ಕೊಡಗು : ಎಡಕಲ್ಲು ಗುಡ್ಡದ ಮೇಲೆ ಸಿನಿಮಾ ಯಾರಿಗೆ ತಾನೇ ಗೊತ್ತಿಲ್ಲ ಹೇಳಿ.. 40 ವರ್ಷಗಳ ಹಿಂದೆ ತೆರೆಕಂಡ ಈ ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಈ ಸಿನಿಮಾ ಚಿತ್ರೀಕರಿಸಲಾದ ಆ ‘ಎಡಕಲ್ಲು ಗುಡ್ಡ’ ಈಗ ಚಾರಣಕ್ಕೆ ಫೇಮಸ್ ಆಗಿದೆ.
ಕೊಡಗು-ಹಾಸನ ಗಡಿಯಲ್ಲಿರೋ ‘ಗವಿಸಿದ್ದೇಶ್ವರ’ ಬೆಟ್ಟವನ್ನು ಎಡಕಲ್ಲು ಗುಡ್ಡ ಅಂತಾನೂ ಕರೆಯಲಾಗುತ್ತೆ. ಸೋಮವಾರಪೇಟೆ ತಾಲೂಕಿನ ಶನಿವಾರ ಸಂತೆಯಿಂದ ಸುಬ್ರಹ್ಮಣ್ಯ ರಸ್ತೆಯಲ್ಲಿ 8 ಕಿ.ಮೀ. ದೂರ ಸಾಗಿದರೆ ಉಚ್ಚಂಗಿ ಗ್ರಾಮ ಸಿಗಲಿದೆ. ಇಲ್ಲಿಂದ ಕಚ್ಚಾ ರಸ್ತೆಯಲ್ಲಿ ಸುಮಾರು 4 ಕಿ.ಮೀ ದೂರ ನಡೆದು ಸಾಗಿದರೆ ಎಡಕಲ್ಲು ಗುಡ್ಡ ಎದುರಾಗುತ್ತದೆ.
ಗುಡ್ಡದ ಮೇಲೆ ಸಾಗಿದರೆ ಕಣ್ಣು ಹಾಯಿಸದಷ್ಟು ದೂರದವೆರಗೂ ಬರೀ ಹಸಿರು ಹೊದಿಕೆ ಬಿಟ್ಟು ಬೇರೇನೂ ಕಾಣಿಸಲ್ಲ. ಇಂತಹ ಹಸಿರ ಕಾಶಿ ಕಣ್ತುಂಬಿಕೊಳ್ಳಲು ಇಲ್ಲಿಗೆ ಪ್ರತಿನಿತ್ಯ ಸಾವಿರಾರು ಪ್ರವಾಸಿಗರು ಆಗಮಿಸುತ್ತಾರೆ. ಈ ಬೆಟ್ಟ ಅದೆಷ್ಟು ಸೊಗಸಾಗಿದ್ಯೋ ಅಷ್ಟೇ ಅಪಾಯಕಾರಿಯೂ ಹೌದು.
ಬೆಟ್ಟದ ಒಂದು ತುದಿ ಕಡಿದಾಗಿದ್ದು, ಆಳವಾದ ಪ್ರಪಾತವಿದೆ. ಅಚ್ಚರಿ ಅಂದ್ರೇ ಇಲ್ಲೊಂದು ಕಲ್ಲಿನ ಅಟ್ಟಣಿಗೆಯಿದ್ದು, 5 ಬೃಹತ್ ಬಂಡೆಗಳನ್ನು ಒಂದರ ಮೇಲೊಂದು ಜೋಡಿಸಿಡಲಾಗಿದೆ. ಈ ಸುಂದರ ದೃಶ್ಯ ಕಂಡು ಪ್ರವಾಸಿಗರಿಗೂ ಅಚ್ಚುಮೆಚ್ಚು.
ಹೆಚ್ಚಿನದಾಗಿ ಒಂದು ದಿನದ ಚಾರಣಕ್ಕೆ ಬರುವವರು ಇಲ್ಲಿನ ಸುತ್ತಮುತ್ತಲ ಪ್ರದೇಶದಲ್ಲಿ ಪ್ರವಾಸ ಕೈಗೊಳ್ಳುತ್ತಾರೆ.
