ಕಲಬುರಗಿ: ನಮ್ಮ ಮುಂದಿನ ಎಂಎಲ್ಎ ಅರವಿಂದ ಚೌಹಾಣ್ ಎಂದು ಫೇಸ್ಬುಕ್ನಲ್ಲಿ ಪೋಸ್ಟ್ ಹಾಕಿದ್ದಕ್ಕೆ, ಯುವಕನೋರ್ವನನ್ನು ಚಿತ್ತಾಪುರ ಮಾಜಿ ಶಾಸಕ ವಾಲ್ಮೀಕಿ ನಾಯಕ ಅವ್ಯಾಚ ಶಬ್ದದಿಂದ ನಿಂದಿಸಿದ ಘಟನೆ ಬೆಳಕಿಗೆ ಬಂದಿದೆ.
ರಾವೂರ್ ಗ್ರಾಮದ ನಿವಾಸಿ ಮಹಾಂತೇಶ್ ಕಿರಣಗಿ ಎಂಬ ಯುವಕ ತನ್ನ ಫೇಸ್ಬುಕ್ ಖಾತೆಯಲ್ಲಿ ಚಿತ್ತಾಪುರದ ಮುಂದಿನ ಎಂಎಲ್ಎ ಅರವಿಂದ ಚೌಹಾಣ್ ಎಂದು ಬರೆದುಕೊಂಡಿದ್ದಾನೆ.
ಇದರಿಂದ ಕೆಂಡಾಮಂಡಲರಾದ ಮಾಜಿ ಶಾಸಕ ವಾಲ್ಮೀಕಿ ನಾಯಕ, ಯುವಕನಿಗೆ ಕರೆ ಮಾಡಿ ಮನಬಂದಂತೆ ಅವ್ಯಾಚ ಶಬ್ದಗಳಿಂದ ಬೈಯ್ದಿದ್ದಾರೆ. ಅಲ್ಲದೆ ನಿನ್ನನ್ನು ನೋಡಿಕೊಳ್ಳುತ್ತೇನೆ ಎಂದು ಆವಾಜ್ ಹಾಕಿರುವ ಆಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಯುವಕ ನಾನು ಅರವಿಂದ್ ಚೌಹಾಣ್ ಪಿಎ ಎಂದು ಹೇಳಿದರೂ, ನೀನು ಯಾರ ಪಿಎ ಆದ್ರೂ ಆಗಿರು. ಮುಂದಿನ ಎಂಎಲ್ಎ ಅರವಿಂದ ಎಂದು ಯಾಕ್ ಪೋಸ್ಟ್ ಮಾಡಿದ್ದಿಯಾ.. ನಾವು ನಲವತ್ತು ವರ್ಷಗಳಿಂದ ದುಡಿಯುತ್ತಿದ್ದೇವೆ.
ಈಗ ಬಂದು ಮುಂದಿನ ಎಂಎಲ್ಎ ಅಂತ ಹೇಳೋಕೆ ನೀನ್ಯಾರು ಎಂದು ಕೀಳು ಪದಗಳ ಪ್ರಯೋಗ ಮಾಡಿದ್ದಾರೆ. ತಮ್ಮದೇ ಪಕ್ಷದ ಯುವಕನಿಗೆ ವಾಲ್ಮೀಕಿ ನಾಯಕ ಅವರು ಈ ರೀತಿ ಆವಾಜ್ ಹಾಕಿರುವುದು ನೆಟ್ಟಿಗರ ಆಕ್ರೋಶಕ್ಕೆ ಕಾರಣವಾಗಿದೆ.
