ಮಂಡ್ಯ : ಜಿಲ್ಲಾಧಿಕಾರಿ ತಾಲೂಕು ಕಚೇರಿಗಳಿಗೆ ಭೇಟಿ ನೀಡಿ ಶಾಕ್ ಕೊಟ್ಟಿದ್ದು, ಮತ್ತೊಂದು ಕಡೆ ಪೊಲೀಸ್ ವರಿಷ್ಠಾಧಿಕಾರಿ ಖುದ್ದು ರಸ್ತೆಗಿಳಿದು ಕಾನೂನು ಸುವ್ಯವಸ್ಥೆ ಕಾಪಾಡಲು ಮುಂದಾಗಿದ್ದಾರೆ. ಮಂಡ್ಯ ಜಿಲ್ಲಾಧಿಕಾರಿ ಡಾ. ಕುಮಾರ್ ಇಂದು ಮದ್ದೂರು ತಾಲೂಕು ಕಚೇರಿಗೆ ದಿಢೀರ್ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.
ಜಿಲ್ಲಾಧಿಕಾರಿ ಅವರು ಕಚೇರಿಗೆ ಭೇಟಿ ನೀಡುತ್ತಿದಂತೆ ಹಲವಾರು ಸಮಸ್ಯೆಗಳು ಕಂಡು ಬಂದಿವೆ. ಜೊತೆಗೆ ಆನೇಕ ನೌಕರರು ಕಚೇರಿಯಲ್ಲೇ ಇರಲಿಲ್ಲ. ಈ ಸಂಬಂಧ ತಕ್ಷಣ ತಹಶೀಲ್ದಾರರಿಗೆ ನೋಟಿಸ್ ನೀಡುವಂತೆ ಸೂಚಿಸಿದರು. ನಂತರ ಎಡಿಸಿ ನಾಗರಾಜ್ ಜೊತೆ ತೆರಳಿ ಖಜಾನೆ ಶಾಖೆ, ನಾಡ ಕಚೇರಿ, ಆಧಾರ್ ಕೇಂದ್ರ, ಆಡಳಿತ ವಿಭಾಗಗಳನ್ನು ಪರಿಶೀಲನೆ ನಡೆಸಿದರು. ಈ ಸಂದರ್ಭದಲ್ಲಿ ಸಾರ್ವಜನಿಕರ ಅಹವಾಲು ಸ್ವೀಕರಿಸಿ ಕುಂದು ಕೊರತೆಗಳನ್ನ ಆದಷ್ಟು ಬೇಗ ಬಗೆ ಹರಿಸುವುದಾಗಿ ತಿಳಿಸಿದರು. ಭ್ರಷ್ಟಾಚಾರ ಕಂಡು ಬಂದರೆ ಮುಲಾಜಿಲ್ಲದೇ ಕ್ರಮ ಕೈಗೊಳ್ಳಲು ಅಧಿಕಾರಗಳಿಗೆ ಸೂಚನೆ ಕೊಟ್ಟಿದ್ದಾರೆ.
ರೇಷನ್ ಕಾರ್ಡ್ ತಿದ್ದುಪಡಿ ಹಾಗೂ ಹೊಸ ಕಾರ್ಡ್ಗೆ ಅವಕಾಶ ಕೊಡದೇ ಇರುವುದರಿಂದ ಸರ್ಕಾರದ ಯೋಜನೆಗಳಿಂದ ಜನರು ವಂಚಿತರಾಗುತ್ತಿರುವ ಬಗ್ಗೆ ಜಿಲ್ಲಾಧಿಕಾರಿ ಡಾ. ಕುಮಾರ್ ಅವರು ಪ್ರತಿಕ್ರಿಯಿಸಿ, ಈಗ ಹೊಸ ರೇಷನ್ ಕಾರ್ಡ್ಗೆ ಅರ್ಜಿ ಸಲ್ಲಿಸಲು ಅವಕಾಶವಿಲ್ಲ. ಮುಂದೆ ಅವಕಾಶ ಮಾಡಿಕೊಡಲಾಗುತ್ತದೆ. ಈ ಬಗ್ಗೆ ಸಾರ್ವಜನಿಕರಿಗೆ ಮಾಹಿತಿ ಕೊಟ್ಟಿದ್ದೇವೆ ಎಂದರು.
