ಗಂಗಾವತಿ (ಕೊಪ್ಪಳ): ಕೊರೊನಾ ಭೀತಿ ಎಲ್ಲೆಡೆ ಆವರಿಸುತ್ತಿದೆ. ಜನ ಮನೆಯಿಂದ ಹೊರಕ್ಕೆ ಬರಲು ಹೆದರುವ ಸ್ಥಿತಿ ಇದೆ. ಇನ್ನು ಪಾಸಿಟಿವ್ ಬಂದ ಏರಿಯಾಗಳಲ್ಲಿ ಅಧಿಕಾರಿಗಳು ಸೀಲ್ಡೌನ್ ಮಾಡುತ್ತಿದ್ದು, ಜನ ಸಂಚಾರ ವಿರಳವಾಗುತ್ತಿದೆ. ಆದರೆ ಇದೀಗ ಸೀಲ್ಡೌನ್ ಏರಿಯಾಗಳಲ್ಲಿ ಗ್ರಾಮ ಸಿಂಹಗಳದ್ದೇ ಕಾರುಬಾರು ಎಂಬಂತಾಗಿದೆ.
ಹೌದು.. ನಗರದ ಬಹುತೇಕ ಸೀಲ್ಡೌನ್ ಪ್ರದೇಶದಲ್ಲಿ ಜನ, ವಾಹನ ಸಂಚಾರ ಸಂಪೂರ್ಣ ನಿಷೇಧವಾಗಿದೆ. ಆದರೆ ಗ್ರಾಮ ಸಿಂಹ ಎಂದು ಕರೆಯಿಸಿಕೊಳ್ಳುವ ಮಾನವನ ಅನಾದಿ ಕಾಲದ ನಂಬಿಕಸ್ಥ ಪ್ರಾಣಿ ನಾಯಿಗಳು ಮಾತ್ರ ಯಾರ ಹಂಗಿಲ್ಲದೇ ಓಡಾಡುತ್ತಿವೆ.
ಇಲ್ಲಿನ ಕೇಂದ್ರ ಬಸ್ ನಿಲ್ದಾಣದ ಪಕ್ಕದ ವಿವೇಕಾನಂದ ಕಾಲೋನಿಯಲ್ಲಿನ ನಿವಾಸಿಯೊಬ್ಬರಿಗೆ ಕೊರೊನಾ ಪಾಸಿಟಿವ್ ಹಿನ್ನೆಲೆ ಏರಿಯಾವನ್ನು ಸಂಪೂರ್ಣ ಸೀಲ್ಡೌನ್ ಮಾಡಲಾಗಿದೆ. ಆದರೆ ಈಗ ಈ ಪ್ರದೇಶಗಳಲ್ಲಿ ನೂರಾರು ನಾಯಿಗಳು ನಿತ್ಯ ಸಂಚರಿಸುವ ಮೂಲಕ ಜನರ ಗಮನ ಸೆಳೆಯುತ್ತಿವೆ.
ಇಷ್ಟಕ್ಕೂ ನಾಯಿಗಳ ಓಡಾಟ ಏಕೆ ಅಂತಿರಾ..?
ವರ್ಷದುದ್ದಕ್ಕೂ ನಾಯಿಗಳು ಸಂತಾನೋತ್ಪತ್ತಿಯಲ್ಲಿ ತೊಡಗಿರುತ್ತವೆ. ಆದರೆ ಆಷಾಢ ಮಾಸ ಶುರುವಾಯಿತು ಎಂದರೆ ನಾಯಿಗಳ ಮಿಲನಮಹೋತ್ಸವಕ್ಕೆ ಹೇಳಿ ಮಾಡಿಸಿದ ಸಮಯ. ಹೀಗಾಗಿ ನಾಯಿಗಳ ಹಿಂಡು ಸೀಲ್ಡೌನ್ ಪ್ರದೇಶದಲ್ಲಿ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಿವೆ.
