ವಿದ್ಯುತ್ ಸ್ಪರ್ಶದಿಂದ ಒಂದೇ ಕುಟುಂಬದ ಮೂವರು ಸಾವು: ಚನ್ನರಾಯಪಟ್ಟಣದಲ್ಲಿ ದುರಂತ

ಹಾಸನ ಜಿಲ್ಲೆಯ ಚನ್ನರಾಯಪಟ್ಟಣದಲ್ಲಿ ಭಾರಿ ದುರಂತ ಸಂಭವಿಸಿದೆ. ವಿದ್ಯುತ್ ಸ್ಪರ್ಶದಿಂದ ಒಂದೇ ಕುಟುಂಬದ ಮೂವರು ಸಾವನ್ನಪ್ಪಿದ್ದಾರೆ.

ಹಾಸನ: ವಿದ್ಯುತ್ ಶಾಕ್​ನಿಂದಾಗಿ ಒಂದೇ ಕುಟುಂಬದ ಮೂವರು ಸಾವಿಗೀಡಾಗಿರುವ ಘಟನೆ ಜಿಲ್ಲೆಯ ಚನ್ನರಾಯಪಟ್ಟಣ ತಾಲೂಕಿನ ಅಗಸರ ಹಳ್ಳಿಯಲ್ಲಿ ನಡೆದಿದೆ. ತಾಯಿ, ಮಗಳು ಮತ್ತು ಮಗ ವಿದ್ಯುತ್​ ಶಾಕ್​ನಿಂದ ಸಾವನ್ನಪ್ಪಿದ್ದಾರೆ.

ತಾಯಿ ಭಾಗ್ಯಮ್ಮ, ಮಗಳು ದ್ರಾಕ್ಷಾಯಿಣಿ ಮತ್ತು ಮಗ ದಯಾನಂದ್ ಮೃತರು. ಬಟ್ಟೆ ತೊಳೆದು, ವಿದ್ಯುತ್ ಕಂಬಕ್ಕೆ ಕಟ್ಟಿದ್ದ ತಂತಿಗೆ ಹಾಕುವಾಗ ಮಗಳು ದ್ರಾಕ್ಷಾಯಿಣಿಗೆ ಕರೆಂಟ್ ಶಾಕ್​ ತಗುಲಿತ್ತು. ಮಗಳನ್ನು ರಕ್ಷಿಸಲು ತಾಯಿ ಮತ್ತು ಮಗ ಸಹ ಶಾಕ್​ಗೆ ಬಲಿಯಾಗಿದ್ದಾರೆ.

ಈ ಕುರಿತು ಚನ್ನರಾಯಪಟ್ಟಣ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.