ಮನ್‌ಮುಲ್ ಅಧ್ಯಕ್ಷ ಚುನಾವಣೆಯಲ್ಲಿ ಬಿಜೆಪಿಗೆ ಮುಖಭಂಗ; ಜೆಡಿಎಸ್‌ಗೆ ಒಲಿದ ಅದೃಷ್ಟ!

ಮನ್‌ಮುಲ್ (ಮಂಡ್ಯ ಹಾಲು ಉತ್ಪಾದನಾ ಒಕ್ಕೂಟ) ಅಧ್ಯಕ್ಷ ಚುನಾವಣೆಯಲ್ಲಿ ರಾಜ್ಯ ಸರ್ಕಾರಕ್ಕೆ ಭಾರೀ ಮುಖಭಂಗವಾಗಿದೆ. ಡಿಸಿಎಂ ಅಶ್ವಥ ನಾರಾಯಣ್ ಮೂಲಕ ಆಪರೇಷನ್ ಮಾಡಿದರೂ ಬಿಜೆಪಿಗೆ ಅದೃಷ್ಟ ಕೈ ಕೊಟ್ಟಿದೆ. ಕೊನೆಗೂ ಲಾಟರಿ ಮೂಲಕ ಜೆಡಿಎಸ್‌ಗೆ ಅಧ್ಯಕ್ಷ ಸ್ಥಾನ ಒಲಿದಿದ್ದು, ಜೆಡಿಎಸ್ ತೊರೆದು ಬಿಜೆಪಿ ಸೇರಿದ್ದ ಸದಸ್ಯನಿಗೂ ಮುಖಭಂಗವಾಗಿದೆ.

ಮಂಡ್ಯ: ಮನ್‌ಮುಲ್ ಅಧ್ಯಕ್ಷ ಚುನಾವಣೆಯಲ್ಲಿ ರಾಜ್ಯ ಸರ್ಕಾರಕ್ಕೆ ಭಾರೀ ಮುಖಭಂಗವಾಗಿದೆ. ಡಿಸಿಎಂ ಅಶ್ವಥ ನಾರಾಯಣ್ ಮೂಲಕ ಆಪರೇಷನ್ ಮಾಡಿದರೂ ಬಿಜೆಪಿಗೆ ಅದೃಷ್ಟ ಕೈ ಕೊಟ್ಟಿದೆ. ಕೊನೆಗೂ ಲಾಟರಿ ಮೂಲಕ ಜೆಡಿಎಸ್‌ಗೆ ಅಧ್ಯಕ್ಷ ಸ್ಥಾನ ಒಲಿದಿದ್ದು, ಜೆಡಿಎಸ್ ತೊರೆದು ಬಿಜೆಪಿ ಸೇರಿದ್ದ ಸದಸ್ಯನಿಗೆ ಮುಖಭಂಗವಾಗಿದೆ.

ಮನ್‌ಮುಲ್ ಅಧಿಕಾರ ಗದ್ದುಗೆ ಅಲಂಕರಿಸಬೇಕು ಎಂದು ಶತಾಯಗತಾಯ ಹೋರಾಟ ನಡೆಸಿದ್ದ ಬಿಜೆಪಿ ಮುಖಂಡರಿಗೆ ಮುಖಭಂಗವಾಗಿದೆ. 16 ಸದಸ್ಯ ಬಲದ ಮನ್‌ಮುಲ್‌ನಲ್ಲಿ ಸಮಬಲ ಉಂಟಾಗಿ ಲಾಟರಿ ಮೂಲಕ ಜೆಡಿಎಸ್‌ನ ರಾಮಚಂದ್ರ ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದಾರೆ. ಜೆಡಿಎಸ್ ಬಿಟ್ಟು ಬಿಜೆಪಿ ಸೇರಿ ಅಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧಿಸಿದ್ದ ಎಸ್‌.ಪಿ ಸ್ವಾಮಿಗೆ ಈ ಮೂಲಕ ಭಾರೀ ಹಿನ್ನೆಡೆಯಾಗಿದೆ. ಜೊತೆಗೆ ಉಪಾಧ್ಯಕ್ಷ ಸ್ಥಾನವೂ ಜೆಡಿಎಸ್ ಪಾಲಾಗಿದ್ದು, 9 ಮತ ಪಡೆದು ರಘುನಂದನ್ ಆಯ್ಕೆಯಾಗಿದ್ದಾರೆ.

ಮನ್‌ಮುಲ್ ಆಡಳಿತ ಮಂಡಳಿಯಲ್ಲಿ ನಾಮ ನಿರ್ದೇಶನ, ಅಧಿಕಾರಿಗಳ ಮತ ಸೇರಿ 16 ಸ್ಥಾನಗಳಿವೆ. ಇದರಲ್ಲಿ ಜೆಡಿಎಸ್ 8, ಬಿಜೆಪಿ 1, ಕಾಂಗ್ರೆಸ್ 3 ಸೇರಿದಂತೆ ಸರ್ಕಾರದ ನಾಮ ನಿರ್ದೇಶನ ಹಾಗೂ ಮೂವರು ಅಧಿಕಾರಿಗಳಿಗೆ ಮತದಾನದ ಹಕ್ಕಿದೆ. ಜೆಡಿಎಸ್‌ಗೆ ಗುಡ್‌ಬೈ ಹೇಳಿ ಸ್ವಾಮಿ ಬಿಜೆಪಿ ಸೇರಿದ್ದರಿಂದ ಜೆಡಿಎಸ್‌ಗೆ 7 ಸ್ಥಾನ ಮಾತ್ರ ಉಳಿದಿತ್ತು‌. ಆದರೆ ಈಗ ಬಿಜೆಪಿ ಪಾಳಯದಿಂದ ಅಡ್ಡಮತದಾನ ಮಾಡಿದ್ದರಿಂದ ಸಮಬಲ ಉಂಟಾಗಿತ್ತು. ಹೀಗಾಗಿ ಚುನಾವಣಾಧಿಕಾರಿ ಲಾಟರಿ ಎತ್ತುವ ಮೂಲಕ ಅಧ್ಯಕ್ಷರ ಆಯ್ಕೆಯನ್ನು ಘೋಷಣೆ ಮಾಡಿದರು.