ಹಾಸನ: ರಾಜ್ಯದಲ್ಲಿ ಮತ್ತೆ ಮುಂಗಾರು ಕ್ಷೀಣಿಸಿದ್ದು, ಬರ ಪರಿಸ್ಥಿತಿ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಹೀಗಿರುವಾಗಲೇ ಜಿಲ್ಲೆಯ ಜೀವನದಿಯಾಗಿರೋ ಹೇಮಾವತಿಯಿಂದ ತಮಿಳುನಾಡಿಗೆ ನೀರು ಹರಿಸಿದ್ದರಿಂದ ರೈತಾಪಿ ವರ್ಗದಲ್ಲಿ ಆತಂಕ ಮನೆ ಮಾಡಿದೆ.
ಉತ್ತರ ಕರ್ನಾಟಕದಲ್ಲಿ ಅತಿವೃಷ್ಟಿಯಾಗಿದ್ರೇ ಹಾಸನದಲ್ಲಿ ಅನಾವೃಷ್ಟಿಯಿಂದ ಬಿತ್ತಿದ ಬೀಜ ಮೊಳಕೆಯೊಡೆಯದೇ ನೆಲಕಚ್ಚುವ ಸ್ಥಿತಿಗೆ ತಲುಪಿದೆ. ಈ ವೇಳೆಗಾಗಲೇ ಹೇಮಾವತಿ ಡ್ಯಾಂ ಬರ್ತಿಯಾಗಬೇಕಿತ್ತು. ಆದರೆ, ಮುಂಗಾರು ಮಳೆ ಕೈಕೊಟ್ಟಿದ್ದರಿಂದ ಡ್ಯಾಂ ಖಾಲಿ ಖಾಲಿಯಾಗಿದೆ.
ಅನಾವೃಷ್ಟಿ ನಡುವೆಯೂ ಹೇಮಾವತಿಯಿಂದ ತಮಿಳುನಾಡಿಗೆ ನೀರು ಹೆಚ್ಚು ದಿನ ಉಳಿಯಲಿಲ್ಲ ಜಿಲ್ಲೆಯ ಜನರ ಮಂದಹಾಸ...!
ಆದರೆ, ಕಳೆದ 15 ದಿನದಿಂದ ಚಿಕ್ಕಮಗಳೂರಿನ ಮೂಡಿಗೆರೆ ಭಾಗದಲ್ಲಿ ಮಳೆಯಾಗಿದ್ದರಿಂದ ಹೇಮಾವತಿ ನದಿ ಮೂಲಕ ಸುಮಾರು 9 ಟಿಎಂಸಿ ನೀರು ಡ್ಯಾಂನಲ್ಲಿ ಶೇಖರಣೆಯಾಗಿತ್ತು. ರೈತರಲ್ಲಿಯೂ ಕೊಂಚ ಮಂದಹಾಸ ಮೂಡಿತ್ತು. ವರುಣ ಕೊಂಚ ಕೃಪೆ ತೋರಿ ಒಂದಿಷ್ಟು ಡ್ಯಾಂ ತುಂಬಿಸಿದ್ದ. ಬಿತ್ತಿದ ಬೆಳೆಗೆ, ಜನ-ಜಾನುವಾರುಗಳಿಗೆ ಈ ವರ್ಷ ತೊಂದರೆಯಾಗೋದಿಲ್ಲ ಅಂತಾ ನಿಟ್ಟುಸಿರು ಬಿಟ್ಟಿದ್ದ ಜಿಲ್ಲೆಯ ಜನರ ಮಂದಹಾಸ ಹೆಚ್ಚು ದಿನ ಉಳಿಯದೇ ಮತ್ತೆ ಆತಂಕ ಎದುರಾಗಿದೆ.
ತಮಿಳುನಾಡಿಗೆ ಹರಿದಳಾ ಹೇಮಾವತಿ...?
