ಕುಕ್ಕುಟೋದ್ಯಮದ ಮೇಲೆ ಕೋವಿಡ್ ಕೆಂಗಣ್ಣು: ಸಂಕಷ್ಟದಲ್ಲಿ ಪೌಲ್ಟ್ರಿ ಮಾಲೀಕರು, ಕಾರ್ಮಿಕರು!

ಮಾರಣಾಂತಿಕ ಕೋವಿಡ್​ ಎರಡನೇ ಅಲೆಗೆ ರಾಜ್ಯದ ಜನತೆ ಬೆಚ್ಚಿ ಬಿದ್ದಿದ್ದಾರೆ. ಕುಕ್ಕುಟೋದ್ಯಮದ ಮೇಲೂ ಕೋವಿಡ್​ ಕರಿಛಾಯೆ ಆವರಿಸಿದ್ದು, ವ್ಯಾಪಾರ ಕುಠಿತಗೊಂಡಿದೆ. ಅದರ ನೇರ ಪರಿಣಾಮ ಕೋಳಿ ಸಾಕಣಿಕೆಯ ಮಾಲೀಕರ ಮೇಲೆ ಬಿದ್ದಿದ್ದು, ಕಾರ್ಮಿಕರು ಕೂಡ ಜೀವನ ನಿರ್ವಹಣೆಗೆ ಪರದಾಡುತ್ತಿದ್ದಾರೆ.

ಬೆಂಗಳೂರು/ಕೊಪ್ಪಳ/ಹಾವೇರಿ: ರಾಜ್ಯದೆಲ್ಲೆಡೆ ಉಲ್ಬಣಗೊಂಡ ಕೋವಿಡ್​ ತತೆಗೆ ಜನತಾ ಕರ್ಫ್ಯೂ ಆಗಿ ಇದೀಗ ಲಾಕ್​ಡೌನ್​ ಜಾರಿಯಲ್ಲಿದೆ. ಇದ್ರ ಪರಿಣಾಮ ಕುಕ್ಕುಟೋದ್ಯಮದ ಮೇಲೂ ಬಿದ್ದಿದ್ದು, ಪೌಲ್ಟ್ರಿ ಮಾಲೀಕರು, ಕಾರ್ಮಿಕರು ಸಂಕಷ್ಟಕ್ಕೆ ಸಿಲುಕಿದ್ದಾರೆ.

ಲಾಕ್​ಡೌನ್​​ನಿಂದ ಹೋಟೆಲ್​, ಫಾಸ್ಟ್ ಫುಡ್​ ಸೆಂಟರ್​, ಮಾಲ್​ಗಳು ಬಂದ್​ ಆಗಿದ್ದು, ಕೋಳಿಗಳಿಗೆ ಬೆಡಿಕೆ ಇಲ್ಲದಂತಾಗಿದೆ. ಬೆಳಗ್ಗೆ ನಿಗದಿಪಡಿಸಿರುವ ಅವಧಿಯಲ್ಲಿ ಉತ್ತಮ ವ್ಯಾಪಾರ ಆಗುತ್ತಿಲ್ಲ. ಹಾಗಾಗಿ ಪೌಲ್ಟ್ರಿ ಫಾರಂನಿಂದ ಮಧ್ಯವರ್ತಿಗಳು ಅತಿ ಕಡಿಮೆ ಬೆಲೆಗೆ ಕೋಳಿ ಖರೀದಿಸುತ್ತಿದ್ದು, ಬೆಂಗಳೂರಿನ ಕುಕ್ಕುಟೋದ್ಯಮ ನಷ್ಟ ಅನುಭವಿಸುತ್ತಿದೆ.

ಕೊಪ್ಪಳ ಜಿಲ್ಲೆಯಲ್ಲೂ 30 ಪೌಲ್ಟ್ರಿ ಫಾರಂ​​ಗಳಿದ್ದು, ನೂರಾರು ಮಂದಿ ಕೆಲಸ ಮಾಡುತ್ತಿದ್ದಾರೆ. ಇದೀಗ ಲಾಕ್​ಡೌನ್​​ನಿಂದ ಕಾರ್ಮಿಕರಿಗೂ ಕೆಲಸಕ್ಕೆ ಬರಲು ಆಗುತ್ತಿಲ್ಲ. ಜತೆಗೆ ಕೋಳಿ, ಮೊಟ್ಟೆ ಸಾಗಣೆಯೂ ಸರಿಯಾಗಿ ಆಗದೆ ಶೇ. 30ರಷ್ಟು ವ್ಯಾಪಾರ-ವಹಿವಾಟು ಕಡಿಮೆಯಾಗಿದೆ ಅಂತಾರೆ ಪೌಲ್ಟ್ರಿ ಫಾರಂ ಉದ್ಯೋಗಿಗಳು.

ಬೆಳಗಿನ ನಿಗದಿತ ಸಮಯದಲ್ಲಿ ಕೋಳಿ, ಮೊಟ್ಟೆ ಕೊಳ್ಳುವವರಿಲ್ಲದೇ ಇದಕ್ಕೆ ಬೇಡಿಕೆ ಕಡಿಮೆಯಾಗಿದೆ. ಕಾರ್ಮಿಕರಿಗೆ ಫಾರಂ​ಗೆ ಬರಲು ಮತ್ತು ಕೋಳಿ, ಮೊಟ್ಟೆ ಸಾಗಿಸಲು ಲಾಕ್​ಡೌನ್​ ಕೊಂಚ ಅಡ್ಡಿಯಾಗಿದೆ. ಹೀಗೆ ನಾನಾ ಸಮಸ್ಯೆಯಿಂದ ಹಾವೇರಿ ಪೌಲ್ಟ್ರಿ ಫಾರಂಗಳು ಸಂಕಷ್ಟಕ್ಕೆ ಸಿಲುಕಿವೆ.

ರಾಜ್ಯದ ಪ್ರತೀ ಕ್ಷೇತ್ರಕ್ಕೂ ಕೋವಿಡ್​ ಹೊಡೆತ ಕೊಟ್ಟಿದ್ದು, ಇದೀಗ ಪೌಲ್ಟ್ರಿ ಫಾರಂನವರು ಕೂಡ ಸಂಕಷ್ಟದ ಸುಳಿಯಲ್ಲಿ ಸಿಲುಕಿದ್ದಾರೆ. ಹಾಗಾಗಿ ಸೋಂಕನ್ನು ಸಂಪೂರ್ಣವಾಗಿ ಸದೆಬಡಿಯಲು ಸರ್ವರೂ ಸನ್ನದ್ಧರಾಗಬೇಕಿದೆ.