂಪ್ಯೂಟರ್ ಹೊಂದಿಲ್ಲ. ಮತ್ತು ಇಂಟರ್ನೆಟ್ ಬಳಸುವುದಿಲ್ಲ. ಆದಾಗ್ಯೂ, ಅವರು ರೋಗಗಳ ಬಗ್ಗೆ ಸುಧಾರಿತ ಜ್ಞಾನ ಹೊಂದಿದ್ದಾರೆ.
ಶಂಕರೇಗೌಡರ ಮಾನವೀಯ ಸೇವೆಗಾಗಿ ಕಲ್ಪವೃಕ್ಷ ಟ್ರಸ್ಟ್ 'ಕರ್ನಾಟಕ ಕಲ್ಪವೃಕ್ಷ ಪ್ರಶಸ್ತಿ' ನೀಡಿ ಗೌರವಿಸಿದೆ ಮತ್ತು ಹಲವಾರು ಸಂಘ ಸಂಸ್ಥೆಗಳು ಸನ್ಮಾನಿಸಿವೆ. ಆದರೆ, ಇತ್ತೀಚಿಗೆ ಗೌಡರ ಆರೋಗ್ಯದಲ್ಲಿ ಸ್ವಲ್ಪಮಟ್ಟಿಗೆ ಬದಲಾವಣೆಯಾಗಿದ್ದು ಒಮ್ಮೆ ಹೃದಯರೋಗದ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದಾರೆ. ವೈದ್ಯರ ಮನವಿ ಮೇರೆಗೆ ಮನೆಯಲ್ಲೇ ಚಿಕಿತ್ಸೆ ಪಡೆಯುತ್ತಿದ್ದು ವಿಶ್ರಾಂತಿಯಲ್ಲಿದ್ದಾರೆ. ಯಾವುದೇ ರೋಗಿಗಳನ್ನು ಸಂಪರ್ಕಿಸುತ್ತಿಲ್ಲ.
ಇದನ್ನೂ ಓದಿ: ಮಂಡ್ಯದ 'ಐದು ರೂಪಾಯಿ ಡಾಕ್ಟರ್' ಖ್ಯಾತಿಯ ಶಂಕರೇಗೌಡರಿಗೆ ಹೃದಯಾಘಾತ
