ಕಲಬುರಗಿ: ಆತ ಒಂದಲ್ಲ ಎರಡಲ್ಲ ಬರೊಬ್ಬರಿ 12 ವರ್ಷಗಳ ಕಾಲ ಸೇವೆ ಸಲ್ಲಿಸಿ ಎಲ್ಲರಿಂದ ಶಬ್ಬಾಶ್ಗಿರಿ ಪಡೆದಂತ ಧೀರ, ಎಲ್ಲರೊಂದಿಗೆ ಸಲುಗೆಯಿಂದ ವರ್ತಿಸಿ ಎಲ್ಲರ ಅಚ್ಚುಮೆಚ್ಚಿನವನಾಗಿದ್ದ, ಸುದೀರ್ಘ ಹನ್ನೆರಡು ವರ್ಷಗಳ ಕಾಲ ಎಲ್ಲರ ಮೆಚ್ಚುಗೆಗೆ ಪಾತ್ರನಾಗಿ ಸೇವೆ ಸಲ್ಲಿಸಿದ ಚಾಲಾಕಿ ಧೀರ ಇದೀಗ ಮರಳಿ ಬಾರದ ಲೋಕಕ್ಕೆ ಪಯಣಿಸಿದ್ದಾನೆ.
ಹೌದು ಕಲಬುರಗಿ ಜಿಲ್ಲಾ ಪೊಲೀಸ್ ಇಲಾಖೆಯ ಚಾಣಾಕ್ಷ, ಪತ್ತೆದಾರಿ ಜರ್ಮನ್ ಶೆಫರ್ಡ್ ಮುದ್ದಿನ ಶ್ವಾನ ಬಂಟಿ ಇಂದಿಗೆ ತನ್ನ ಜೀವನದ ಪಯಣ ಅಂತಿಮಗೊಳಿಸಿದ್ದಾನೆ. 12 ವರ್ಷ 7 ತಿಂಗಳ ವಯಸ್ಸಿನ ಬಂಟಿ ವಯೋಸಹಜ ಸಾವನ್ನಪ್ಪಿದ್ದಾನೆ. 2006 ಅಕ್ಟೋಬರ್ 14 ರಂದು ಜನಿಸಿದ್ದ ಬಂಟಿ ಬೆಂಗಳೂರಿನಲ್ಲಿ 1 ವರ್ಷದ ತರಬೇತಿ ನಂತರ 2008 ಜೂನ್ 25ರಂದು ಕಲಬುರಗಿ ಬಾಂಬ್ ನಿಷ್ಕ್ರಿಯ ದಳದಲ್ಲಿ ಪತ್ತೆದಾರಿ ಶ್ವಾನನಾಗಿ ಸೇವೆ ಆರಂಭಿಸಿದ್ದ, ಕಲಬುರಗಿ ಜಿಲ್ಲೆ ಮಾತ್ರವಲ್ಲ ಹೈದರಾಬಾದ್ ಕರ್ನಾಟಕದಲ್ಲಿ ಎಲ್ಲೇ ಬಾಂಬ್ ವಿಷಯ ಬಂದಾಗಲೂ ಕೂಡಲೇ ಇಲಾಖೆಗೆ ಬಂಟಿಯ ನೆನಪಾಗುತ್ತಿತ್ತು.
ಕರ್ತವ್ಯ ನಿಷ್ಠನಾಗಿದ್ದ ಬಂಟಿ ಕ್ಷಣಾರ್ಧದಲ್ಲಿ ಹುದುಗಿಸಿಟ್ಟಿದ್ದ ಬಾಂಬ್ಗಳನ್ನು ಪತ್ತೆ ಹಚ್ಚಿಬಿಡುತ್ತಿದ್ದ, ಅದಕ್ಕಾಗಿಯೇ ಕಲಬುರಗಿ ಪೊಲೀಸರಿಗೆ ಬಂಟಿ ಅಂದರೆ ಅದೇನೋ ವಿಶೇಷ ಪ್ರೀತಿ. ಈಗ ತಮ್ಮ ಅಚ್ಚುಮೆಚ್ಚಿನ ಬಂಟಿ ಸಾವನ್ನಪ್ಪಿರುವ ವಿಷಯದಿಂದ ಇಲಾಖೆ ಸಿಬ್ಬಂದಿಗೆ ಬರಸಿಡಿಲು ಅಪ್ಪಳಿಸಿದಂತಾಗಿದೆ. ಸಾವಿನ ಸುದ್ದಿ ತಿಳಿದು ಬಾಂಬ್ ನಿಷ್ಕ್ರಿಯ ದಳ ಸಿಬ್ಬಂದಿ ಕಣ್ಣೀರು ಹಾಕಿದ್ದಾರೆ. ಬಂಟಿಯ ಒಡನಾಟ ನೆನಪಿಸಿಕೊಂಡು ಗದ್ಗಿತರಾಗುತ್ತಿದ್ದಾರೆ.