ಸುಪ್ರೀಂಕೋರ್ಟ್ ಆದೇಶದನ್ವಯ ತಮಿಳುನಾಡಿಗೆ ಸದ್ಯ ಎರಡು ಟಿಎಂಸಿ ನೀರನ್ನ ಬಿಡಬೇಕು. ಹಾಗಾಗಿ ಹೇಮೆಯ ಒಡಲಿನಿಂದ ಎರಡು ಟಿಎಂಸಿ ನೀರನ್ನ ಹರಿಬಿಡಲಾಗ್ತಿದೆ. ಅಷ್ಟಲ್ಲದೇ ತುಮಕೂರಿಗೆ ನದಿ ಮೂಲ ಇಲ್ಲದ ಕಾರಣ ಇದೇ ನೀರನ್ನು ಅಲ್ಲಿನ ಜನರು ಆಶ್ರಯಿಸಿದ್ದಾರೆ. ಟ್ರಿಬ್ಯುನಲ್ ಆದೇಶದ ಅನ್ವಯ ತುಮಕೂರು ಭಾಗಕ್ಕೆ 25.31 ಟಿಎಂಸಿ ಹಾಗೂ ಹಾಸನ, ಮಂಡ್ಯ ಮತ್ತು ಮೈಸೂರು ಜಿಲ್ಲೆಗಳಿಗೆ ಸೇರಿ ಒಟ್ಟು 18.36 ಟಿಎಂಸಿ ನೀರನ್ನು ಹಂಚಿಕೆ ಮಾಡಲಾಗಿದೆ. ಆದರೆ, ನೀರೆ ಇಲ್ಲದಿರುವಾಗ ನೀರನ್ನ ಬಿಡುವುದಾದ್ರೂ ಹೇಗೆ ಎಂಬುದು ಪ್ರಶ್ನೆ. ಅಲ್ಲದೇ ಈಗಾಗಲೇ ತುಮಕೂರಿನ ಸಂಸದ ಜಿ.ಎಸ್ ಬಸವರಾಜು, ನೀರು ಹರಿಸದಿದ್ರೆ ತಮಿಳುನಾಡಿನ ರೀತಿಯೇ ನ್ಯಾಯಾಲಯದ ಮೊರೆ ಹೊಗುತ್ತೇವೆ ಎಂದಿದ್ದಾರೆ.
ಜಲಾಶಯದ ನೀರಿನ ಮಟ್ಟ:
ಜುಲೈ1 ರಂದು 5 ಟಿಎಂಸಿ ಇದ್ದ ನೀರು, ಜುಲೈ 5ರಂದು 1 ಟಿಎಂಸಿಗೆ ಇಳಿಕೆಯಾಗಿತ್ತು. ಇದಾದ ಬಳಿಕ ಮುಂಗಾರು ಚುರುಕುಗೊಂಡ ಹಿನ್ನೆಲೆ 2 ದಿನದಲ್ಲಿ ಮತ್ತೆ 1 ಟಿಎಂಸಿ ನೀರು ಹರಿದು ಬಂದು 7 ಟಿಎಂಸಿ ನೀರು ಶೇಖರಣೆಯಾಗಿತ್ತು. ಹಾಗೇ ಜುಲೈ 8 ರಂದು ಮಳೆ ಹೆಚ್ಚಾಗಿದ್ದರಿಂದ 12,314 ರಷ್ಟು ಒಳಹರಿವಿನ ಪ್ರಮಾಣ ಹೆಚ್ಚಾಗಿ 9 ಟಿಎಂಸಿ ನೀರು ಹರಿದು ಬಂದಿತ್ತು. ಅಲ್ಲದೇ ಜುಲೈ 11 ರಂದು 10.98 ರಷ್ಟು ಶೇಖರಣೆಯಾಗಿ ಜುಲೈ 19 ರಂದು 2889 ಅಡಿ ನೀರು ಹರಿದಿದ್ದರಿಂದ 14 ಟಿಎಂಸಿಯಷ್ಟು ನೀರು ಶೇಖರಣೆಯಾಗಿ, 200 ಕ್ಯೂಸೆಕ್ ನೀರನ್ನ ನದಿಗೆ ಬಿಡಲಾಗಿತ್ತು. ಜುಲೈ 27 ರಂದು ಡ್ಯಾಂಗೆ 15 ಟಿಎಂಸಿ ನೀರು ಹರಿದು ಬಂದಿದ್ದರಿಂದ ಜುಲೈ 27 ರಂದು 1250, ಜು.28 ರಂದು 2500, ಜು.30 ರಂದು 3650, ಹಾಗೂ ಜು.31 ರಂದು 5000 ಕ್ಯೂಸೆಕ್ ನೀರನ್ನ ಜಲಾಶಯದ ತಳಭಾಗದ 4 ಕ್ರಸ್ಟ್ ಗೇಟ್ನಿಂದ ಹರಿಬಿಡಲಾಗುತ್ತಿದೆ.
