ಆಪರೇಷನ್ ಕಮಲನೂ ಇಲ್ಲ, ಹುಣಸೇಕಾಯಿ ಗೆಡ್ಡೆನೂ ಇಲ್ಲ: ರೇವಣ್ಣ

ಆದಾಯ ತೆರಿಗೆ ಇಲಾಖೆಯನ್ನು ಬಿಜೆಪಿ ದುರ್ಬಳಕೆ ಮಾಡಿಕೊಳ್ಳುತ್ತಿದೆ. ಐಟಿ ದಾಳಿ ಹೀಗೇ ಮುಂದುವರಿದು ಬಿಜೆಪಿಗರ ಕುತಂತ್ರಕ್ಕೆ ಬಲಿಯಾದರೆ ಮುಂದೊಂದು ದಿನ ಅದಕ್ಕೆ ಮೂರು ಕಾಸಿನ ಬೆಲೆ ಇರಲ್ಲ. ಮೈತ್ರಿ ಸರ್ಕಾರ ಬಿದ್ದು ಹೋಗತ್ತೆ, ಆಪರೇಷನ್​ ಕಮಲ ಮಾಡಿದ್ದೇವೆಂದು ಬಿಜೆಪಿ ಹೆದರಿಸುತ್ತಿದೆ. ಅದ್ಯಾವುದೂ ಇಲ್ಲ ಹುಣಸೇಕಾಯಿ ಗೆಡ್ಡೆನೂ ಇಲ್ಲ ಎಂದು ರೇವಣ್ಣ ವ್ಯಂಗವಾಡಿದ್ದಾರೆ.

ಹಾಸನ: ಆದಾಯ ತೆರಿಗೆ ಇಲಾಖೆ ಹಾಗೂ ಜಾರಿ ನಿರ್ದೇಶನಾಲಯ ಸ್ವಾಯತ್ತ ಸಂಸ್ಥೆಗಳನ್ನು ಬಿಜೆಪಿ ಅವರು ಹೀಗೆ ದುರ್ಬಳಕೆ ಮಾಡಿಕೊಳ್ಳುತ್ತಿದ್ದರೆ ಮುಂದೊಂದು ದಿನ ಐಟಿಗೆ ಮೂರು ಕಾಸಿನ ಬೆಲೆಯೂ ಇರಲ್ಲ ಎಂದು ಸಚಿವ ಹೆಚ್.ಡಿ.ರೇವಣ್ಣ ಹೇಳಿದರು.

ನಗರದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು,ದೇವೇಗೌಡ್ರ ಜೊತೆ ಮಂಡ್ಯ, ಹಾಸನದ ಅಭ್ಯರ್ಥಿಗಳು ದೆಹಲಿಗೆ ಹೋಗುವುದು ನಿಶ್ಚಿತ. ಮೈತ್ರಿ ಸರ್ಕಾರಕ್ಕೆ ಯಾವುದೇ ಅಪಾಯವಿಲ್ಲ ಎಂದು ಹೇಳಿದರು. ರಾಜ್ಯದ ಅಭಿವೃದ್ಧಿಗೆ ಮೈತ್ರಿ ಸರ್ಕಾರ ಸುಭದ್ರವಾಗಿರಲಿದೆ‌. ಇನ್ನೂ ಎರಡನೇ ಹಂತದ ಲೋಕಸಭಾ ಚುನಾವಣೆ ಮುಗಿಯುವ ಮೊದಲೇ ಮೈತ್ರಿ ಸರ್ಕಾರ ಬೀಳಿಸಲು ಹೊರಟಿದ್ದಾರೆ. ಜನಸಾಮಾನ್ಯರ ಹಿತ ಕಾಪಾಡುವುದು ಹಾಗೂ ರೈತರ ಹಿತ ಕಾಯುವ ಕೆಲಸಗಳನ್ನ ವಿರೋಧ ಪಕ್ಷದವರು ಮಾಡುತ್ತಿಲ್ಲ ಎಂದು ಕಿಡಿಕಾರಿದರು.‌

ಬಿಜೆಪಿಯವರು 10 ತಿಂಗಳಿಂದ ಸರ್ಕಾರ ಪಥನಗೊಳಿಸುವ ಹುನ್ನಾರ ನಡೆಸಿದ್ದಾರೆ. ಕೆಲವು ಮಾರವಾಡಿ ಗುತ್ತಿಗೆದಾರರಿಗೆ ಕೆಲವರು ಮೇ 23 ಚುನಾವಣಾ ಫಲಿತಾಂಶದ ಬಳಿಕ ಸರ್ಕಾರ ಬೀಳುತ್ತೆ ಎಂದು ಹೆದರಿಸುತ್ತಿದ್ದಾರೆ. ಯಾವ ಆಪರೇಷನ್ ಕಮಲನೂ ಇಲ್ಲ, ಹುಣಸೇಕಾಯಿ ಗೆಡ್ಡೆನೂ ಇಲ್ಲ.ಮಂಡ್ಯ, ಹಾಸನ ಹಾಗೂ ತುಮಕೂರಿನಲ್ಲಿ ಕೆಲವು ಎಲೆಕ್ಟ್ರಾನಿಕ್ ಮಾಧ್ಯಮಗಳು ಬೇಕಾ,ಬಿಟ್ಟಿ ಪ್ರಚಾರ ನೀಡಿದ್ದಾರೆ. ಹೀಗೆ ಪ್ರಚಾರ ಮಾಡುತ್ತಿದ್ದರೆ. ಜನಸಾಮಾನ್ಯರಿಗೆ ಎಲೆಕ್ಟ್ರಾನಿಕ್ ಮಾಧ್ಯಮಗಳ ಬಗ್ಗೆ ಮೂರು ಕಾಸಿನ ಬೆಲೆಯೂ ಸಿಗಲ್ಲ. ನೀವು ಏನೇ ಮಾಡಿದರೂ ನಾವೇ ಗೆಲ್ಲೋದು‌. ಬೇಕಿದ್ರೆ ಶಾಸ್ತ್ರ ಹೇಳ್ತಿನಿ ಬರೆದಿಟ್ಟುಕೊಳ್ಳಿ ಎಂದು ಆಕ್ರೋಶ ವ್ಯಕ್ತಪಡಿಸಿದರು‌.

