ಹಾವೇರಿ: ಯುವಕನೊಬ್ಬ ಪ್ರೀತಿಸಿದ ಯುವತಿಯೊಂದಿಗೆ ಪರಾರಿಯಾಗಿದ್ದಕ್ಕೆ ಆತನ ಸೋದರ ಮಾವನನ್ನು ಅರೆಬೆತ್ತಲೆ ಮಾಡಿ ಹಿಗ್ಗಾಮುಗ್ಗಾ ಥಳಿಸಿರುವ ಘಟನೆ ಹಾವೇರಿ ಜಿಲ್ಲೆಯಲ್ಲಿ ನಡೆದಿದ್ದು, ಈ ಬಗ್ಗೆ ಹಲಗೇರಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ. ಮನೆಯಿಂದ ಯುವತಿ ಕಾಣಿಯಾಗಲು ಯುವಕನ ಸೋದರ ಮಾವನೇ ಕಾರಣ ಎಂದು ಆರೋಪಿಸಿ ಯುವತಿಯ ಕಡೆಯವರು ಹಲ್ಲೆಗೆ ಮುಂದಾಗಿದ್ದಾರೆ. ''ಪ್ರಕರಣ ಸಂಬಂಧ ನಾಲ್ಕು ಆರೋಪಿಗಳನ್ನು ಬಂಧಿಸಲಾಗಿದೆ'' ಎಂದು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಅಂಶುಕುಮಾರ್ ಮುದೇನೂರು ಮಾಹಿತಿ ನೀಡಿದ್ದಾರೆ.
''ಹುಡುಗಿಯ ಕಡೆಯವರು ರಾಣೆಬೆನ್ನೂರಿನ ಜಾನುವಾರ ಮಾರುಕಟ್ಟೆ ಬಳಿ ಕರೆತಂದ ತನ್ನನ್ನು ಮನಬಂದಂತೆ ಥಳಿಸಿದ್ದಾರೆ. ಜೀವ ಬೆದರಿಕೆ ಹಾಕಿ ಇಲ್ಲಿಯ ಪೊಲೀಸ್ ಠಾಣೆ ಎದುರು ಬಿಟ್ಟು ಹೋಗಿದ್ದಾರೆ. ತನಗೆ ಅವರಿಂದ ಜೀವ ಬೆದರಿಕೆಯಿದ್ದು ಗಲಾಟೆ ವೇಳೆ ನನ್ನ ಪತ್ನಿ, ತಂದೆ-ತಾಯಿ ಮೇಲೆಯೂ ಹಲ್ಲೆ ನಡೆದಿದೆ'' ಎಂದು ಥಳಿತಕ್ಕೊಳಗಾದ ವ್ಯಕ್ತಿ ಆರೋಪ ಮಾಡಿದ್ದಾನೆ. ಗಾಯಾಳುವನ್ನು ಇದೀಗ ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಗಿದೆ.
ಕಳೆದ ರಾತ್ರಿ ನಾಪತ್ತೆಯಾಗಿದ್ದ ಯುವಕ - ಯುವತಿ ಮದುವೆಯಾಗಿದ್ದು, ನೇರವಾಗಿ ಹಾವೇರಿ ಎಸ್ಪಿ ಕಚೇರಿಗೆ ಆಗಮಿಸಿದ್ದಾರೆ. ''ತಮಗೆ ಜೀವ ಬೆದರಿಕೆ ಇದೆ. ಹಾಗಾಗಿ ಭದ್ರತೆ ನೀಡುವಂತೆ'' ಜೋಡಿ ಎಂದು ಮನವಿ ಮಾಡಿದೆ. ''ನಾವಿಬ್ಬರು ನಾಲ್ಕು ವರ್ಷದಿಂದ ಪ್ರೀತಿಸುತ್ತಿದ್ದೆವು. ಯುವತಿಯ ಕಡೆಯವರು ಬೇರೆ ಹುಡುಗನ ನೋಡಿ ಮದುವೆ ಮಾಡಲು ಮುಂದಾಗಿದ್ದರಿಂದ ನಾವು ತಪ್ಪಿಸಿಕೊಂಡು ಹೋಗಿ ಮದುವೆಯಾಗಿದ್ದೇವೆ. ನಾನು ನಾಪತ್ತೆಯಾಗುತ್ತಿದ್ದಂತೆ ಯುವತಿ ಸಂಬಂಧಿಕರು ನನ್ನ ಸೋದರ ಮಾವನ ಮೇಲೆ ಅಮಾನವೀಯವಾಗಿ ವರ್ತಿಸಿದ್ದಾರೆ. ದಯವಿಟ್ಟು ನಮಗೆ ರಕ್ಷಣೆ ನೀಡಿ'' ಎಂದು ನೂತನ ದಂಪತಿ ಎಸ್ಪಿ ಅಂಶುಕುಮಾರ್ ಅವರಿಗೆ ಮನವಿ ಮಾಡಿದ್ದಾರೆ.
