ಕುಷ್ಟಗಿ: ಗೀಯ ಗೀಯ ಗೀಗೀ ಹರೇ ಗೀಯ ಗಾ... ಇಂತಹ ನೂರಾರು ಗೀಗಿ ಪದಗಳ ಕಣಜ ಎಂದೇ ಖ್ಯಾತಿ ಪಡೆದ ಹಿರೇಗೊಣ್ಣಾಗರದ ದೇವದಾಸಿ ಮುದಕವ್ವ ಗಂಜಿಹಾಳ ಮಾದರ ಅವರು ದಣಿವಿಲ್ಲದೇ ಹಾಡುವ ತಾಲೂಕಿನ ಏಕೈಕ ಗೀಗಿ ಪದಗಾರ್ತಿ.
ತನ್ನ ತಾಯಿ ದ್ಯಾಮವ್ವ ಅವರಿಂದ ಸಂಪ್ರದಾಯ ಪದಗಳನ್ನು ಹಾಡುವುದನ್ನು ಕಲಿತ ಮುದಕವ್ವ, ತಮ್ಮ 12ನೇ ವಯಸ್ಸಿನಲ್ಲಿ ಹಾಡಲು ಶುರು ಮಾಡಿದ್ದು ಜೀವನ ವೃತ್ತಿಯಾಗಿದೆ. ಇಳಕಲ್ನ ಪಕೀರಪ್ಪ ವಾಲ್ಮೀಕಿ ಅವರಲ್ಲಿ ಗೀಗಿ ಪದಗಳನ್ನು ಕಲಿತ ಮುದಕವ್ವ, ಗೀಗಿ ಪದ ಪರಂಪರೆಯನ್ನು ಮುಂದುವರೆಸಿದ್ದಾರೆ. ಮೂಲ ಜಾನಪದ ದಾಟಿಯಲ್ಲಿ ಹಾಡುತ್ತಾರೆ.
ಗೀಗಿ ಪದಕಾರ ತಂಡ ಕಟ್ಟಿಕೊಂಡಿದ್ದು, ಅವರ ತಂಡದಲ್ಲಿ ಮುಮ್ಮೇಳದಲ್ಲಿ ಮುದುಕವ್ವ ಹಲಗೆ ನುಡಿಸುತ್ತಾ ಹಾಡುತ್ತಿದ್ದರೆ, ಹಿಮ್ಮೇಳದಲ್ಲಿ ಅವರ ಮಗ ಮುದಕಪ್ಪ ಗಂಜಿಹಾಳ ಚೌಡಕಿ ನುಡಿಸುತ್ತಾರೆ. ಖಾಜಾಹುಸೇನ್ ಎಂಬುವರು ಅತ್ತಾರ ತಾಳ ನುಡಿಸುತ್ತಾರೆ.
ಈ ಗೀಗಿ ಪದಗಳಲ್ಲಿ ಗಂಡು ಹೆಣ್ಣಿನ ವಾದ - ಪ್ರತಿವಾದ ಮೇಳೈಸುತ್ತದೆ. ಇದಕ್ಕೆ ಹರದೇಶಿ-ನಾಗೇಶಿ ಎನ್ನಲಾಗುತ್ತಿದೆ. ಗಂಡು ಮೇಳಕ್ಕೆ ಹರದೇಶಿ ಎಂದು ಹೆಣ್ಣು ಮೇಳಕ್ಕೆ ನಾಗೇಶಿ ಎಂದು ಕರೆಯಲಾಗುತ್ತದೆ. ಹರದೇಶಿ ಮೇಳದಲ್ಲಿ ದಾವಲಸಾಬ್ ಅತ್ತಾರ, ನಾಗೇಶಿ ಮೇಳದಲ್ಲಿ ಮುದಕವ್ವ ಗಂಜಿಹಾಳ ಜುಗಲ್‍ಬಂಧಿ ಕೇಳುವುದೇ ಮಜಾ. ಈ ತಂಡ ಈಗಾಗಲೇ ಹಾವೇರಿ, ಬಾಗಲಕೋಟೆ, ಬಳ್ಳಾರಿ, ರಾಯಚೂರು, ಕೊಪ್ಪಳ ಜಿಲ್ಲೆಗಳಲ್ಲಿ ಅನೇಕ ಕಾರ್ಯಕ್ರಮ ನೀಡಿದ್ದಾರೆ.