ಕಾಲುವೆ ಮೂಲಕವೂ ನದಿಗೆ ನೀರು..!
ಜಲಾಶಯದಿಂದ ಕೇವಲ 5 ಸಾವಿರ ಕ್ಯೂಸೆಕ್ ನೀರನ್ನ ಮಾತ್ರ ಬಿಡಲಾಗುತ್ತಿಲ್ಲ. ಬದಲಿಗೆ ಕಾಲುವೆ ಮೂಲಕವೂ ನದಿಗೆ ನೀರು ಬಿಡಲಾಗುತ್ತಿದೆ. ಇದು ಜಿಲ್ಲೆಯ ಜನರ ಆಕ್ರೋಶವನ್ನ ಮತ್ತಷ್ಟು ಹೆಚ್ಚು ಮಾಡಿದೆ. ಕೇವಲ 5 ಸಾವಿರ ಕ್ಯೂಸೆಕ್ ಎಂದು ಲೆಕ್ಕ ತೋರಿಸಿ ಕಾಲುವೆ ಮೂಲಕ ಹೆಚ್ಚು ನೀರನ್ನ ಹರಿಸುತ್ತಿರುವುದರಿಂದ ಜಿಲ್ಲೆಯ ರೈತಾಪಿ ವರ್ಗ ಮುಂದಿನ ದಿನದಲ್ಲಿ ಉಗ್ರ ಪ್ರತಿಭಟನೆ ಮಾಡುವ ಎಚ್ಚರಿಕೆ ನೀಡಿದ್ದಾರೆ.
ದಿನದಿಂದ ದಿನಕ್ಕೆ ಬರಪರಿಸ್ಥಿತಿ ಹೆಚ್ಚಾಗುತ್ತಿದ್ದು, ಮಳೆರಾಯ ಕೂಡಾ ಮತ್ತೆ ಕೈಕೊಟ್ಟಿದ್ದಾನೆ. ಹೀಗಾಗಿ ಜಿಲ್ಲೆಯ ಜೀವನದಿ ತುಂಬದೇ ಖಾಲಿಯಾಗಿರುವಾಗ ಶೇಖರಣೆಯಾಗಿರೋ ಅಲ್ಪ ಪ್ರಮಾಣದ ನೀರನ್ನೂ ತಮಿಳುನಾಡಿಗೆ ಹರಿಸಿದ್ರೆ ತಮ್ಮ ಪಾಡು ಏನು ಎಂದು ಜಿಲ್ಲೆಯ ಜನ ಆತಂಕಿತರಾಗಿದ್ದಾರೆ. ವರುಣ ಬಂದ್ರೆ ಮಾತ್ರ ಎಲ್ಲಾ ಸಮಸ್ಯೆಗಳಿಗೆ ಮುಕ್ತಿ ಸಿಗಬಹುದೇನೋ..