ಪ್ರಕರಣ ಕುರಿತು ಮಾತನಾಡಿರುವ ಎಸ್ಪಿ ಅಂಶುಕುಮಾರ್ ಮುದೇನೂರು, ''ಹಲಗೇರಿ ಪೊಲೀಸ್ ಠಾಣೆಯಲ್ಲಿ ಈಗಾಗಲೇ ಈ ಬಗ್ಗೆ ದೂರು ದಾಖಲಾಗಿದೆ. ಹಲ್ಲೆ ಹಿನ್ನೆಲೆ ಶಿವಾಜಪ್ಪ ಕಮದೋಡ, ಬಸವರಾಜಪ್ಪ ಬೆನಕನಕೊಂಡ, ಹರೀಶ ಬೆನಕನಕೊಂಡ, ಸುನೀಲ್ ಉಚ್ಚಂಗೆಪ್ಪ ಎಂಬ ನಾಲ್ಕು ಆರೋಪಿಗಳನ್ನು ಬಂಧಿಸಲಾಗಿದೆ. ಬಂಧಿತರು ಆರೋಪಿಗಳು ಏಕಾಏಕಿ ಯುವಕನ ಸೋದರ ಮಾವನ ಮನೆಗೆ ನುಗ್ಗಿದ್ದಲ್ಲದೆ ಕಿಡ್ನಾಪ್ ಮಾಡಿ ಹಲ್ಲೆ ಮಾಡಿದ್ದರು. ಹಲ್ಲೆ ಬಳಿಕ ಗ್ರಾಮೀಣ ಪೊಲೀಸ್ ಠಾಣೆಯ ಮುಂದೆ ಬಿಟ್ಟು ಹೋಗಿದ್ದರು. ಯುವಕ ಮತ್ತು ಯುವತಿ ಒಂದೇ ಸಮಾಜದವರು. ಕಳೆದ ಕೆಲವು ದಿನಗಳ ಹಿಂದೆ ಹಿರಿಯರು ಸೇರಿ ರಾಜೀ ಪಂಚಾಯಿತಿ ಮಾಡಿದ್ದರು. ಆದರೆ, ಯುವಕ - ಯುವತಿ ಮೂರು ದಿನದ ಹಿಂದೆ ಓಡಿ ಹೋಗಿದ್ದರು. ಯುವತಿ ಮನೆಯರು ಸಹ ದೂರು ನೀಡಲು ರೆಡಿಯಾಗಿದ್ದಾರೆ ಎಂದಿದ್ದಾರೆ.
ನೂತನ ದಂಪತಿಯನ್ನು ಸದ್ಯ ಪೊಲೀಸ್ ವಾಹನದಲ್ಲಿ ಕರೆದುಕೊಂಡು ಹೋಗಿ ಮುದೇನೂರಿಗೆ ಬಿಟ್ಟು ಬರಲಾಗಿದೆ. ಅಲ್ಲದೆ ಓರ್ವ ಸಿಬ್ಬಂದಿಯನ್ನು ರಕ್ಷಣೆಗೆ ನಿಯೋಜಿಸಲಾಗಿದೆ. ಈ ಕುರಿತಂತೆ ಹಲಗೇರಿ ಪೊಲೀಸ್ ಠಾಣೆಯಲ್ಲಿ 143,147,323,504,365,354,307,395, ಮತ್ತು ಭಾರತೀಯ ದಂಡ ಸಂಹಿತೆ 149 ಅಡಿಯಲ್ಲಿ ದೂರು ದಾಖಲಾಗಿದೆ.
ಇದನ್ನೂ ಓದಿ: ಮತ್ತೊಂದು ಅಮಾನವೀಯ ಘಟನೆ.. ಪ್ರೇಮಿಗಳ ಮದುವೆ: ಯುವಕನ ಪೋಷಕರ ಮೇಲೆ ಯುವತಿ ಕಡೆಯವರಿಂದ ಹಲ್ಲೆ