ದೇವೇಗೌಡ್ರನ್ನು ಐಟಿ ದಾಳಿಯಿಂದ ಬೆದರಿಸುತ್ತೇನೆ ಅಂದುಕೊಂಡಿದ್ದರೆ ಅದೆಲ್ಲ ತಿರುಕನ ಕನಸು.‌ ಇವುಗಳೆಲ್ಲವನ್ನ ಹೆದರಿಸಿ‌ ದೇವೇಗೌಡ್ರು 60 ವರ್ಷಗಳ ಕಾಲ ರಾಜಕಾರಣ ಮಾಡಿದ್ದಾರೆ. ಅಧಿಕಾರ ದುರುಪಯೋಗ ಪಡಿಸಿಕೊಳ್ಳುವುದು ಎಷ್ಟು ದಿನಗಳು ನಡೆಯುತ್ತೆ.ದೇಶದಲ್ಲಿ ಎಂತೆಂತಹ ರಾಜಕಾರಣಿಗಳು ಏನೇನಾಗಿಲ್ಲ ಎಂದರು.

ಹುಟ್ಟೂರು ಹರದನಹಳ್ಳಿ ಈಶ್ವರ ದೇವಾಲಯಕ್ಕೆ ದಾಳಿ ಮಾಡಿದ್ದು ಐಟಿ. ಇದಲ್ಲದೆ ಜಿಲ್ಲಾಧಿಕಾರಿಗಳೇ ಸ್ವತಃ ನಮ್ಮ ಥಿಯೇಟರ್ ಹಾಗೂ ಸಹಾಯಕನ ಮೇಲೂ ದಾಳಿ ಮಾಡಿದ್ದಾರೆ ಎಂದು ಕಿಡಿಕಾರಿದರು. ಯಡಿಯೂರಪ್ಪ ಹಾಗೂ ಶ್ರೀರಾಮುಲು ಇಬ್ಬರಿಗೂ ಮಂಡ್ಯ, ಹಾಸನ ಹಾಗೂ ತುಮಕೂರು ಜಿಲ್ಲೆಗಳಲ್ಲಿ ಮೈತ್ರಿ ಅಭ್ಯರ್ಥಿಗಳು ಸೋಲುತ್ತಾರೆ ಎಂಬ ಕನಸ್ಸು ಬಿದ್ದಿತ್ತಾ. ಹಾಗಾದರೆ ಬಿಜೆಪಿಯವರು ಚುನಾವಣೆಗೆ 10 ರೂ ಖರ್ಚು ಮಾಡಿಲ್ಲವೇ. ಚುನಾವಣಾ ಆಯುಕ್ತರ ನಿರ್ದೇಶನದ ಮೇರೆಗೆ ಜಿಲ್ಲಾಧಿಕಾರಿ ಅವರು ಪ್ರಜ್ವಲ್​ಗೆ ಅರ್ಜಿ ಕೊಡ್ತಾರೆ. ಚುನಾವಣೆ ವೇಳೆ ಚುನಾವಣಾ ಆಯುಕ್ತರು ಹೇಗೆ ನಡೆದುಕೊಂಡಿದ್ದಾರೆ ಅನ್ನೊದನ್ನ ಸಮಯ ಬಂದಾಗ ಹೇಳ್ತಿನಿ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಯಡಿಯೂರಪ್ಪ ಅವರು ಮೊದಲು ಶಿವಮೊಗ್ಗ ನೋಡಿಕೊಳ್ಳಲಿ. ಯಡಿಯೂರಪ್ಪ ಅವರು ಹಾಸನಕ್ಕೆ ಬಂದು ಬಿಜೆಪಿ ಅಭ್ಯರ್ಥಿ ಪರ ಪ್ರಚಾರ ಮಾಡಿದ್ದಾರೆ. ಇನ್ನು ಬಿಜೆಪಿ ಮುಖಂಡರಾದ ಕೆ.ಎಸ್.ಈಶ್ವರಪ್ಪ ಹಾಗೂ ಯಡಿಯೂರಪ್ಪ ಇಬ್ಬರ ಸಹೋದರರಂತೆ ಕೆಲಸ ಮಾಡ್ತಿದ್ದಾರೆ ಎಂಬ ಪ್ರಶ್ನೆಗೆ ಅವರು ಹಾಗೆಯೇ ಇರಲಿ ಬಿಡಿ ಎಂದರು.