ಬಂಟಿಯಲ್ಲಿದ್ದ ಚಾಣಾಕ್ಷತನವೇ ಆತನಿಗೆ ಹೆಸರು ತಂದುಕೊಟ್ಟಿತ್ತು. ರಾಷ್ಟ್ರಪತಿ ಪ್ರತಿಭಾ ಪಾಟೀಲ್, ಪ್ರಣಬ್ ಮುಖರ್ಜಿ, ಪ್ರಧಾನಿ ಮನಮೋಹನ್ ಸಿಂಗ್, ನರೇಂದ್ರ ಮೋದಿ ಸೇರಿ ಹೈದ್ರಾಬಾದ್ ಕರ್ನಾಟಕಕ್ಕೆ ವಿವಿಐಪಿಗಳು ಭೇಟಿ ನೀಡಿದ ಸಂದರ್ಭದಲ್ಲಿ ಅವರಿಗೆ ಸೇಫ್ಟಿ ನೀಡುವ ವಿಷಯದಲ್ಲಿ ಬಂಟಿ ಮುಂದಾಳತ್ವ ಬಹುಮುಖ್ಯವಾಗಿತ್ತು. ಅಷ್ಟರಮಟ್ಟಿಗೆ ಬಂಟಿ ಚಾಣಾಕ್ಷತನ ಹೊಂದಿದ್ದ. ಹಿಂದೊಮ್ಮೆ ಕಲಬುರಗಿ ಜಿಲ್ಲೆಯ ವಾಡಿ- ಚಿತಾಪುರ ರೈಲು ಹಳಿ ಕೆಳಗೆ ಜಿಲೆಟಿನ್ ಕಡ್ಡಿಗಳು ಇಟ್ಟು ಸ್ಪೋಟಿಸಲು ಯತ್ನಿಸಿದ ಪ್ರಕರಣ ಬೇಧಿಸುವಲ್ಲಿ ಬಂಟಿ ಪ್ರಮುಖ ಪಾತ್ರ ವಹಿಸಿದ್ದ. ಇದರಂತೆ ನೂರಾರು ಪ್ರಕರಣಗಳನ್ನು ಬೇಧಿಸುವಲ್ಲಿ ಬಂಟಿ ಯಶಸ್ವಿಯಾಗಿದ್ದಾನೆ.
ವಯೋಸಹಜವಾಗಿ ಸಾವನ್ನಪ್ಪಿದ ಬಂಟಿ ಅಂತ್ಯಕ್ರಿಯೆ ಕಲಬುರಗಿಯ ಡಿಎಆರ್ ಪೊಲೀಸ್ ಕವಾಯತು ಮೈದಾನದಲ್ಲಿ ಸಕಲ ಸರ್ಕಾರಿ ಗೌರವಗಳೊಂದಿಗೆ ನೆರವೇರಿಸಲಾಯಿತು. ಎಸ್.ಪಿ ಯಡಾ ಮಾರ್ಟಿನ್ ಹಾಗೂ ಮತ್ತಿತರ ಅಧಿಕಾರಿಗಳು ಅಂತಿಮ ದರ್ಶನ ಪಡೆದರು. ಗಾಳಿಯಲ್ಲಿ ಮೂರು ಸುತ್ತು ಗುಂಡು ಹಾರಿಸುವ ಮೂಲಕ ಪೊಲೀಸರು ಗೌರವ ಸಲ್ಲಿಸಿದರು. ನಂತರ ಹಿಂದೂ ಸಂಪ್ರದಾಯದಂತೆ ಅಂತ್ಯಕ್ರಿಯೆ ನೆರವೇರಿಸಲಾಯಿತು. ತನ್ನ ಸೇವಾ ಅವಧಿಯಲ್ಲಿ ಹಲವು ಸಾಧನೆ ಮಾಡಿದ್ದ ಬಂಟಿ ಈಗ ಇತಿಹಾಸದ ಪುಟ ಸೇರಿದ್ದಾನೆ. ಆತ ಈಗ ಕೇವಲ ನೆನಪು ಮಾತ್ರ.