ಅನಕ್ಷರಸ್ಥೆ ಮುದಕವ್ವ ಶಾಲೆ ಕಡೆ ಸುಳಿದಿಲ್ಲ. ಆದರೂ ನೂರಾರು ಗೀಗಿ, ಸೋಬಾನೆ ಪದಗಳನ್ನು ನೆನಪಿಟ್ಟುಕೊಂಡು ಪದ ತಪ್ಪದಂತೆ, ಹಲಗೆಯ ನಾದ, ಲಯ ಅಪಶ್ರುತಿಯಾಗದಂತೆ ಹಾಡುವ ತಾಲೂಕಿನ ಏಕೈಕ ಗೀಗಿ ಪದ ಗಾರ್ತಿದ್ದಾರೆ. ಇವರ ಬಳಿ ಹಾಡುಗಳು ಎಷ್ಟಿವೇ ಎನ್ನುವುದು ಇವರಿಗೆ ಲೆಕ್ಕಕ್ಕಿಲ್ಲ. ಕೇಳುವವರಿದ್ದರೆ ಬೆಳಗಾಗುವರೆಗೂ ಹಾಡ್ತೀನಿ ಎನ್ನುವ ಅವರನ್ನ ಕೊರೊನಾ ಸಂಕಷ್ಟಕ್ಕೆ ಸಿಲುಕಿಸಿದೆ.
ಕೊರೊನಾ ಹಿನ್ನೆಲೆಯಲ್ಲಿ ಜಾತ್ರೆ, ಕಾರ್ಯಕ್ರಮಗಳು ನಡೆಯದಂತಾಗಿದ್ದು, ಜೀವನ ನಿರ್ವಹಣೆ ಕಷ್ಟಕರವಾಗಿದೆ. ಮುದಕವ್ವ ಜಾತ್ರೆ, ವೇದಿಕೆ ಕಾರ್ಯಕ್ರಮಗಳಲ್ಲಿ ತಮ್ಮ ಕಲೆ ಪ್ರದರ್ಶಿಸಿ ಜೀವನ ಸಾಗಿಸುತ್ತಿದ್ದರು. ಇದೀಗ ಕಾರ್ಯಕ್ರಮ ಸಿಗದಿರುವುದರಿಂದ ಕೂಲಿ ಕೆಲಸಕ್ಕೆ ಹೋಗುತ್ತಿದ್ದಾರೆ.
ದೇವದಾಸಿಯರಿಗೆ ಜಮೀನು ಸೌಲಭ್ಯ ನೀಡಲಾಗಿದ್ದರೂ ಮುದಕವ್ವಳಿಗೆ ಸಿಕ್ಕಿಲ್ಲ. ಮನೆ, ರೇಷನ್ ಕಾರ್ಡ್ ಬಿಟ್ಟರೆ ಈ ಕಲಾವಿದೆಗೆ ಸರ್ಕಾರದ ನೆರವಿನ ಭಾಗ್ಯ ಇಲ್ಲದಂತಾಗಿದೆ. ಸರ್ಕಾರ ಮಾಸಾಶನವನ್ನಾದ್ರು ನೀಡಲಿ ಎಂಬ ನಿರೀಕ್ಷೆಯಲ್ಲಿ ಮುದಕವ್ವ ಜೀವನದ ಮುಸ್ಸಂಜೆಯನ್ನು ಹಿರೆಗೊಣ್ಣಾಗರ ಗ್ರಾಮದಲ್ಲಿ ಕಳೆಯುತ್ತಿದ್ದಾರೆ.
ನಿಮ್ಮ ಸೂಕ್ತ ಸಂಗಾತಿ ಹುಡುಕುತ್ತಿರುವಿರಾ? ಕನ್ನಡ ಮ್ಯಾಟ್ರಿಮೋನಿಯಲ್ಲಿ ನೋಂದಣಿ ಉಚಿತ