ಇದನ್ನೂ ಓದಿ : ಬೆಂಗಳೂರು- ಮೈಸೂರು ಹೆದ್ದಾರಿ ಪರಿಶೀಲಿಸಿದ ಎಡಿಜಿಪಿ ಅಲೋಕ್ ಕುಮಾರ್
ಇತ್ತ ಎಸ್ಪಿ ಎನ್. ಯತೀಶ್ ಅವರು ಬೆಳ್ಳಂಬೆಳಗ್ಗೆ ಫೀಲ್ಡ್ಗಿಳಿದು ಪರ್ಮಿಟ್ ಇಲ್ಲದೇ ಸಂಚರಿಸುತ್ತಿದ್ದ ಆಟೋಗಳು ಇನ್ನು ಮುಂದೆ ರಸ್ತೆಗಳಿಗೆ ಇಳಿಯಬಾರದು ಎಂದು ಆಟೋ ಚಾಲಕರಿಗೆ ಎಚ್ಚರಿಕೆ ನೀಡಿದ್ದಾರೆ. ಅಲ್ಲದೆ ಎಲ್ಲ ದಾಖಲಾತಿಗಳಿರುವ ಆಟೋಗಳಿಗೆ ನೋಂದಣಿಯಾದ ಡಿಜಿಟಲ್ ನಂಬರ್ ಹಾಕಿಸಿದ್ದು, ಇನ್ನು ಚಾಲಕನ ಮಾಹಿತಿ ಇರುವ ಲೇಬಲ್ ಅನ್ನು ಸೀಟಿನ ಹಿಂಭಾಗ ಹಾಕಲೇಬೇಕೆಂದು ಸೂಚನೆ ನೀಡಿದ್ದಾರೆ.
ಮಾಧ್ಯಮಗಳೊಂದಿಗೆ ಮಾತನಾಡಿದ ಎಸ್ಪಿ ಎನ್. ಯತೀಶ್ ಅವರು, ಈ ಹಿಂದಿನಿಂದಲೂ ಜಿಲ್ಲೆಯಲ್ಲಿ ಓಡಾಡುವ ಆಟೋಗಳಿಗೆ ನೋಂದಣಿ ಡಿಜಿಟಲ್ ನಂಬರ್ ನೀಡುವ ಪ್ರಕ್ರಿಯೆ ಮಂಡ್ಯ ಸಂಚಾರಿ ಪೊಲೀಸ್ ಠಾಣೆಯಲ್ಲಿ ನಡೆದುಕೊಂಡು ಬಂದಿತ್ತು. ಸುಮಾರು 300 ಆಟೋಗಳು ಜಿಲ್ಲೆಯಲ್ಲಿ ಓಡಾಟ ನಡೆಸುತ್ತಿದ್ದು, ಆದರಲ್ಲಿ ಸಾಕಷ್ಟು ಆಟೋಳಿಗೆ ಪರ್ಮಿಟ್, ಎಫ್ಸಿ ಇಲ್ಲದೇ ಇರುವ ಬಗ್ಗೆ ನಮಗೆ ದೂರುಗಳು ಬಂದಿವೆ.
ಹೀಗಾಗಿ ಪ್ರಯಾಣಿಕರ ಭದ್ರತೆ ಹಾಗು ರಕ್ಷಣೆ ದೃಷ್ಟಿಯಿಂದ ಅಂತಹ ವಾಹನಗಳನ್ನು ಗುರುತಿಸುವ ಪ್ರಯತ್ನ ನಡೆದಿದೆ. ಆಟೋಗಳಿಗೆ ನೋಂದಣಿಯಾದ ಡಿಜಿಟಲ್ ನಂಬರ್ ಮತ್ತು ಚಾಲಕನ ಮಾಹಿತಿ ಇರುವ ಲೇಬಲ್ ಅನ್ನು ಸೀಟಿನ ಹಿಂಭಾಗ ಹಾಕುವ ಕಾರ್ಯಾಚರಣೆ ನಡೆಸಿದ್ದೇವೆ ಎಂದು ಮಾಹಿತಿ ಹಂಚಿಕೊಂಡರು.
ಇದನ್ನೂ ಓದಿ : ಸರ್ಕಾರಿ ಆಸ್ಪತ್ರೆಗೆ ಮಂಡ್ಯ ಡಿಸಿ ದಿಢೀರ್ ಭೇಟಿ: ಊಟದ ಬಿಲ್ ನೋಡಿ ಶಾಕ್.. ಪರಿಶೀಲನೆಗೆ ಆದೇಶ
