ಹಾವೇರಿ: ಇಲ್ಲೊಂದು ಸಾರಿಗೆ ಬಸ್ ಇದೆ. ಈ ಬಸ್‌ನಲ್ಲಿ ಪಯಣಿಸುವ ಪ್ರಯಾಣಿಕ ತನ್ನ ಗಮ್ಯ ಸ್ಥಳವನ್ನೇ ಮರೆಯುತ್ತಾನೆ. ತಾನು ಇಳಿಯುವ ಸ್ಥಳ ಯಾಕೆ? ಇಷ್ಟು ಬೇಗ ಬಂತು ಎಂದು ಬೇಸರ ವ್ಯಕ್ತಪಡಿಸುತ್ತಾನೆ. ಈ ಬಸ್‌ನಲ್ಲಿ ಪಯಣ ಹೀಗೆ ಮುಂದುವರೆದರೆ ಎಷ್ಟು ಚೆನ್ನಾಗಿತ್ತು ಎಂದು ಕೊಳ್ಳುತ್ತಾನೆ. ಇದೇನಪ್ಪಾ?, ಇದ್ಯಾವ ಸಾರಿಗೆ ಬಸ್ ಅಂತೀರಾ ಈ ಸ್ಟೋರಿ ನೋಡಿ.
ಹಿರೇಕೆರೂರು ತಾಲೂಕು ಸಾರಿಗೆ ವಿಭಾಗದ ನಿರ್ವಾಹಕ ಶಶಿಧರ್ ಕಳೆದ ಮೂರು ವರ್ಷಗಳಿಂದ ತನಗೆ ನೀಡಿದ ಸಾರಿಗೆ ಬಸ್‌ನಲ್ಲಿ ಕರ್ನಾಟಕ ದರ್ಶನ ಮಾಡಿಸುತ್ತಿದ್ದಾರೆ.
ಬಸ್ಸಿನಲ್ಲಿ ಕರ್ನಾಟಕ ದರ್ಶನ: ಬಸ್‌ನಲ್ಲಿ ಕರ್ನಾಟಕದ 31 ಜಿಲ್ಲೆಗಳಿವೆ. ಜತೆಗೆ 31 ಜಿಲ್ಲೆಗಳ ಪ್ರವಾಸಿ ತಾಣಗಳ ಚಿತ್ರಗಳು ರಾಜ್ಯದ ಚಿತ್ರಣವನ್ನು ಕಣ್ಮುಂದೆ ತರುತ್ತವೆ. ರಾಜ್ಯದ ಪ್ರಮುಖ ಕವಿಗಳು, ಮಹಾಪುರುಷರು, ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತ ಸಾಹಿತಿಗಳು, ಪ್ರಮುಖ ನದಿಗಳು, ಪ್ರತಿ ಜಿಲ್ಲೆಯಲ್ಲಿನ ತಾಲೂಕುಗಳು ಸೇರಿ ಬಸ್ ಸಂಪೂರ್ಣ ಕನ್ನಡಮಯವಾಗಿದೆ.
ಅಕ್ಷರಶಃ ಕನ್ನಡ ತೇರಾಗಿರುವ ಈ ಬಸ್ ನೋಡುವ ಕಣ್ಣಿಗೆ ಹಬ್ಬ. ಕನ್ನಡಾಂಬೆ ಭುವನೇಶ್ವರಿ ಮೂರ್ತಿ ಇರುವ ಈ ಬಸ್‌ನಲ್ಲಿ ಪ್ರತಿ ಆಸನದಲ್ಲಿ ಕನ್ನಡ ಪುಸ್ತಕ ಇರಿಸಲಾಗಿದೆ. ಇಂದಿನ ದಿನಪತ್ರಿಕೆ, ವಾರ ಪತ್ರಿಕೆ ಸೇರಿದಂತೆ ಕನ್ನಡದ ಮಹಾ ನಟರು, ಕರ್ನಾಟಕ ರತ್ನ ಪ್ರಶಸ್ತಿ ಪುರಸ್ಕೃತರ ಭಾವಚಿತ್ರಗಳಿವೆ.
ಇದನ್ನೂ ಓದಿ: ನಡೆ ಕನ್ನಡ, ನುಡಿ ಕನ್ನಡ.. ಸಾರಿಗೆ ಸಂಸ್ಥೆ ಬಸ್ನ್ನೇ ಕನ್ನಡಮಯವಾಗಿಸಿದ್ರು ಈ ವಿಶಿಷ್ಟ ಬಸ್ ಚಾಲಕ
ಮಾರ್ಗದುದ್ದಕ್ಕೂ ಕನ್ನಡದ ಕಂಪು: ಈ ಬಸ್‌ನಲ್ಲಿ ಟೇಪ್ ರೆಕಾರ್ಡರ್ ಸಹ ಅಳವಡಿಸಲಾಗಿದೆ. ಕನ್ನಡ ಪ್ರೇಮ ಮೆರೆಯುವ ಗೀತೆಗಳು ಪ್ರಯಾಣಿಕರ ಕಿವಿಗೆ ರಿಂಗಣಿಸುತ್ತವೆ. ಈ ಬಸ್ ಹಿರೇಕೆರೂರಿಂದ ಬೆಳಗಾವಿ ವಿಭಾಗಕ್ಕೆ ಪ್ರತಿದಿನ ಸಂಚರಿಸುತ್ತದೆ. ತಾನು ಸಂಚರಿಸುವ ಮಾರ್ಗದುದ್ದಕ್ಕೂ ಕನ್ನಡದ ಕಂಪು ಸೂಸುತ್ತದೆ.
'ಬಸ್‌ನಲ್ಲಿ ಪಯಣಿಸುವ ಪ್ರಯಾಣಿಕರಿಗೆ ಕನ್ನಡ ಅಭಿಮಾನ ಹೆಚ್ಚಿಸುತ್ತದೆ. ಈ ಬಸ್‌ನಲ್ಲಿ ಪಯಣಿಸಿದರೆ ಸಾಕು, ಪೂರ್ಣ ಕರ್ನಾಟಕ ಸುತ್ತಿ ಬಂದಂತೆ ಆಗುತ್ತದೆ. ಇಂತಹ ಬಸ್‌ನಲ್ಲಿ ಪ್ರಯಾಣಿಸುವುದೇ ನಮಗೆ ಹೆಮ್ಮೆ' ಎನ್ನುತ್ತಾರೆ ಪ್ರಯಾಣಿಕರು.
ಬಸ್ ನಿರ್ವಾಹಕ ಶಶಿಧರ್ ಅವರು ಪ್ರತಿ ವರ್ಷ ಸಾರಿಗೆ ವಿಭಾಗದಲ್ಲಿ ಕನ್ನಡ ರಾಜ್ಯೋತ್ಸವ ಆಚರಿಸುತ್ತ ಬಂದಿರುವುದು ಇನ್ನೊಂದು ವಿಶೇಷ. ಸಾರಿಗೆ ಇಲಾಖೆಯ ಬಸ್‌ಗಳೆಂದರೆ ಸಾಕು, ಮೂಗು ಮುರಿಯವವರೇ ಅಧಿಕವಾಗುತ್ತಿರುವ ಈ ದಿನಗಳಲ್ಲಿ ಈ ಬಸ್ ಕನ್ನಡ ನಾಡಿನ ದರ್ಶನ ಮಾಡಿಸುತ್ತದೆ.
ನಿರ್ವಾಹಕ ಶಶಿಧರ್‌ಗೆ ಚಾಲಕ ಆಂಜನೇಯ ಸಾಥ್ ನೀಡಿದ್ದು, ಬಸ್ ಮತ್ತಷ್ಟು ಕನ್ನಡದ ಕಂಪು ಬೀರುತ್ತದೆ. ಪ್ರಸ್ತುತ ಹಿರೇಕೆರೂರುನಿಂದ ಬೆಳಗಾವಿಗೆ ಸಂಚರಿಸುವ ಈ ಬಸ್‌ನಲ್ಲಿ ನವೆಂಬರ್ ತಿಂಗಳಲ್ಲಿ ರಾಜ್ಯದ ವಿವಿಧ ಜಿಲ್ಲೆಗಳಿಗೆ ಹೋಗುವ ಇಂಗಿತವನ್ನು ನಿರ್ವಾಹಕ ಶಶಿಧರ್ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ: ಕನ್ನಡ ಬಳಕೆಗೆ ಕಾನೂನು ಚೌಕಟ್ಟು, ಅಧಿವೇಶನದಲ್ಲಿ ಕನ್ನಡ ಕಡ್ಡಾಯ ಮಸೂದೆ: ಸಿಎಂ ಬೊಮ್ಮಾಯಿ
